Lelo Mudīlo Obe wa ku Mushipiditu Ukwikutyijanga?

¹ Bantu banenanga nyeke amba ‘kudya ne kutoma i kwita ngitu.’ I amo, lukupa lotudi nalo mu ngitu ne bukomo bwa ngitu bilondanga mungya mudīlo wetu. O mwanda Yesu wānene amba: “Muntu nanshi kakamwenapo būmi mu mikate yonka, mhm, poso mu myanda yonso ītamba mu kyakanwa kya Mwine Leza,” ko kunena amba mudīlo wetu wa ku mushipiditu ubwanya kwitufikija kuyampe nansha kubi. (Mat. 4:⁠4) Shi ke pano, lelo mudīlo obe wa ku mushipiditu ukwikutyijanga’ni? Nansha wifitanga nzala? Lelo udyanga pamo bwa abe obapanga’ni? Nansha witūdile’ko kitatyi kya kudya pa ndīlo kyaba ne kyaba bidibwa bya ku mushipiditu bita ngitu?

² Bandaula Mudīlo Obe: Yehova witulotwelanga nyeke “bidibwa pa kitatyi kifwaninwe,” witusobela “masobo a bintu binune” kupityila kudi “umpika wabinebine ne wamanwa.” (Mat. 24:​45, NW; Is. 25:⁠6) Pa kumwena bininge mu ino mpangiko miyampe namino, tufwaninwe kulonga bukomo bwa kudya mudīlo witwikutyija bidibwa bya ku mushipiditu.

³ Ufwaninwe kwiipangula’mba: ‘Lelo ntañanga kisonekwa kya difuku ne nshintulwilo yakyo difuku ne difuku? Le ntañanga Bible difuku ne difuku ne kulanguluka’po? Lelo nteakanyanga kupwila kwa pa kipwilo na kwifunda myanda yonso kumeso kwa kitatyi? Le kendi mutange mabuku etu atambile panopano onso matuntulu, kubadila’mo ne mavolime onso abidi a dibuku Bupolofeto bwa Isaya​—⁠Mwinya ku Bantu Bonso (Falanse)?’

⁴ Yesu wālaile amba: “Kebo ba nsangaji shabo boba beyukile bisakibwa byabo bya ku mushipiditu,” (NW) kupwa’mba: “Dyese dyo dyabo kadi boba bābilanga boloke’nka bwa nzala ne kyumwa, nabo bakekutangapo.” (Mat. 5:​3, 6) Shi ke pano, ikala na mudīlo muyampe wa ku mushipiditu wa kwikutyija mutyima obe ne ñeni yobe na buyuki bwa kwa Leza.