Mwa Kwingidila Kisaka Kyonso Pamo Senene—Mu Kupwila kwa pa Kipwilo
1 Bisaka bya bene Kidishitu bifwaninwe kulonda musoñanya wa kubungakena pamo mu kupwila kwa pa kipwilo. (Bah. 10:24, 25) Shi bonso bengidile pamo mu kisaka, babwanya kuteakanya kupwila senene, kutanwa’ko, ne kulondolola’ko. Eyo, ngikadilo ya bisaka i mishile, ino kudi bintu bikokeja kulonga shabana mwine Kidishitu, mukaji mwitabije, nansha mbutwile ulela bana kasuku, biloejanga bumo bwa kisaka mu myanda ya kumushipiditu, pampikwa kulonda buvule ne kimano kya bana.—Nk. 1:8.
2 Twitūdilei Kitatyi kya Kwiteakanya: Bantu ba mu kisaka bengidilanga pamo mwanda wa umo ne umo amone kuteakanya kupwila biyampe. Bisaka bivule bibandaulanga pamo kishinte kya kifundwa kya Kiteba kya Mulami. Bikwabo biteakanya pamo Kifundwa kya Kitabo nansha kulonda pamo butangi bwa Bible bwa ku yenga. Kilongelwanga namino i kusaka kulama myanda mikatampe mu ñeni kumeso kwa kwenda ku kupwila. Mu uno muswelo, bonso bakamwena biyampe mu byobakevwana’ko ne kwikala belongolole mwa kulondolwela ponso pobamona mukenga.—1 Tem. 4:15.
3 Twitungilei Kulondolola’ko: Muntu ne muntu mu kisaka ufwaninwe kwitungila kitungo kya kulombola lukulupilo lwandi ku meso a bakwabo na kulondolola ku kupwila. (Bah. 10:23) Lelo mu kisaka kyenu mudi muntu usakilwa kukankamikwa nansha bukwashi bwa mwa kulondolwela? Le i bukwashi’ka botukokeja kukwasha yewa uteakanya kipindi kya kukapityija ku Masomo a Mwingilo wa Kiteokratike? Bakaji batendelanga balume babo shi bata mutyima ku kwibalombola kifwa kampanda kya kuleta nansha kifuko kiyampe. Bambutwile kebafwaninwepo kulanga’mba banenwe’nka kuteakenya babo bana bipindi byobakapityija. Kulonga namino i kujikila bana mashinda a kutamija manwa abo. Ino bambutwile bakokeja kukwasha babo bana, kwibateja pobapituluka’mo na diwi ditunduke.—Ef. 6:4.
4 Twilongololei mwa Kukataninwa’ko: Bana bakokeja kufundijibwa tamba bunkasa bwabo kuvwala ne kwilongolola senene mwa kwendela ku kupwila pa kitatyi kitungwe. Kisaka kyonso kifwaninwe kwingila pamo mingilo ya ku njibo kutyina’mba kyakalondela.—Tala madingi adi mu dibuku Kisaka, paje 112, ne Vijana Huuliza, paje 316-317.
5 Ne bambutwile, ne bana, abo bonso bafwaninwe kulanguluka pa binenwa bya Yoshua, wānene amba: “Ino padi amiwa nanshi ne njibo yami mine, tukamwingidilanga Yehova.” Shi ke pano, umo ne umo ufwaninwe kusumininwa kwingidila pamo mwa kukamwena biyampe mu kupwila kwa pa kipwilo.—Yos. 24:15.