Kuningilwa ne Madyese Obe a Kusapula
1 Kuningilwa kudi na lupusa lukatampe—ku bintu biyampe nansha ku bintu bibi. Bengidi netu botwingidila nabo Yehova baletanga kifwa kiyampe kitusombela ku mingilo milumbuluke ya bwine Kidishitu. (Bah. 10:24) Inoko, ba mu kisaka bambulwa kwikala Batumoni, botwingila nabo, botufunda nabo ku masomo, bekalwa-nabo, nansha bakwabo botwiyukile nabo babwanya kwituningila tulonde mwiendelejo ujilula misoñanya ya bwine Kidishitu. Babwanya kunena bintu bya kufutulula “mwikadilo [wetu] mulumbuluke wa mudi Kidishitu.” (1 Pet. 3:16) Ino i muswelo’ka otukokeja kulama kusumininwa kwetu kwa kwendelela na kusapula nansha shi kudi kuningilwa kubi?
2 Ba mu Kisaka: Kyaba kimo, mulume kadi shabana ke Kamonipo wa Yehova ubwanya kwikala kasakepo wandi mukaji nansha bana kutambila mu mwingilo wa busapudi. Kino kyo kintu kyadi mu kisaka kimo mu Mexike. Mukaja mukelenge umo watwelele mu bubinebine ne bandi bana basamba-babidi. Dibajinji kaitabijepo, mwanda kadipo usaka ba mu kyandi kisaka benda basapula, babanya ne mabuku esambila pa Bible ku njibo ne njibo. Amba i kwipwa bulēme. Inoko mukajandi ne bana bandi basumininwe na mulangwe wabo wa kwingidila Yehova ne kutambila kitatyi ne kitatyi mu mwingilo. Mwenda mafuku, uno mukelenge washilula kumona mvubu ya kwitabija ino mpango ya Leza ya mwingilo wa busapudi, ku mfulo nandi wepāna kudi Yehova. Wapwile myaka 15 mituntulu kumeso kwa kwitabija bubinebine, ino le waswile kwitabija namani shi byadi amba ba mu kyandi kisaka kebaumininepo mu madyese a kusapula ebapelwe?—Luka 1:74; 1 Kod. 7:16.
3 Bengidi Nobe: Bengidi nobe bamo kebakasangelapo bukomo bolonga bwa kwibasapwila. Kaka umo usekununa amba difuku dimo, lupata lwashilwile pangala pa mfulo ya ntanda mu bilo, bakwabo bamufutulula pa kwibanena amba tangai Mateo 24. Ino kupwa kwa mafuku matyetye, umo umbukata mwabo waiya kumulombola amba wakatangile uno shapita, wamutulumuna mpata. Kaka wamupa dibuku, bakwata ne mpangiko ya kwifunda nabo Bible, aye ne mulumyandi. Kifundwa kibajinji kyaijije kintu kya nsā 2 lubanga. Kupwa kwifunda nabo musunsa wa busatu, bashilula kupwila; kepaijijepo, baleka ne mfwanka yobadi batoma, bashilula ne kutambila mu mwingilo. Shi uno kaka kalongelepo bukomo bwa kwibasapwila lukulupilo lwandi, le kino kyadi kya kulongeka binebine?
4 Bomufunda Nabo: Ke kyenipo kumona Batumoni bankasampe baningilwa ku masomo, batyina bakwabo amba bakebafutulula mwanda wa mwingilo wa busapudi obengila. Nsongwakaji umo mwine Kidishitu wa mu Etats-Unis wanene amba: “Nadi nekaka kupāna bukamoni ku bakwetu kutyina amba bakanzawila.” Enka namino wajimija mikenga ya kusapwila bakwabo badi bamuningila ku masomo ne mu mwaba. I muswelo’ka obwanya kukomena kuningilwa? Kulupila mudi Yehova, ukimbe kwitabijibwa na aye. (Nk. 29:25) Yuka kwitemba bwino bodi nabo bwa kwingidija Kinenwa kya Leza mu obe mwingilo. (2 Tem. 2:15) Nsongwakaji unene bidi kungala’bi washilwile kulombela kudi Yehova amba amukwashe atamije kusaka kwandi kwa kwisamba na bobafunda nabo. Washilula kusapula busapudi bwa kiponka na ponka ku masomo, nabo bwamwitaba biyampe, washilwididila kwisamba na bonso baadi wiyukile nabo. Ku mfulo unena’mba: “Boba bankasampe basakilwa kwikala na lukulupilo lwa būmi bwiya kumeso, i bine Yehova witwingidijanga mwanda wa twibakwashe.”
5 Bekalwa-Nabo: Bekalwa-netu nansha bantu bakwabo botwiyukile nabo babwanya kufitwa pa kwitumona motwikadile ne mwikadile nkulupilo yetu. Shi utyinanga byobakulangila, wiipangule amba: ‘Lelo bayukile bubinebine butwala ku būmi bwa nyeke? Le nonge bika ntenge mityima yabo?’ Mutadi umo wa kipindi wanene amba bipa bilumbuluke kebibulwangapo kulupuka’ko shi usapwila bakwenu pa nsapwidilo. Lomba Yehova akupe bukomo bukufwaninwe ne tunangu twa kwendelela na kukimba boba ba mityima myoloke.—Fid. 4:13.
6 Kwitabija byobetuningila kubwanya kusangaja bakinkwa netu, ino shi tulonge namino i kamweno kabo’ni, nansha i kamweno ketu? Yesu wādi ulondwalondwa na bantu ba mu kibundi kyabo. Utyumwina mu manwi binenwa bisansa mutyima byādi bimushimika banababo ba munda mwa inandi. Ino wādi uyukile amba kwibakwasha i kwikala nyeke mwimanije mu dishinda dyādi dimunene Leza kunangila’mo. Enka nenki, Yesu “wakankamene namino, ponka pa kufutululwa na babipya-mambo” bādi batapa madyese mpete. (Bah. 12:2, 3) Netu tufwaninwe kulongela monka. Endelela na kukwata na makasa abidi ano obe madyese a kusapula musapu wa Bulopwe. Wivwane “ulonge namino, ukepandija abe mwine, ne boba bakwivwananga bene kumo.”—1 Tem. 4:16, NW.