Masomo a Mwingilo wa Kiteokratike a mu 2001
1 Kudi bintu bivule bimanine pa Bisonekwa bilombola buluji bufwaninwe umo ne umo umbukata mwetu kwipānina byabinebine mu kupityija bipindi ku Masomo a Mwingilo wa Kiteokratike.—Nk. 15:23; Mat. 28:19, 20; Bil. 15:32; 1 Tem. 4:12, 13; 2 Tem. 2:2; 1 Pet. 3:15.
2 Ke myaka mivule, mpangiko ya butangi bwa Bible bwa ku yenga ne yenga ilondwa’nka kulondwa bu kintu kikatampe ku ano masomo. Ino mpangiko ilomba kutanga kipindi kisenselela ku paje umo difuku ne difuku. Kushilwila pa uno mwaka, i kutūlwe mpangiko ya butangi bwa Bible mu yenga ulongwa’mo kupituluka kwa Kwandika. Butangi bwa ntentekelo bwa Bible bwatūdilwe ku mpangiko mu myaka isatu yapityile’i pano bwapwile. Ino shi usangela kutanga bivule kupita pa bitandikilwe ku mpangiko, ubwanya kwitūdila’ko kino kitungo abe mwine mu yobe mpangiko.
3 Mwisambo wa No. 2 ufundijanga banabetu ‘kutanga ku meso a bantu’ Kinenwa kya Leza. (1 Tem. 4:13) Shi ubapebwa kipindi kya kutanga, pituluka’mo divule na diwi ditunduke. Ingidija mabande a Sosiete mwanda wa kulumbulula mutelelo wa bishima, muleulwilo wa diwi ne bintu bikwabo bineñenyanga butangi.
4 Mwisambo wa No. 3 ne wa No. 4 wimanine pa dibuku Comment raisonner, dyalupwidilwe kwingidija’dyo mu mwingilo wa budimi. Shi myanda ikupelwe mu mwisambo i mivule ikoma kwiipwa mu kitatyi kikutungīlwe, tonga enka yoya ibwanya kukwasha mpata bantu ba mu mwaba udi’mo kyenu kipwilo. Kifuko kyo-kyonso kishilwilwa’po mīsambo kikwatañene na wenu mwaba mubwanya kulondela’po.
5 Longa bukomo bobe pa nongelo upityije biyampe bipindi byonso bikupebwa ku masomo. Witūdile’ko kitatyi kya kwiteakanya senene, mwa kukanenena bintu bitamba ku mutyima. Ukekala nsulo ya kukankamika kipwilo, kadi ukamwena’mo pokapityija na mutyima onso bipindi ku Masomo a Mwingilo wa Kiteokratike akafundwa mu 2001.