Lelo Abe Mwine Umwenanga’mo?

¹ Bantu midiyo ne midiyo dyalelo bakimbanga kuyuka mwa kupwila makambakano abo ne kwikala na būmi bwa nsangaji. Batanga mabuku mavulevule a kwikwasha nao, pakwabo banyemena ku bitango nansha ku malongolodi a bantu kukepangula mwa kulumbulwila būmi bwabo. Bamo babwanya kutela’nka ne bukwashi butyetye bobamwenanga’ko. Ino, shi tutale mwikadile būmi bwa bantu dyalelo, lelo tubwanya kunena amba bonso abayuka kwikala na būmi bwa ndoe, badi na būmi bwa maloa butamba ku bintu bifundija bana ba bantu? Kebidipo nansha kubwipi!​—⁠1 Kod. 3:​18-20.

² Ku mutamba mukwabo, Umpangi wetu i mulete’ko bufundiji bwa ku bitupu bukwasha mpata muntu yense wibuteleka. Yehova ukimbanga muntu yense amwene biyampe mu bufundiji bwandi. I mupāne ku buntu bitupu Kinenwa kyandi kya ku bukomo bwa mushipiditu kya kuludika bantu umboloke, wasoñanya ne myanda miyampe ya Bulopwe bwandi isapulwe ntanda yonso. (Mit. 19:​7, 8; Mat. 24:14; 2 Tem. 3:16) Kwikala na būmi bwa nsangaji yabinebine i kuta mutyima ku mbila ya Yehova.​—⁠Is. 48:​17, 18.

³ Bwendeji bwa Yehova i butabuke kulampe bwendeji bo-bonso butanwa mu bitabo bya kwikwasha nabyo ne ñeni ya mwa kutubulukila ileta ino ntanda. Kumona bukwashi bwabinebine ne kamweno kaendaenda i kulonda mpangiko yonso ya Yehova ilombwelwe mu Kinenwa kyandi, monka mwitufundijija’yo bwandi bulongolodi.​—⁠1 Pet. 3:​10-12.

⁴ Mwenai Kamweno mu Kupwila kwa pa Kipwilo: Dyalelo dino, Yehova witūtele mutyima mpata pa kwitufundija andi mashinda, netu tumwenanga’mo potutanga mutyima ku bufundiji bwandi. Kupwila kutano kotudi nako i kilomboji kikatampe kilombola muswelo witutele Yehova mutyima byabinebine. Potutanwanga ku kupwila kwa pa kipwilo, ne buyuki bwetu butala padi Leza nabo bwendanga buvuladila’ko. Tufundijibwanga’ko mwa kwilamina ku bibi na kulamata kudi Yehova. Enka namino, ñeni yetu yenda ilumbuluka.

⁵ Kudi bikwabo. Ku kupwila tubwanya kadi ‘kutandabuka’ko.’ (2 Kod. 6:13) Kushintulula ko kunena amba kwiyukila’ko na bantu bakwabo mu kipwilo. Kadi twikankamikanga’ko batwe bonso, monka mwēkisonekele mutumibwa Polo mu mukanda waātumīne bene Loma. (Loma 1:​11, 12) Paātumine mukanda kudi Bahebelu, wādi ukoma boba bāikele na kisela kya kubulwa kipwano kya bwine Kidishitu.​—⁠Bah. 10:​24, 25.

⁶ Bino bintu byendelanga pamo; shi tusakila bakwetu biyampe, netu tukekala na nsangaji umbūmi. Twi bakankamikwe kukimba miswelo ya kuloeja nsangaji ya bakwetu. Nanshi kupwila kwa bwine Kidishitu kudi’ko mwanda wa kamweno ketu ne ka boba botuloeja nabo kipwano kilumbuluke. Kikatampe kisakwa kotudi i kutanwa’ko na mutyima onso.

⁷ Mutumibwa Polo wātengele mwanda umo onka mu mukanda wa madingi waātumīne Temote, amba: ‘Wikale kwitompa mu kitungo kyobe kya lulamato lwa kudi Leza.’ (1 Tem. 4:⁠7) Tubwanya kwiipangula’mba: ‘Le ami uno netompanga? Le nefundanga muswelo wa kumwena mu byotwifundanga ku kupwila?’ Tubwanya kwitabija amba eyo enka shi tutanga mutyima ku byotwivwananga ku kupwila ne kwikankila’ko kulongela monka. Tufwaninwe kumona batutu baleta bufundiji na etu meso a mutyima pamo na batwe bamwene Yehova Mufundiji Mwine Mukatampe wa bandi bantu.​—⁠Is. 30:20.

