Twifundei Kitabo Unabii wa Danieli
1 Tamba mu yenga ushilula mu mafuku 17 Kweji 4, tukanza kwifunda kitabo Sikiliza Unabii wa Danieli! mu Kifundwa kya Kitabo kya pa Kipwilo. Bavule ke bapwe kala kutanga dino dibuku ditendelwa, ino pano tusa kwikala na kyaba kya kumwena’mo byabuyabuya pa kubandaula myanda yadyo kya pamo mu kisumpi. Basapudi, bantu basepelela musapu, ne bana, bonso i betwe, eyo, bonso i bakankamikwe kutanwa yenga ne yenga ku kino kifundwa kya mushike kya mukanda wa mu Bible wa Danyele.—Kup. 31:12, 13.
2 Mpangiko ya Kifundwa ne Bulombodi: Mpangiko yonso mituntulu ya kifundwa kya kino kitabo Unabii wa Danieli i miletwe mu uno Mwingilo Wetu wa Bulopwe. Lama’ko kopi umo mu dibuku dyobe dya kwifunda’mo. Ino mpangiko i milombole shapita, misāngo ya mu dibuku ne mavese a mu mukanda wa Danyele akabandaulwa mu kupwila kwa ku yenga ne yenga. Bilembwa bya kunshi bishintulula muswelo wa kwifunda myanda imoimo ya mu dino dibuku ne kitatyi kine kyoikefundwa. Ku mvuyo ya kifundwa ne kifundwa kya ku yenga, mwendeji i mukankamikwe kupituluka na kisumpi mu mavese a mu mukanda wa Danyele adi ku mpangiko ya mwine yenga’wa. Shi kitatyi kikidi’ko, ano mavese akokeja kutangwa ne kushintululwa. Kudi mavese amoamo akabandaulwa mu mayenga mavule mwanda wa kwingidijibwa koenda engidijibwa mu myanda pala pala.
3 Teakanya Kifundwa Kishikate: Kwalongelwe bukomo bwa kutūla myanda ya kwifunda mungya kitatyi kifikile ku yenga ne yenga, mwa kubandawila’yo pampikwa kwiyumbila. Ino kudi bifundwa biná bīpi. O mwanda ku mfulo kwa kifundwa kya mu yenga ushilula mu mafuku 5 Kweji 6, mwendeji ukokeja kupituluka ne mu Danyele 2:1-40. Shi ke mu yenga ushilula mu mafuku 26 Kweji 6, ukokeja kupituluka mu Danyele 3:1-30. Kifundwa kya mu yenga ushilula mu mafuku 4 Kweji 9 kikatwejibwa’mo bubandaudi bwabinebine bwa bifwatulo ne bisonekwa bidi pa paje 139. Tabulo udi pa paje 188 ne 189 ufwaninwe kwisambilwa’po mu kifundwa kya mu yenga ushilula mu mafuku 2 Kweji 10.
4 Teakanya kifundwa biyampe shē yenga ne yenga, mwa kukalondolwela’ko na nsangaji. Kwata na bulēme madyese odi nao a kubadilwa mu bulongolodi bwa Yehova bumweka na meso, ne a kumwena byabuyabuya mu bujinguludi ne kwivwanija kwitupa bengidi bandi bashingwe-māni bakikōkeji. (Dan. 12:3, 4) Kankamika bakwenu bekale kutanwa ku kifundwa kya kitabo kitatyi ne kitatyi. Batwe bonso tutei mutyima ku kinenwa kya Leza kya bupolofeto na mokisokwedilwe mu mukanda wa Danyele, mukanda uleta nzuba.—Bah. 10:23-25; 2 Pet. 1:19.