Malondololo ku Bipangujo Byenu

◼ I kika kisakilwa bemvwaniki kutanga bisonekwa bibanena muneni kutanga mu kyandi kishinte?

Buvule bwa bisonekwa binenwanga bemvwaniki kutanga bulondanga mungya bintu bivule, kifwa mutwe wa mwanda mwine wisambilwa’po, ne shi mu kishinte mudi kubandaula vese ne vese wa kipindi kampanda kya mu Kinenwa kya Leza.

Tufwaninwe kuyuka amba buluji bumo butangilwanga bisonekwa i kubingija byobya byobanena amba bitamba mu Bible. (Bil. 17:11) Buluji bukwabo i kubandaula bubinga budi na Bisonekwa bubingija myanda yobanena ya kukomeja lwitabijo lwa bonso. Kwimwena byobya binenwe mu Bible kitatyi kitangwa kisonekwa kine kimanine’po mulangwe kuteñanga ñeni pabidi: na bitangwa ne na bimvwanikwa. Kutentekela pa kukimba bisonekwa, i kiyampe kadi kulemba ne kulonda senene mwenda mwilondela milangwe inenwa.

Nansha shi pa papye wa kulondela’po uletele Sosiete i balete’po Bisonekwa bivule, yuka amba kyobiletelwanga i kukwasha muneni, amone mwa kuteakenya biyampe kishinte. Bimo bibwanya kushintulula’tu mwikadile mwanda’wa, pakwabo i bya kumukwasha’tu ayuke misoñanya mine ya mu Bisonekwa yowimanine’po, evwanije ne mwa kukatandabwila’o. Muneni ye wa kuyuka i bisonekwa’ka bibwanya kumukwasha mu butandabudi bwandi bwa kishinte byafwaninwe kunena bemvwaniki bamulonde patanga’byo ne pashintulula’byo. Byobi bikwabo bya kukoma nabyo mwanda ubwanya kwibitanga nansha kulombola’tu mobinenena, ino ke kunenapo amba enka poso ne bemvwaniki nabo bebitange.

Muneni shi katange bisonekwa bisañwinwe, ufwaninwe kutanga’byo mu Bible, ke pa mapapyepo pobitentwilwe mu kompyuta. Shi muneni kanena bemvwaniki amba tutangei mukanda kampanda wa mu Bible, ufwaninwe kutela’o biyampe shē bitelekwa, ne shapita mine, ne vese nansha mavese. Kwishinkija bityetye kumeso kwa kwipangula kipangujo nansha kwa kushintulula mu kīpi kine kisomenwa bilembwa kushilanga bemvwaniki kyaba kya kukimba kisonekwa. Kupituluka mu kisonekwa kyotela kukakwasha bemvwaniki bavuluke kwa kwikitana. Inoko ke biyampepo kutela pa paje pene padi bitangwa, mwanda bilondanga mungya bwalamuni bwa Bible bwingidija muntu ne muntu mu bemvwaniki. Kutanga bisonekwa panena muneni amba tutangei kisonekwa kampanda kukwashanga bemvwaniki bamwene kamweno mu bukomo bwa Kinenwa kya Leza pokishintululwa mu kishinte.​—⁠Bah. 4:⁠12.