Kupēleja Musapwilo I Kulumbuluke
1 Mwanda waka basapudi bankasampe bavule bekalanga batalwa mu kanwa pululu na boba bobasapwilanga musapu wa Bulopwe? Buluji bumo i buno, mwisambilo wabo upēlanga. Basapudi bamo bakokeja kulanga amba pa kusaka kusapula biyampe kilomba kwikala mupotolole kunena byabinebine. Inoko myanda yoketudi bemwene ilombola amba musapwilo upēla, wimvwanikwa senene o mulumbuluke.
2 Yesu wādi usapula Bulopwe bwa Leza mu muswelo upēla, wisamba patōkelela, wāfundija ne bandi bana-babwanga nabo balongele monka. (Mat. 4:17; 10:5-7; Luka 10:1, 9) Wādi wingidija ntwelelo, bipangujo, ne byelekejo byampikwa kukutakana mwa kukokela milangwe ya bemvwaniki ne kutenga ku mityima yabo. (Yoa. 4:7-14) Netu tufwaninwe kwiula kifwa kyandi tuyuke kushilula na ntwelelo imvwanikwa bukidibukidi.
3 ‘Myanda miyampe ya bulopwe’ i musapu otufwaninwe kusapula. (Mat. 24:14) Kwingidija Bulopwe bu obe mutwe wa mwanda oimanine’po kukakukwasha wikale nyeke na musapwilo upēla. Wisambile pa myanda ikambakanya bemvwaniki bobe. Bana-bakaji baswile kwisambila pa myanda ya bisaka byabo kutabuka myanda ya politike. Mwanda wa bukidi ukambakanyanga shabana i mwanda wa kaji ne mwikadilo mulumbuluke wa kyandi kisaka. Bankasampe basenswe kwisambila pa būmi bwabo bwa kumeso; ino banunu pa myanda ya kwikala na bukomo bwa ngitu bulumbuluke ne mutyima-ntenke. Bantu batanga mutyima mpata ku bintu bipita mu yabo ntanda kupita’ko ku byobya bipita mu matanda a kulampe. Shi mubapu kwisambila pa myanda imusangaja banwe bonso, kokela milangwe ya mwisambi nobe pa madyese akeselwa bantu bakikōkeji mu buludiki bwa Umbikalo wa Leza. Bishima bibala-binga bipēla, bitongwe senene, kadi bikwatakanibwe na kisonekwa bibwanya kwikala bu muswelo mulumbuluke wa kulangula kusepelela kwa bemvwaniki bobe.
4 Ukokeja kushilula mwisambo na kunena amba:
◼ “Nalanga nobe uyukile biyampe amba muzo wa muntu i muponenwe na mba mivule keibeluka. Ino lelo uyukile amba Leza i mulaye kupwija panopano ponka misongo ya miswelo yonso ne lufu lwine kumo?” Muleke akulondolole, kupwa tangai Kusokwelwa 21:3, 4.
5 Bine, tenga ñeni ne mityima ya bantu badi mu wenu mwaba na ntwelelo imvwanikwa senene kadi ipēla, wibakwashe bayuke myanda itala padi Yehova ne pa kyepelo kitupelwe kya kukekala na būmi bwa nyeke.—Yoa. 17:3.