Yukanyai Dijina dya Yehova ne Bilongwa Byandi

¹ “Fwijai Yehova, mwitei pa dijina dyandi; yūkijai bilongwa byandi umbukata mwa bantu. . . . Mityima ya boba bakimbanga Yehova īsepelele.” (Mit. 105:​1, 3) Mulembi wa mitōto wālembele bino bishima wāmwenene nsangaji mu kuyukija bakwabo Yehova ne “bilongwa” byandi. Le i bilongwa’ka? I bilongwa bimanine pa bulopwe bwa ntumbo bwa Leza ne pa “myanda miyampe ya lupandilo kupityila kudi aye.”​—⁠Mit. 96:​2, 3; 145:​11, 12, NW.

² Byafwena kitatyi kya Kivulukilo kya mu 2001, tudi na bubinga buvule bwa kusangela bilongwa bitulongela Yehova. Muswelo’ka? Ku bene Kidishitu babine bonsololo, Bidibwa bya ku Kyolwa bya Mfumwetu kyo kitatyi kikatampe mpata kya kuvuluka, kekudipo widilwe kino. I kutupu kitatyi kikwabo kitabukile kino ku mvubu, ku kitungo ne ku mulongelo okilongwa mwine. Kino kyo kitatyi kya kuvuluka bintu bitulongele Yehova ne Yesu mwanda wa kwitushitwila dishinda dya lupandilo. O mwanda, mu kitatyi kya Kivulukilo, tutengele kukatūtyikila mu mwingilo wa budimi, twenda tuyukija bantu “myanda miyampe ya lupandilo”!

³ Le Usa Kwingila bu Pania Mukwashi? Mu Kweji wa 4 wa mwaka wadi’mo’u, kwadi kibalwa kikatampe kya banabetu 7 644 baingile bu bapania bakwashi mu Congo-Kinshasa ne 556 mu Congo-Brazzaville. Lelo uno mwaka nao tubulwe’po kutūla Kweji wa 3 ne wa 4 bu myeji ya pa bula ya kulundila’ko mwingilo wetu? Mu Kweji wa 3 mudi dya Mposo misunsa itano, mu Kweji wa 4 namo dya Yenga misunsa itano. Basapudi bavule bengila twaji twa nshikije-dyuba bamonanga amba nabo babwanya kwingila bu bapania bakwashi shi betungila’ko kitungo kya kusapula dyuba dyonso dituntulu mu dya Mposo ne mu dya Yenga. Pa kusaka kufikila pa kibalwa kya nsaa 50 ku kweji, pania mukwashi ufwaninwe kubwanya kintu kya nsaa 12 ku yenga. Bandaula senene mpangiko yobetupele ya kulondela’po idi mu kapango kadi pa paje 4. Lelo ubamone’po imo ikwatañene biyampe na ngikadilo yodi’mo? Shi i patupu’yo, ubwanya kwitūdila’ko mpangiko ya abe mwine ya bu pania mukwashi mu Kweji wa 3 ne wa 4.

⁴ Bakulumpe bafwaninwe kwalwila’ko kukankamika ne kukwatakanya bakwabo nabo bamone kulundila’ko mwingilo wabo. Mu Kweji wa 4 wa mwaka wapityile’u, mu kipwilo kimo bakulumpe bonso ne bengidi ba mingilo badingile mafomu a bupania, ku mfulo basapudi 64 batuntulu baingila bu bapania mu basapudi 121! Kadi basangele mpata pa kumona basapudi basamba bakubulwa kubatyijibwa bashilula kutūla lapolo mu Kweji wa 3 ne wa 4. Na bubine, kino kyo kitatyi kilumbuluke ku bankasampe ne bapya kwipangula bakulumpe shi i babwanye bisakibwa bya kutambila mu mwingilo wa kusapula bukamoni.

⁵ Kwielela’ko Kuletanga Madyese: Bipwilo bitungilanga’ko bitungo bya pa bula, kadi bielela’ko byeselwanga madyese mavule. Bipwilo bimo bikaninanga bidi kusambakanya myaba yabyo isapulwanga’mo na dimodimo, kupityila ku miswelo mishileshile ya busapudi, pakwabo bīpāna bininge mu busapudi bwa ku telefone​—⁠muswelo mulumbuluke wa kwisamba na boba kebatanwapo ku mobo ne bantu kebadi mwa kwitanina nabo.

⁶ Lelo kubelabela nansha bununu bibwanya kuzozeja mwanetu akomenwe kwipāna mpata mu uno mwingilo? Mhm! Mwanda kaka umo wa myaka 86, kadi ubela dyaya kazozelepo. Mukaji nobe, nansha byadi na maulu mamuyule bā, waingile bu pania mukwashi mu Kweji wa 4 mwaka wapityile’u. Busapudi bwaadi usapula ku telefone bo bwalengeje asapule kitatyi kivule mu mwingilo, wavudija mitendelo yandi kudi Yehova. Kino kyakankamikile uno kaka ne kipwilo kine kumo.

⁷ Witeakanye Senene Mwanda wa Kivulukilo: Uno mwaka Kivulukilo kikaponena mu mafuku 8 Kweji wa 4. Byodikekala dya Yenga, bavule kebakakolelwapo kutanwa’ko. Kubwanya kukatanwa bantu bavule kupita myaka yonso enka shi tulonge’mo kyetu kipindi (1) na kutanwa’ko bidi batwe bene (2) ne na kwita bakwetu nabo bāye tutanwe nabo ku Kivulukilo. Le i bāni botuketa’ko?

