Lwitabijo Lwetu Lwitutonwenanga ku Mingilo Milumbuluke
1 Lwitabijo lwālengeje Noa, Mosesa, ne Lehaba bengile mingilo. Noa wāpopele safini. Mosesa wāleka būmi bwa maloa bwādi mu kipango kya Felo. Lehaba wāfya tubedibedi, wālonda ne byobāmunene, enka namino wāpandija kipango kyabo. (Bah. 11:7, 24-26, 31) Le i mingilo’ka milumguluke ya kwingila itutonwena’ko lwitabijo lwetu dyalelo?
2 Kusapula: Lwitabijo lwitutononanga twisambile padi Leza wetu wa kutendelwa ne pa mpango yakwete ya kupāna būmi bwa nyeke bwa nsangaji. (2 Kod. 4:13) Kyaba kimo, tubwanya kwikaka kusapula. Ino shi ‘tutūle Yehova kumeso etu nyeke,’ tukakankamikwa kadi ketukatyinapo kintu. (Mit. 16:8) Ne kadi lwitabijo lwetu luketutonona tusapule myanda miyampe ku babutule betu, ku botwingila nabo, ku botufunda nabo, ne ku bakwabo ponso potumona mikenga.—Loma 1:14-16.
3 Kupwidila Pamo: Kutanwa nyeke ku kupwila i mwingilo mukwabo mulumbuluke ulupuka ku lwitabijo. Mwanda waka tunena namino? Mwanda kulombolanga kikulupiji kyotukulupile amba potukongakenanga pamo ku kupwila kwa bwine Kidishitu, Yesu wikalanga netu kupityila ku mushipiditu sandu wa Leza. (Mat. 18:20) Kulombolanga kwabila kotwabilanga ‘kwivwana kinena mushipiditu ku bipwilo.’ (Kus. 3:6) Tukwete na makasa abidi bufundiji botufundijibwanga’ko, mwanda meso etu a lwitabijo etulombolanga amba mwine witufundija i Mufundiji wetu Mukatakata, Yehova.—Is. 30:20.
4 Butongi Botutonga: Kikulupiji kikatampe kyotukulupile mu bintu byakubulwa kumweka kitutononanga tutūle bintu bya ku mushipiditu pa kifuko kibajinji mu būmi bwetu. (Bah. 11:1) Pakwabo kino kilomba ne kwibudija bintu bya ku ngitu. Kifwa, mukulumpe umo wāpelele kaji ka lupeto luvule kobāmupele, mwanda wādi uyukile amba kakamubudija kupwila, kakamwikadija kulampe na kyandi kisaka, ne kakamwipaila mwingilo wandi wa bupania. Nanshi netu tutūlei kikulupiji kyetu kyonso mu binenwa bya Bible bitukulupija amba Yehova ukakwasha boba babadikila “bidi kusaka bulopwe bwa Leza, ne boloke bwandi.”—Mat. 6:33.
5 Lupusa lukatampe ludi na lwetu lwitabijo mu būmi bwetu kelubulwangapo kumweka ku bantu bakwabo. Bine, lwitabijo lwetu i luyukane ntanda yonso. (Loma 1:8) Shi ke pano, batwe bonso tulombolei na mingilo yetu milumbuluke amba lwitabijo lwetu i lūmi.—Yak. 2:26.