Lomba Bukwashi
1 Bishima bya ku bukomo bwa mushipiditu i binene byabine pobitela ino myaka ya malwa bu “bita[ty]i bikomo.” (2 Tem. 3:1, BB) Lelo shi ubatana bikambija bya kumushipiditu, byobwanya kwinyanga bukomo bwa kwibinekenya, ukalonga’po namani?
2 Ubulwe’po kwisamba na mwanetu umo mupye kumushipiditu wa mu kyenu kipwilo? Bamo bekakanga mwanda wa bumvu, bapela kulombolwa na muntu, pakwabo balakana amba kekudipo ne muntu mwine ubwanya kwibakwasha. Eyo, tufwaninwe kwiselela biselwa batwe bene, ino tudi ne na bwanapabo bwa kukimba bukwashi mu myanda ya būmi bwetu bwa kumushipiditu.—Ngat. 6:2, 5.
3 Kushilwila Kudi Ani: Ubwanya kufwena mwendeji wenu wa kifundwa kya kitabo, ne kumulomba shi mubwanya kutambila nandi mu mwingilo wa budimi. Kino kikakupa kyaba kya kumulombola mosakila kutama kumushipiditu. Shi kadi i mwingidi wa mingilo, muyukije bikusakila’ko, nandi mwa kukalombwela bakulumpe ba kwiya kukukwasha. Ubwanya nansha kufwena mukulumpe ye-yense ne kumutūdila mwanda obe.
4 I bukwashi bwa muswelo’ka bokimba? Le kudi kyatalaja bupyasakane bobe’ni? Wi mbutwile wikonda na bana bunka bobe bekale kulamata nyeke ku kipwilo’ni? Ubanunupa pano ukimba bukwashi’ni? Nansha kudi mwanda ungi ukuzozeja? Kulwa na ino myaka ya malwa i bulwi bukomo. Ino ke bukomopo botunya kunekenya; mwanda bukwashi budi’ko.
5 Muswelo Ukwashanga Bakulumpe: Bakulumpe i bantu ba kilelo kyabinebine. Bakakwivwana pa myanda ikuzumbijazumbija mutyima. Shi kudi basapudi bakwabo batanwa na bijika bya muswelo umo, bakulumpe bakata’ko mutyima mu bukumbi bwabo ne pobafundisha kipwilo. Abo i “byelekejo bya luombe,” batengele nyeke kwingila nobe pamo na nsangaji. (1 Pet. 5:3) Kuteleka bano batutu bapotolwele mingilo pobalanguluka netu pa misoñanya idi mu Bible kukalumbulula mwingilo wetu, ne kadi kuketukwasha mu būmi bwetu.—2 Tim. 3:16, 17.
6 Yesu i mwitupe ‘bantu bavule bu byabuntu.’ (Ef. 4:8.) Kino kishintulula amba bakulumpe bakwingidilanga abe’wa. Badi’ko mwanda wa kukukwasha. Ko kunena amba ‘i bobe.’ (1 Kod. 3:21-23) Kokekaka kwisamba nabo. Wibalombe bukwashi bukusakila’ko.