⁸ Tala majina ku mapapye kolembanga bantu botananga mu mingilo ya budimi basangelanga bubinebine, nansha shi kwibapempulangapo kitatyi ne kitatyi. Shi kubashala mayenga abidi nansha asatu kumeso kwa Kivulukilo, wipāne mu kupempula bano bonso, wenda wibapa tukanda twa lwito lwa kwibeta ku Kivulukilo. Shi udi na muswelo, kwasha boba bakimba kutanwa’ko na kadikuta ka kufutyila lwendo.

⁹ Mu bipwilo bimo, kebengidijangapo tukanda tonso twa lwito lwa ku Kivulukilo. Balembi ba pa bipwilo bafwaninwe kutadija mwanda wa tukanda twa lwito tupebwe banabetu kumeso kwa kitatyi mwa kwabena’to tonso. Mubwanya kulemba nansha kutampa nsaa ne kifuko kukalongelwa Kivulukilo kunshi kwa kakanda ka lwito. Mubwanya nansha kulamika’ko kakanda kalombola adelese ya Njibo ya Bulopwe, shi i ako kukalongelwa Kivulukilo. Pa kino, betuvuluja amba, divule i kipite buya kutambika bantu abo bene tukanda twa lwito lwa ku Kivulukilo.

¹⁰ Vulukai Boba Kebakisapulanga: Kisangajanga mpata shi muntu wifunda Bible wepāna kudi Yehova ne kulombola kino na kubatyijibwa mu mema. Ino mwaka ne mwaka, bamo umbukata mwetu balekanga kwilunga netu, ne kusapwila bakwabo dijina dya Yehova ne bilongwa byandi kwine. Bine tufwaninwe kwibata mutyima. Nansha bavule mu bano byokebalekelepo bubinebine, padi kyokebakisapwilanga i kuzoza pa mutyima, myanda ibatala, nansha bintu bikwabo bya umbūmi bibazumbijazumbija mutyima. (Mat. 13:​20-22) Bakwabo nabo badi na ngikadilo ya ku mushipiditu mizoze, o mwanda basakilwa bukwashi bwa kujokela mu kipwilo, kutyina amba bakaminwa na ngikadilo ya Satana. (1 Pet. 5:⁠8) Mu kino kitatyi kya Kivulukilo, tufwaninwe kwielela’ko byabinebine, tukwashe bonso babwenye bisakibwa ino kebakisapulanga, nabo banze kusapula monka myanda miyampe.

¹¹ Mulembi wa pa kipwilo ukalombola bendeji ba bifundwa bya kitabo mwanetu ye-yense wa mu kyabo kisumpi kakisapulanga. Komite wa Mingilo wa pa Kipwilo ukateakanya’ko bupempudi bwa bukumbi bwa kupempula bonso kebakisapulanga. Shi abamone amba i biyampe kwifunda nandi kifundwa kya Bible, komite wa mingilo ukatala i ani ufwaninwe kwendeja kine kifundwa’kya. Nansha kino kifundwa byokekilombepo kwija kitatyi kilampe, inoko yewa ukendeja’kyo ukalemba nsaa, kujokela’mo kupya, ne kifundwa kya Bible ku lapolo wandi.

¹² Mu Kweji wa 4 wa mwaka wapityile’u, kaka umo wadi wenda usapula ku njibo ne njibo, wapa nsongwalume umo mapepala mu kipito. Uno nsongwalume walombola kaka amba ngidi na mukaji Kamoni, inoko kakisapulangapo. Kupwa waipangula kaka kudi Njibo ya Bulopwe, wamunena ne kumunena amba āye ebatale, aye ne mukajandi. Ku mfulo bakatanwa ku kupwila, baitabija ne kifundwa kya Bible.

¹³ Witeakanye mwa Kulundila’ko Mingilo! Mulembi wa mitōto wānene amba tufwaninwe kuyukanya dijina dya Yehova ne bilongwa byandi wābwejeje’ko amba: “Mwimbilei, mwimbilei mitendelo; mwisambei mīngilo yandi yonso ya kutendelwa. [Mwitembei] dijina dyandi dikola.” (Mit. 105:​2, 3) Nanshi tulombolei amba tukambakenanga dijina dikatampe dya Yehova ne “mīngilo yandi yonso ya kutendelwa” na kwielela’ko mu mwingilo, mwanda wa kino kitatyi kya Kivulukilo kikale kya mvubu ya kashā!

[Kapango pa paje 4]

Miswelo Mishileshile Ibwanya Pania Mukwashi Kufikila pa Nsaa 12 ku Yenga

Difuku Nsaa

Dya Mwanzo 1 2 − −

Dya Bubidi 1 − 3 −

Dya Busatu 1 2 − 5

Dya Buná 1 − 3 −

Dya Butano 1 2 − −

Dya Mposo 5 4 3 5

Dya Yenga 2 2 3 2

Total: 12 12 12 12

Pa ino mpangiko pabulwe nansha imo ikwendekela? Shi keidi’popo, wabulwa’po kwitūdila’ko yobe?