⁸ Masomo a Mwingilo wa Kiteokratike ne Kupwila kwa Mingilo: Kuno kupwila kubidi kutūdilwe’ko mwanda wa kwitukwasha twikale kulupula bipa biyampe mu mwingilo wa bwine Kidishitu. I Masomo a Mwingilo wa Kiteokratike binebine: adi na bana ba masomo batambula bufundiji ne madingi kitatyi ne kitatyi. Nobe udi na mukenga wa kuyukanya patōka kwendelela kobe kwa bu muneni ne bu mufundiji wa Kinenwa kya Leza. Ino pa kumwena bivule mu ano masomo, ufwaninwe kwilembeja’ko, kutanwa’ko, ne kulonga’ko bipindi kitatyi ne kitatyi, ne kuteakanya na mutyima umo bipindi bikupebwa’ko. Shi witabija madingi akupebwa ne kulongela monka ukendelela.

⁹ Kupwila kwa Mingilo kwitufundijanga mvubu ya mingilo ya bwine Kidishitu ne kwitulombola muswelo otubwanya netu kwingila uno mwingilo wa kulonga bana-babwanga. Le abe ne kisaka kyobe mumwenanga mpata mu bifundijibwanga ku kuno kupwila kubidi? Bisaka bibidi binene’po amba: “Ku Kupwila kwa Mingilo kumo, twaivwene banena amba tufwaninwe kubandaula kisonekwa kya difuku mu kisaka. Ketwadipo twikibandaula; inoko pano ketwikibandaulanga.” Le i kamweno’ka kobamwenanga’mo? Banena’mba: “Pano tubamone ne mīsambo mine yotwisambanga ku meza ke yonka isangaja. Ne bimyanda bya kwipotomeja pa kudya kebikidi’kopo.” Le ne bana batyetye nabo bamwenanga kamweno mu kupwila? Eyo. Inabo unena’mba: “I bimweke patōka, betu bana abaalamuka mpata pa mwanda’tu wa kupwila. Mu yenga umo nenki, twaikele kutuluja wetu mwana mwana-mulume wa myaka 6 wadi ubepa bubela. Ino mu mwine yenga’o kishinte kya bufundiji kyanenwe ku kupwila kyadi kimanine pa kubepa bubela. Wafwilwa mulume nobe, watala kudi shandi, papo kakonkamene’tu paadi ushikete. Watambula lufundijo, mulekelele’byo.”

¹⁰ Kaka umo pania unena amba nsangalanga mpata pobetupanga madingi a mwa kulumbulwila musapwilo wetu ku Kupwila kwa Mingilo. Mwanda waka? Ushintulula’mba: “Nadi kendi mwibidile musapwilo umo onka. Kyaba kimo nadi nanga amba milangwe yobaletanga mu Mwingilo Wetu wa Bulopwe keikakwashapo. Inoko ponaivwene betulombola ku Kupwila kwa Mingilo amba tufwaninwe kutompa’yo, naivwana masenda aunkanda mu ngitu a kwenda kukatompelela’yo. Pano ibaneñenya mwingilo wami keusangaja!” Paalondele milangwe ya kushilula kifundwa musunsa umbajinji wa kwimona na muntu, kupwa kwa mayenga kampanda, washilwile kifundwa kya Bible na nsongwakaji umo musunsa umbajinji obemwene nandi, wadi ulombela amone wa kumukwasha.

¹¹ Poivwananga kishinte kileta madingi a mu Bible atala pa butongi botoñanga, lelo umonanga amba i Yehova wisamba nobe mpala na mpala? Mo mwadi mumwena tutu umo. Wanene amba: “Enka panō ku kupwila kumo, kwadi kishinte kimo kyapityije tutu umo kyadi kinena myanda ya kwipwija mukose kuyampe kufwaninwe bene Kidishitu ne kubi kekwibafwaninwe. Nadi nswile kubandila bantu bekupila bikoni ku televijo. Ino kupwa kwa kwine kupwila’ko, natūdidila mene makayo’o mu mulongo wa kwipwija mukose kubi kekufwaninwepo ku bene Kidishitu. I kupwididile, kikibandilanga’byopo.” Bine, uno tutu, nansha byaādi witobelwe makayo a butombe, wētyepeje, wāitabija buludiki bwa Yehova​—⁠Mit.11:⁠5.

