Mwa Kunekenyenya Bakwetu
1 Mutumibwa Polo wādi mutumbe amba i mwingidi muyuke kunekenya bantu. (Bil. 19:26) Nansha ke Mulopwe Akidipa wāmunene’byo amba: ‘Kubashala patye’tu longa ubaunekenya kwikala mwine Kidishitu.’ (Bil. 26:28) I kika kyālengeje busapudi bwa Polo bwikale kunekenya bakwabo nabya? I kino, wādi ulanguluka na bantu pa Bisonekwa mu muswelo muluji, ulondeja milangwe yandi pangya bemvwaniki bandi.—Bil. 28:23.
2 Netu tufwaninwe kuyuka kunekenya bantu mu mwingilo wetu pamo bwa Polo. Namani? Na kwingidija bujinguludi kitatyi kyotwisamba nabo ne kyotwibateja. (Nk. 16:23) Kudi bintu bisatu bibwanya kwitukwasha tuyuke kunekenya bantu.
3 Kuteja Biyampe: Shi mwisambi nobe unena, muteje, mwa kuyukila mwanda kampanda omwitabije banwe bonso okokeja kushilwila’po mīsambo. Shi wapele kwisamba nobe, tompa kunañuna i kika kyamulengeja apele. Kino kikakukwasha uyuke i bika byakulupile, mwanda waka wibikulupile, ne i bika byamunekenye etabije’byo. (Nk. 18:13) Kupwa momone’mo na bwino.
4 Ipangula Bipangujo: Shi muntu ukulupile mu Busatu-Busantu, ubwanya kumwipangula’mba: “Lelo ukulupile tamba kalā mu Busatu-Busantu?” Bweja’ko amba: “Le kodi ne mwifunde senene bintu binena Bible pa uno mwanda?” Kadi ubwanya kumwipangula’mba: “Shi Leza wadi amba i umo wa mu Busatu-Busantu, mwene longa Bible i mwibinene patōka?” Malondololo akakulondolola akakukwasha ulanguluke nandi mungya munenena’po Bisonekwa.
5 Kwikala na Mulangulukilo Muyampe: Kamoni umo waipangwile mwana-mukaji wadi ukulupile amba Yesu nandi i Leza, amba: ‘Shi usaka kuleta kifwa kilombola amba bantu babidi badi pamo, lelo mu kisaka ubwanya kwibatela amba i ba ani ne ani?’ Nandi amba: “Nkebatela bu ba mwanabo na mwanabo.” Kupwa mwanetu wabweja’ko amba: “Padi nansha bu ba mapasa. Ino Yesu byāetufundije amba Leza ye Tata, kupwa wetela aye mwine amba ye Mwana, i bika byaādi usaka kwitufundija?” Ku mfulo mwana-mukaji waboya’po ñeni, amba kudi umo mutame kadi udi na lupusa kutabuka mukwabo. (Mat. 20:23; Yoa. 14:28; 20:17) Ñeni ne mutyima wandi byatengwa na bwino bwa kuyuka kunekenya bantu bwadi na uno mwanetu.
6 Eyo, ke bonsopo betabijanga bubinebine, nansha shi musapwilo wetu i muluji ne wabinebine muswelo’ka. Inoko, twingilei na kininga pamo bwa Polo mu kukimba bantu ba mityima myoloke mu wetu mwaba, twibanekenye nabo betabije musapu wa Bulopwe.—Bil. 19:8.