Lelo Udi na Mushipiditu wa Kwipāna?

¹ Kufwija’ko kwetu pa byētulongele Yesu Kidishitu mwanda wa kukūla muzo wa muntu pakubulwa kwisakila’nka aye mwine kuketutonona batwe bonso twingidije manwa etu, bukomo bwetu, buninge bwetu mu muswelo ulombola amba tudi na mutyima wa kwipāna. Bisonekwa bitusoñanya’mba: “Mwipane[i] ngitu yenu, ke kitapwa kyumi, kikola, kya kuloelelwa Leza, [ke mingilo ikola kadi].” (Loma 12:⁠1) Kwibandaula kwa kitatyi ne kitatyi kukakukwasha uyuke shi mwingidilo obe ulombolanga amba udi na mutyima wa kwipāna byabinebine, kukwatañana na ngikadilo yotudi’mo.

² Mu Kulondalonda Buyuki bwa Bible: Le kodi mwitūdile’ko kitatyi kya butangi bwa Bible ne kifundwa kya kasuku mafuku onso? Lelo ulondanga ino mpangiko? Le udi na kibidiji kya kuteakanya biyampe kupwila kwa pa kipwilo? Shi wi mutwe wa kisaka, lelo mwikalanga mwifunda nyeke kifundwa kya Bible na ba mu kyobe kipango? Kulonga namino kulombanga kwisuminwa kitatyi kyotwādi ba kutala televijo, kompyuta nansha mingilo ingi yotwadi ba kwingila. Inoko kwisuminwa kotwisuminwa’kwa i kutyetye, mwanda tuyukile amba kwifunda Kinenwa kya Leza kuketukwasha tukamone būmi bwa nyeke!​—⁠Yoa. 17:⁠3.

³ Mu Kufundija Bobe Bana: Kitatyi kilumbuluke kushilula kufunda kwikala na mutyima wa kwipāna i mu bunkasampe. Fundija bobe bana amba byokudi kitatyi kya makayo, kufwaninwe kwikala ne kitatyi kya kaji ne kya kwingila mingilo ya Leza. (Ef. 6:⁠4) Wibape mingilo kampanda ya pa lubanza idi na bukwashi. Tūla’ko mpangiko ya kutambila nabo kitatyi ne kitatyi mu busapudi. Shimatyija bufundiji bobe na kifwa kilumbuluke kyowibapa.

⁴ Mu Mingilo ya Kipwilo: Kipwilo kiloanga shi bonso badi’mo badi na mutyima wa kwingila pakubulwa nsengwa mingilo ya kukwasha bonso. (Bah. 13:16) Le kubwanyapo kupityija kitatyi kivule mu mwingilo wa kusapula Bulopwe ne kulonga bana-babwanga? Wabulwa’po kwangula’ko babela ne banunu, kifwa na kwibakwasha bamone muswelo wa kufika ku kupwila?

⁵ Yesu, kumeso kwa kwela kitapwa kitabuke bulēme kya būmi bwandi bwa bu muntu, wādingile bandi bana-babwanga kubambila meso abo pa tumweno twa Bulopwe, ino bintu bikwabo byo-byonso kebilonda kunyuma. (Mat. 6:33) Kulondalonda mushipiditu wa kwipāna uno muswelo kuketuletela nsangaji mikatampe mu mingilo yotwendelela na kwingidila Yehova na nsangaji.