Kukongakanya Bantu ba mu Ndimi Yonso
1 Kinenwa kya Leza kyendanga kifikidila! Bantu “ba mu ndimi yonsololo ya mizo” betabijanga mutōtelo wabine. (Zek. 8:23) Lelo Batumoni ba Yehova bakwashanga namani bantu ba mu ‘bisaka byonso, ne mu bantu, ne mu ndimi yonso’ amba nabo bekale na mwimanino utōka ku meso a Yehova na lukulupilo lwa kukapanda pa “malwa makatakata”?—Kus. 7:9, 14.
2 Bulongolodi bwa Leza Bubalondolola: Kitango Kyendeji i kikwate’ko mpangiko ya kulupula mabuku esambila pa Bible mu ndimi kubwipi kwa 380 mwanda wa bantu ba ntanda yonso bemvwanije mvubu ya myanda miyampe. Kuteakanya ne kulupula mabuku mu ndimi mivule i kaji kakatampe mpata. Kino kilomba kukongakanya bisumpi bya balamuni babwino ne kwibapa bukwashi bwibasakilwa mwa kwālamwina’bo etu mabuku mu ino ndimi yonso, kupwa ke kwiatampa, ne kwiatuma. Ino mwingilo mwine mukatampe wingilwanga na umo ne umo wa mu basapudi ba Bulopwe benda basapwila bantu musapu upandija būmi utamba mu Bible.
3 Twitabijei Makambakano: Pano mu bifuko bivule mutanwa bantu milwi ne milwi besamba ndimi ya bweni. O mwanda bengidi ba Leza bavule bekankila’ko kwifunda Kishinwa, Kirusi, Kiespanyola, nansha ndimi mikwabo inenwa mu wabo mwaba mwa kufikila bano bantu na myanda miyampe. Bakwabo befundanga Ludimi lwa Batumama lwa Angele. Mu matanda onso abidi etwa bu Congo mudi bipwilo 2 489 ne bisumpi 63 bisapula ne kwingidija mabuku mu ndimi 17 kutalula’mo Falanse. Bamo bādi kebaivwene nansha kuyuka kantu nansha kamo katala padi Yehova ne pa Bible pano betabijanga bubinebine bwa Kinenwa kya Leza.—Loma 15:21.
4 Mwene netu tukokeja kuputumina mpata mu kusapula myanda miyampe ku bantu batambile mu ntanda ingi? (Kol. 1:25) Bipwilo bivule biteakanyanga’ko mwingilo wa kusapula mu mwaba wabo mwisambwa ndimi ya bweni. Basapudi befundanga bidi binenwa bityetye mwa kushilwila na musapwilo upēla, kifwa amba: “Wakoma’po. Tudi na myanda miyampe yotukuselele. [Penepa bapāna trakte nansha mukanda wa mu ludimi lobesamba’lwa.] Shala’po.” Bine Yehova weselanga bantu bashilula bityebitye uno muswelo!
5 Musapu wa Bulopwe ukokanga bantu ba mitamba yonso ne ba ndimi yonso. Nanshi tukwatakanyei mukenga onso otumona wa kusapula musapu.