Bubine Butala pa Mafuku a Kumeso
Le kodi mwiipangule bintu bitutengēle mu mafuku a kumeso? Bible ulombola binkumenkume bikatampe bitutengēle bisa kufikila bantu bonso pano pa ntanda.
Yesu wālombwele muswelo otubwanya kuyuka shi “Bulopwe bwa Leza kebudi pabwipi.” (Luka 21:31) Wālaile amba, kutentekela pa bintu bikwabo, kukekala mavita makatampe, kutenkana kukatampe kwa ntanda, bimpengele bya nzala, ne bipupo bya misongo—bintu bine byotwimwena dyalelo.—Luka 21:10-17.
Kadi Bible ulombola monka’mba “mafuku a mfulo” a buludiki bwa bantu akayukena ku muswelo wikele bantu, ko kunena’mba bantu ba mwiendelejo mubi. Ubwanya kutanga ino myanda mu 2 Temote 3:1-5. Kitatyi kyomona dyalelo ngikadilo ne bilongwa bitelelwe’mo, bine witabijanga’mba buno bupolofeto bwa mu Bible bukwatañene na bintu bilongeka dyalelo.
Le kino kishintulula bika? Kishintulula’mba kitatyi kibafwena kya Bulopwe bwa Leza kulumbulula būmi pano pa ntanda. (Luka 21:36) Mu Bible, Leza i mulae’mo bintu biyampe bitala ino ntanda ne bantu bakekala’po. Tala’tu bidi bimfwa bityetye.
BULEDI BUYAMPE
“[Yesu] wapebwa buledi, bulēme, ne bulopwe, amba bantu, ne mizo, ne ndimi bamwingidile abo bonso. Buledi bwandi i buledi bwa nyeke, kebukapitepo, bulopwe bwandi nabo kebukonakanibwapo.”—DANYELE 7:14.
Mobishintulwila: Ubwanya kukasangela būmi mu buludiki bukatampe butūdile’ko Leza, bwine bukaludika wandi Mwana bu Mulopwe.
BUKOMO BUYAMPE BWA NGITU
“I kutupu mwikadi ukanena’mba: ‘Nabela.’”—ISAYA 33:24.
Mobishintulwila: Kukabelapo nansha dimo nansha kulemana, ukekala’ko nyeke pampikwa kufwa.
NDOE YA BINEBINE
“Wafudija mavita konsokonso pano pa ntanda.”—ÑIMBO YA MITŌTO 46:9.
Mobishintulwila: Kekukekalapo monka divita ne masusu onso alupuka’ko.
NTANDA IKAYULA BANTU BAYAMPE
“Babi kebakekala’kopo monka . . . Betyepeje bakapyananga ntanda.”—ÑIMBO YA MITŌTO 37:10, 11.
Mobishintulwila: Bantu babi kebakekala’kopo monka, kukekala’nka bantu ba mutyima wa kukōkela Leza.
NTANDA YONSO IKEKALA KE PALADISA
“Bakobakanga mobo ne kwikala’mo, kadi bakadimanga madimi a mañanza ne kudya bipa byao.”—ISAYA 65:21, 22.
Mobishintulwila: Ntanda yonso ikalumbuluka. Leza ukalondolola milombelo yotulomba kiswa-mutyima kyandi kilongeke “pano pa ntanda.”—Mateo 6:10.