Batwe Bonso Tulēmekei Yehova ne Mwanandi
Muswelo Ukokeja Bonso Bakatanwa ku Kivulukilo kya mu Mafuku 8 Kweji 4 Kumwena’mo Bikatampe
1 I bāni dyalelo bapebwanga bulēme bukatampe mpata? I boba balonga bintu bitendelwa na ino ntanda. Kyaba kivule, kepejangapo bantu bailwa kala bilongwa byabo. Ino bilongwa bimwena’mo bantu bonso nabyo le? Kilongwa kikatakata mu bino kyo kyotukata’ko mutyima mpata kitatyi kyotusa kutanwa ku Bidibwa bya ku Kyolwa bya Mfumwetu kupwa kupona kwa dyuba mu mafuku 8 Kweji 4, 2001.
2 Lelo i ani ufwaninwe kupebwa bulēme kupita bonso? Bible uleta kilondololwa’mba: “Abe ufwaninwe, Yehova wetu . . . kupebwa ntumbo, ne buleme ne bukomo; mwanda wapangile bintu byonsololo.” (Kus. 4:11) Yehova ye Umpangi, nanshi ye aye Mfumu Muludiki wa diulu ne ntanda. Kufwaninwa kwafwaninwe kulēmekwa kekukapupo nansha dimo!—1 Tem. 1:17.
3 Yesu Kidishitu, Mwanā Leza, nandi wālongele bilongwa bya mvubu mpata bikaletela bantu madyese akubulwa mpwilo. Wāiwile Shandi umbyonso. (Yoa. 5:19) Kikōkeji kyandi kyaendaenda ne mwingilo waādi wingila na mutyima umo byo byālengeje ekale mufwaninwe “kupebwa bukomo, ne bupeta ne ñeni, ne bulobo, ne buleme, ne ntumbo, ne katōkwe.” (Kus. 5:12) Shandi i mumupe bulēme pa kumubikika bu Mulopwe. (Mit. 2:6-8) Batwe netu tusa kumona mukenga wa kulēmeka Tata ne Mwana mwine pa kutanwa ku Bidibwa bya ku Kyolwa bya Mfumwetu mu mafuku 8 Kweji 4, 2001.
4 Ino i kya bulanda, mwanda bantu batyetye kete mu mānga ya muzo wa muntu bo bapele Yehova ne Mwanandi bulēme bobafwaninwe. Kyaba kimo, nansha ke Isalela mwine, muzo wa pa kala wa Yehova Leza, wādi umwingidila na nsengwa. Kano kādi kapuni kakatampe. (Mal. 1:6) Bulēme buyampe i bwa kwikala na kikōkeji kyabinebine kimanine pa buswe ne pa mutyima wa kufwija’ko Yehova ne wandi Mwana pangala pa byonso byobetulongēle. Kwibapa bulēme bwa uno muswelo kulombola amba tudi na kwakamwa ne kalēmo bya bwine Leza, ne amba tumwene mvubu idi na Yehova ne Yesu mu mashinda etu onso. Kipwilo kya bwine Kidishitu kielelanga’ko kufundija bantu bakwabo, kibakwasha nabo balongele monka.
5 Kitatyi kya pa Bula kya Kulombola Bulēme: Kivulukilo i kukongakana kukatampe mu kukongakana konso kwa bantu ba Yehova mwaka ne mwaka. Muntu yense udi na mutyima wa kwingidila ne kulēmeka Yehova ufwaninwe’nka kukatanwa’ko. (Luka 22:19) Tukulupile amba, kutalula’mo bidi Batumoni midiyo 6 basapula, bantu basangela musapu bakalengeja kibalwa kikale kupita pa midiyo 14 ya bantu. Bine, uno o mukenga mulumbuluke wa kupa Tata wetu wa mūlu bulēme! Nansha dino difuku byodimanine bininge padi Yesu, ino kalēmo ne bulēme byotukalombola pangala pa bintu byonso byaetulongēle bikatumbija Shandi wāmutumine.—Yoa. 5:23.
6 Le i bika byotukalonga mwa kukwatakenya uno mukenga wa pa bula? Tubwanya kukwasha bapya basangela musapu nabo bamwene’mo bininge. Wibakankamike bāye batanwe’ko, kadi shi kudi ukimba kukwashibwa mukwashe amone mwa kufikila’ko. Wibashintulwile kitungo kine kya kishinte kisa kwisambwa’ko. Wibayukanye ku banabetu bakwabo. Namino, byobamona ne byobemvwana bibwanya kwibapa mutyima wa kusaka kwilunga netu mu kulēmeka kotulēmeka Yehova.
7 Kokatyepeka lupusa ludi na ino mpangiko. Inivelesitele umo ulombola mwaamwenene’yo amba: “Kendi mudye Komonyo misunsa mivule mu kyetu kipwilo, ino bino byonamona i bishile kulampe. Namone amba bino bikwatañene senene na binena Bible, monangila banwe bo badi na bubinebine.” Ponka’po washilula kutanwa kitatyi ne kitatyi ku kupwila, kaijijepo ne kwija kwine wabatyijibwa.
8 Kwasha Bapya Nabo Bendelele Kumeso: Kwata majina a bapya baile kutanwa ku Kivulukilo, kupwa enda ukebapempule kinondanonda na kuno kupwila mukapituluke nabo mu bintu bikankamika byobafunda ne byobemwena. Wibayukije ne kupwila kukwabo kobakokeja kwiya kulundila’ko buyuki bwabo bwa mu Bible. Kubandaula nabo shapita wa 17 wa dibuku Buyuki, unena amba “Tana Mutyima-Ntenke Umbukata mwa Bantu ba Leza,” kukebakwasha bayuke muvudile bidibwa bya ku mushipiditu biletwa na kipwilo, bibasakilwa ne abo amba bāye badye. Kwata mpangiko ya kutala nabo bande wa video Our Whole Association of Brothers (Kisaka Kyetu Kyonso kya bu Bana na Bana) mwanda wa bemwene na meso bumo, nsangaji, ne bupyasakane bwa bantu ba Yehova!
9 I kya mvubu bantu basangela musapu befunde muswelo obakokeja umo ne umo kulombola kalēmo ne bulēme bwa kulēmeka Yehova. Wibashintulwile amba kulombela milombelo itamba ku mutyima kusangajanga Yehova kadi i nsulo ya bukankamane bwa ku mushipiditu bwaendaenda. (1 Yoa. 5:14) Ingidija kifundwa kya 8, 9, 10, 11 kutūla ne ku kya 12 mu mukanda Kisaka Leza, ulombole mwiendelejo upeja Yehova bulēme. Wisambile pa myanda inenwe mu mukanda Les Témoins de Jéhovah, pa paje 30-31, mwa kukankamikila bapya balanguluke pa mukenga wibapelwe wa kulēmeka Yehova na kutambila abo bene mu mwingilo wa busapudi.
10 Kufwija kotufwija’ko pangala pa kitapwa kya Yesu ne madyese otupelwe a kwingila kotwingila bu bandi bana-babwanga kupejanga Shandi bulēme kadi kuletelanga bakwetu madyese. Yesu wālaile amba: “Muntu wakuñingidila ami nankyo Tata ukamupanga buleme.”—Yoa. 12:26.