Loelelwai na Byomudi Nabyo
1 Bisonekwa bitusoñanya kukimbila bipango byetu bintu bya ku ngitu, inoko būmi bwetu kebufwaninwepo kwimanina pa abyo. Bintu bya ku mushipiditu byo bya kutūla pa kifuko kibajinji. (Mat. 6:33; 1 Tem. 5:8) Kwikala’po na bujalale i bulwi bukatampe mu ino “myaka ya malwa.” (2 Tem. 3:1) I kika kibwanya kwitukwasha pa kino?
2 Mona Bintu Mumwena’byo Bible: Kinenwa kya Leza kitudyumuna amba kulondalonda bupeta kubwanya kufikija muntu ku musala. (Mus. 5:10; Mat. 13:22; 1 Tem. 6:9, 10) Mu ino myaka ya malwa, wivwane umo umbukata mwetu, shi ani shi ani, epāne’nka mu kaji ka ku ngitu nansha mu kukalakala na kukimba lupeto, wasūla ne bintu bya ku mushipiditu—kupwila, kifundwa, ne mingilo—mu būmi bwandi, bine yao wetūla mu kyakanwa kya lufu. (Luka 21:34-36) Bible aye witudingila’mba: “Byo tudi ne bidibwa, ne bivwalwa, e nabyako bidi, tuloelelwe monka.”—1 Tem. 6:7, 8.
3 Kino kekishintululapo amba bene Kidishitu bafwaninwe kwikala mu bulanda bwa kwisakila abo bene. Ino kitupa ñeni ya kuyuka bisakibwa byetu bya ku ngitu binebine i byepi—bidibwa, bivwalwa, ne njibo mwa kwikala. Shi tudi kala na bino bisakibwa, kekudipo kyotukambakena na kwipeneneka na kukimba būmi bwa bukelenge. Kumeso kwa kusaka kupota kakituntwa kampanda nansha kukimbila’ko kaji ka ntentekelo, tufwaninwe bidi kwiipangula’mba: ‘Lelo ako kano kadi na mvubu binebine?’ Kwibandaula namino kuketukwasha tulonde madingi a ku bukomo bwa mushipiditu anena’mba: “Ngikadilo yenu keikikalai ya kusanswa lupeto. [Loelelw]ai ne byo mudi nabyo.”—Bah. 13:5, MB.
4 Shi tukulupile mudi Yehova, uketwesela madyese. (Nk. 3:5, 6) Eyo, nansha byotwingilanga na kininga mwanda wa kusokola bya kwikwasha nabyo difuku ne difuku, ino būmi bwetu kebwimaninepo pa bino bintu. Twikale na bityetye nansha na bivule, batwe tukulupile mudi Yehova wa kwitupa byotubudilwe. (Fid. 4:11-13) O mwanda tusangelanga kuloelelwa kwitupa Leza ne madyese makwabo mavule aetwesela.
5 Iulai Lwitabijo lwa Bakwabo: Kaka umo wadi ulela kasuku kandi wandi mwana mwana-mukaji mu bubinebine wapēleje būmi bwandi bityebitye. Nansha byaadi na būmi bwa dyangi mu njibo yandi, wavilukīle mu kajibo katyetye, kupwa ke mu kyumba kimo. Kino kyamupele muswelo wa kutyepeja’ko nsaa ya kaji mwa kushila’ko kyaba kya kwipāna bininge mu mwingilo. Wandi mwana pa kutama, wasongwa, inandi walomba pasho, nansha kino byokyadi kishintulula kutyibwa lupeto luvule lwa pasho yandi. Uno kaka pano kadi mu mwaka wandi wa busamba-bubidi mu bupania bwalonso, kadi kealakanyangapo pa bintu bya ku ngitu byaebudije pa kutūla tumweno twa Bulopwe pa kifuko kibajinji mu būmi bwandi.
6 Mukulumpe umo ne wandi mukaji ke bengile myaka mivule abo kadi koku na bana basatu. Abo bonso kisaka kituntulu befundile kwisasaketa abo bene, bekimbila bisakibwa byabo kupita’ko kukimba byobabila. Uno tutu unena’mba: “Twielelanga’ko kwikala na būmi bupēla. Nansha byotutanwanga bitatyi bimo na bikoleja, Yehova witupanga nyeke byobya byotubudilwe. . . . Pomonanga muswelo utūdile kisaka kyami tumweno twa ku mushipiditu kumeso nenki, mutyima munda umfukatanga, amba bintu byonso pano bidi biyampe, ebiya neteleka ne ku mutyika amba nabwanya.” Wandi mukaji nandi amba: “Pomonanga [wami mulume] wikwete’ko na bintu bya ku mushipiditu, ngivwananga kuloelelwa kwabinebine munda mwa mutyima.” Ne bana nabo badi na nsangaji pa kumona babo bambutwile basumininwe kwingidila Yehova mingilo ya kitatyi kyonso.
7 Boba bonso batonga buno būmi bwa kwipānina mu bwine Leza kupita’ko kulondalonda bintu bya ku ngitu, Bible i mwibalaye amba bakeselwa madyese panopano ne mu būmi bukāya kumeso.—1 Tem. 4:8.