Le Ukokeja Kukengidila Kokwa Kusakibwa Bengidi Bavule?
1 Lelo kasha kodi mulange kuvilukila kuntu kusakibwa basapudi bavule ba Bulopwe? Shi abakwite ‘kwenda . . . kukakwasha’ kuntu kampanda, lelo uketabija mwāitabijije mutumibwa Polo? (Bil. 16:9, 10) Kudi bipwilo bivule bikimba bisaka bikomo ku mushipiditu, bapania ba kwibikwasha bisambakanye myaba yabyo, bakulumpe ne bengidi ba mingilo babwino ba kwibitangidila kumeso. Mwaba ukokeja kwikala na mikenza mityemitye mitolwele kulampe na kibundi kikatampe. Njibo ya Bulopwe imweka bu yo idi pabwipi ino pabwanya kwikala lwendo lulampe mpata. Padi i kutupu ne kaji ka ku ngitu kene ka kwingila’ko. Pakwabo padi kudi kyanga, mashika, ne mavula mapitepite. Mwene i kiyampe witeakanye ku ano makambakano? Ino le ukabwanya namani?
2 Bikimba Kwikala na Lwitabijo ne Kikulupiji: Abalama wāshile Ulu kibundi kyabo kaenda ku Halane kwāmulombwele Leza, lwendo lwa makilometele 1 000, aku ye mukaji ne mwanā mwanabo, ne shandi Tela mununu. (Ngal. 11:31, 32; Neh. 9:7) Kupwa kwa lufu lwa Tela, Yehova wāsoñanya Abalama, papo kadi na myaka 75, amba viluka mu Halane abe ne ba kyobe kisaka mwende konso konkakulombola. Abalama ne Salai pamo ne Lota “bataluka kwenda.” (Ngal. 12:1, 4, 5) Eyo, Abalama kāvilukilepo kwenda kukengidila kokwa kusakibwa bengidi bavule. Ino kuviluka kwandi kwādi kulomba kintu kampanda. Kintu’ka?
3 Kyādi kilomba ekale na lwitabijo ne kikulupiji pa kulonga kintu kya owa muswelo. Mulangilo wandi ne mwikadilo wandi wa umbūmi byādi bya kwalamuka. Wādi unenwe kushiya babutule bandi bādi bamwelele mu kyadi. Ino wākulupila mudi Yehova wa kumulama aye ne kipango kyandi. Ne dyalelo nadyo monka na monka, bavule bakulupilanga mudi Yehova mu uno muswelo.
4 Kutumwa kwa Mafuku Matyetye: Lelo kodi mwimwene madyese mavule atambanga ku kwingidila mu mwaba keudi na basapudi? Mwaka wapityile’u mu bipindi 48 bilondakane mwatenwe basapudi 5 699 basambakenye myaba 163 ya mu 174 keidi na basapudi. Basapudi bakwabo 5 676 bakakweshe bipwilo 380 byasambakanya myaba isapulwanga’mo na dimo dimo. Ku bamo kyebalombele kwenda ñendo milampe. Lelo buninge bobalongele bwadi na kamweno?
5 Tutu umo wa mu Kaliforni, waendele ku kibundi kya Utah, wasonekele amba: “Pobaunenene dibajinji kulomba kwenda kukengidila mu kisumpi kya mu mwaba usapulwanga’mo na dimo dimo, nadi bidi nekaka. Ino kupwa naitabija kutumwa. Nkyealakenye kasha amba naendele’ko bika, kadi kwenda konaendele’ko i kwalamune būmi bwami. Mfwijanga’ko Yehova difuku ne difuku pa kumpa madyese a kubadilwa mu bantu baendele.” Tutu mukwabo watambile mu Florida waenda mu Tenese nandi unena amba o mwanda umo wavulukanga mu myaka 20 yonso yakadi mulāle mu bubinebine! Nkasampe wa mu kibundi kya Connecticut wāendele mu Virjini wa Kushika unena amba: “Uno o mwanda mulumbuluke mu myanda yonso yokendi mwimwene mu būmi bwami!” Basapudi bavule betabijanga amba kwingidila kokwa kukimbwa basapudi bavule, nansha’tu mu kitatyi kityetye, kubaijanga mutyika obakwete nao mwingilo. Wisambe na boba ke bengile uno muswelo. Ukamona amba i balumbulule būmi bwabo bwa ku mushipiditu, kadi babila’nka ne kukewingila monka shi abamone mukenga mukwabo.
6 Kwitabija kukengidila kitatyi kityetye kokwa kusakibwa basapudi kukokeja kufikidija ne kitungo kikwabo. Boba balonga namino bakokeja kwikala na milangwe ibakwasha bayuke mwa ‘kupikwila lupeto’ shi kebasake kuvilukila ku kifuko kikwabo kya mu yabo ntanda.—Luka 14:28.
7 Yehova i mutyipe amba myanda miyampe ifwaninwe kusapulwa “panopantanda ponso” kumeso kwa mfulo kufika. (Mat. 24:14) Byowayuka kino, ne shi ubwanya, lelo ubulwe’po kwikala na mutyima wa kuvilukila kokwa kusakibwa bengidi bavule? Mwanda mu bifuko bivule i mutupu bengidi.
8 Kuvilukila Kokwa Kusakibwa Bengidi Bavule: Lelo kodi mutambule pasho? Lelo udi na musokwe mushikatyije senene? Shi kudipo nao, le kukokejapo kwikimbila kaji? Le ubwanya kwisasaketa kuntu ko-konso kokokeja kwenda? Shi abe kubwanyapo kuviluka, ubulwe’po kukwasha umo wa mu kisaka kyobe akengidile kuntu kukwabo?
9 Shi ubatūla uno mwanda mu milombelo, kupwa ubemone amba ubwanya kutundulukila kokwa kusakibwa bengidi bavule, mwisambei uno mwanda na kyenu kisaka ne na bakulumpe ba mu kyenu kipwilo. Kupwa teakanya mukanda ne kupa’o bakulumpe mwanda wa nabo balombole mobakumwenene ne kuyukanibwa kobe kumeso kwa kutuma mukanda ku musambo.
10 I bintu’ka byokalemba mu obe mukanda? I bino: Yobe myaka, mafuku a kubatyijibwa, madyese odi nao mu kipwilo, myanda ya busongi, ne shi udi na mwana mutyetye olelele. Tela ne majina a matanda osaka kukengidila’mo, kukwatañana na bisakibwa byobe. Kifwa, lelo ukokeja kushikata kokwa kudi kyanga ne kinyanjinyanji? Lelo ukokeja kūminina mashika a bushipo? Lelo ukokeja kwikala mu bibundi bya mitenta milampe? Lelo uyukile kwisamba ndimi kampanda ya bweni?
11 Le udi na bupyasakane ne milangwe ya kwilongela bintu abe mwine? Lelo ngikadilo yobe ikokeja kukupa kyaba kya kwenda kukengidila kokwa kusakibwa bengidi bavule? Shi i amo, nabya ukemwena madyese a endaenda apungulwilanga Yehova pa boba bakulupile mwadi ponso pobalombolanga mushipiditu wa kwipāna!—Mit. 34:8; Mal. 3:10.