¹² Kupwila kwa Bantu Bonso, Kifundwa kya Kiteba kya Mulami, ne Kifundwa kya Kitabo kya pa Kipwilo: Bishinte bya bantu bonso byotwivwananga yenga ne yenga biteñanga myanda ya mu Bible mishileshile. Le umwenanga’mo bika mu bino bishinte? Mwine Kidishitu umo musonge washintulwile tumweno twamwenine’mo amba: “Kishinte kimo kya bantu bonso kyashintulwile bipa byonso bya mushipiditu. Muneni wanena amba, aye mwine pa kubwanya kutamija’byo, utoñanga’ko kipa kimo yenga mutuntulu. Ku mfulo kwa yenga, walanguluka pa bintu byalongele mu būmi bwandi bwa difuku ne difuku bilombola kipa’kya. Kupwa washilula kutamija ngikadilo miyampe mikwabo mu yenga ulonda’ko. Nami nasanswa mwine mulangwe’o, naanjidila kulongela monka.” Bine, kino i kifwa kilumbuluke kya mwa kulondela bintu bifundwa!

¹³ Kifundwa kya Kiteba kya Mulami kitufundijanga kwingidija misoñanya ya mu Bible mu ngikadilo mishileshile ya mu būmi. Kino kitukwashanga twikale na milangwe ne mityima mitūkanye, nansha byokudi bintu bituzumbijazumbija mityima mu būmi. Kifundwa kya Kiteba kya Mulami kituyukijanga kadi nyeke mwendela bubinebine kumeso. Kifwa, lelo twamwenine mu kifundwa kya mitwe ya myanda yabandawilwe mu Kiteba kya Mulami kya difuku 1 Kweji 5, 1999 inena’mba: “Bino Bintu Bifwaninwe Kumweka Bidi,” “Wakutanga Penepo Ēvwanije Biyampe,” ne “Tadijai Koku Mwingila na Kininga!” Lelo bino bifundwa byaikele kukutenga namani? Le ulombolanga na byobe bilongwa amba ulamine kino kidyumu kya Yesu kitala pa mafuku āya kumeso? Le nobe witeakanyanga ku matompo akutengele kumeso akafikidila potukamona “kikobakane kya munyanji kya musala . . . ke kīmene [mu kifuko kikola]”? (Mat. 24:​15-22) Le bitungo byowitungila ne mwikadilo obe bilombolanga amba kintu kya mvubu kupita byonso kodi ke kungwijapo byabupeta bya ku ngitu, i kutumbija dijina dya Yehova? Ku Kifundwa kya Kiteba kya Mulami, mwene betulombolanga’ko kumwena’mo tamba’nka pano?

¹⁴ Pano langa muvudile bintu byotwifundanga ku Kifundwa kya Kitabo kya pa Kipwilo yenga ne yenga. Pano twifundanga mukanda wa mu Bible wa Danyele. Mu ino mweji iná yotwapwa kwifunda’o, mwene tumonanga muswelo wenda utamina’ko lwitabijo lwetu yenga ne yenga? I kyabine, tukomejanga lwitabijo lwetu, mwa kūminina pamo bwa Danyele, mupolofeto muswedibwe wa Yehova.

¹⁵ Yehova Witufundijanga mwa Kwikadila na Nsangaji: Twiepejanga ku kupepwa mutyima kyaba kyotutanga mutyima ku mbila ya Leza. Ne kadi nakampata, twimwenanga batwe bene būmi bwa nsangaji. Potulondanga buludiki bwa Yehova, twikalanga bengidi nandi mu mingilo yandi, ke ba kubandilapo bitupu, mhm! Boba bengila mingilo ya Leza bo bantu ba nsangaji.​—⁠1 Kod. 3:9; Yak. 1:⁠25.

¹⁶ Langa biyampe muswelo obwanya kwingidija byoivwananga ku kupwila kwa pa kipwilo. (Yoa. 13:17) Ingidila Leza na kininga, ne na mutyima obe onso. Nsangaji yobe ikamwangala ne kumwangala. Būmi bobe bukekala bupete, kadi bulumbuluke. Bine, ukamwena’mo.