Mwene ketudi bevwane’byo kala?

¹ Eyo, ketudi kala bevwane’byo! Yehova i mupituluke mu bintu bivule mu Kinenwa kyandi mwanda wa bantu bandi bamwene’ko. Yesu nandi wādi upituluka misunsa mivule mu bufundiji bwandi bwa bintu bishileshile bitala pa Bulopwe. Batumibwa bandi nabo bādi nyeke babandaula’nka kubandaula myanda ya kumushipiditu na boba bādi kala bashimatyije mu bubinebine.​—⁠Loma 15:15; 2 Pet. 1:​12, 13; 3:​1, 2.

² Ne mu ino yetu myaka namo mo monka, bulongolodi bwa Yehova i bukwate’ko mpangiko ya kupituluka kyaba ne kyaba mu myanda ya mvubu mikatampe ku kupwila kwa pa kipwilo. Mabuku amoamo efundwanga misunsa ne misunsa. Bine, kwivwana bintu byoketudi kala bevwane kudi na mvubu mpata!

³ Kupituluka’mo kudi na mvubu mikatampe: Bivulujo bya Yehova bilungulwilanga’ko mwivwanino wetu, bitulundila’ko milangwe, kadi bikomeja kusumininwa kwetu kotusumininwe kulonda nyeke dishinda dya kumushipiditu. (Mit. 119:129) Kupituluka mu mbila ne misoñanya ya Leza kudi pamo bwa kwitala mu dikalashi. Kwitupanga muswelo wa kwibata munda ne kujikila mashinda mutyima witukokela ku kwikala ‘bemvwaniki ba kīlwa.’​—⁠Yak. 1:​22-25.

⁴ Shi tuleke kwivuluja nyeke bubinebine, bintu bikwabo bikabikala mu mityima yetu. Bivulujo bya Leza bitupanga bukomo bwa kukomena mpupo ya kiboja ya ino ntanda ya Satana. (Mit. 119:​2, 3, 99, 133; Fid. 3:⁠1) Bivulujo byotuvulujibwa kyaba ne kyaba, bitala pa kufikidila kwa mpango ya Leza, bitukwashanga twikale nyeke “kutengela.” (Mako 13:​32-37) Kupituluka mu bubinebine bwa mu Bisonekwa ko kwitukwashanga tuleke kusasuka mu dishinda ditwala ku būmi bwanyeke. ​—⁠Mit. 119:144.

⁵ Tukokeja umo ne umo kumwena’mo biyampe: ‘Mityima yetu ifwaninwe kulēmenena ku bivulujo bya Leza.’ (Mit. 119:36) Nansha shi kishinte kikabandaulwa ku kupwila i kyotuyukile kala, tufwaninwe kuteakanya’kyo kumeso kwa kitatyi, kutanga bisonekwa biletelwe’mo, ne kulanguluka pa muswelo otukokeja kwingidija myanda idi’mo. Ketwakizobololai kuteakanya kupituluka kwa kwandika kwa Masomo a Mwingilo wa Kiteokratike, na kulanga’mba kekudipo na mvubu. (Luka 8:18) Kadi potudi ku kupwila, ketufwaninwepo kuta mutyima ku bintu bingi amba mwanda’po i bubinebine bwa kyalwilo bumo bonka bupitulukwapitulukwa’mo.​—⁠Bah. 5:11.

⁶ Twiulei mutyima wādi nao mulembi wa mitōto wānene amba: ‘Ami nsepelelanga mu dishinda dya bivulujo byobe, pamo’nka na monsepelelanga mu bintu bikwabo byonso bilēme.’ (Mit. 119:14) Eyo, ketudi bevwane kala bino bintu bilēme, kekubulwe padi tukebivwana ne dikwabo. Mwanda waka tunena namino? Mwanda Yehova uyukile amba tudi nabyo mvubu ya kwibivwana!