Dikōkeji dya Bwine Kidishitu Ditūlwanga pa Ditompo Shi Mubutule Wapangwa
1. I ngikadilo’ka ibwanya kutūla dikōkeji dya mwine Kidishitu pa ditompo?
1 Kipwano kya ba kisaka na ba kisaka bakwabo kibwanya kwikala kininge mpata. Bine, kiletanga ditompo ku mwine Kidishitu shi mwine pandi, mwana, mbutwile, nansha shi mulongo wapangwa mu kipwilo nansha wepanga aye mwine. (Mat. 10:37) Le bene Kidishitu badikōkeji bafwaninwe kumona namani uno mubutule? Le kipwano kyenu na mubutule’wa kikeshila shi udi mu kyenu kipango? Dibajinji, tubandaulei binena Bible pa uno mwanda, ne misoñanya itala pa bapangwe ne pa boba bepangile abo bene mu kipwilo.
2. Kukwatañana na Bible, bene Kidishitu bafwaninwe kwikala namani na bantu bapangwe mu kipwilo?
2 Mwa Kwikadila na Bapangwe: Kinenwa kya Leza kisoñanya bene Kidishitu bejibe kunanga kisense nansha kupwana na muntu mupangwe mu kipwilo, amba: “Kemukinangai na muntu utelwa bu-mwanenu, shi ēkale wabusekese, shi wakilokoloko, shi wakutōta bakishi, shi wabutukani, shi wakukolwakolwa, shi wakudimba; wivwane shi udi namino, nankyo kemukadya nandi, ehe. . . . Pangai yewa muntu mubi umbukata mwenu.” (1 Kod. 5:11, 13) Binenwa bya Yesu bitanwa mu Mateo 18:17 bilombola uno mwanda umo onka amba: “Mulekei [yewa wapangwa] akālamuke kudi bānwe ke muJentaila kadi ke usonkeja-musonko.” Bemvwaniki ba Yesu bādi bayukile amba Bayuda ba mu yoya myaka kebādipo bapwana nansha dimo na Bajentaila, ne amba bādi bela basonkeja musonko mwenji bu babisumbule. Nanshi pano Yesu wādi ufundija bandi bana-babwanga baleke kupwana na bapangwe.—Tala Kiteba kya Mulami kya Falanse kya mafuku 15 Kweji 12, 1981, paje 17-19.
3, 4. I kipwano’ka kipelejibwe kupwana na mupangwe nansha na muntu wipangile aye mwine?
3 Kino kishintulula amba bene Kidishitu badikōkeji kebesambilangapo pa bintu bya ku mushipiditu na muntu ye-yense mupangwe mu kipwilo. Ino kekudipo enka kino. Kinenwa kya Leza kinena amba “kemukadya nandi, ehe.” (1 Kod. 5:11) Nanshi tufwaninwe ne kwepuka kipwano kya bitupu na muntu mupangwe. Ko kunena amba ketufwaninwepo kwenda nandi pamo pa kukepwija mukose, kwenda ku fetyi, ku futubolo, ku kizuilo kya mazua, ku mangajini, nansha kudya nandi pamo bidibwa shi mu njibo, shi mu leshitola.
4 Le kwisamba na muntu mupangwe nako? Eyo, Bible kalombwelepo myanda yonso mu kamo ne kamo, inoko 2 Yoano 10 witukwasha twikale na mumweno wa Yehova pa uno mwanda, unena’mba: “Wivwane shi kwiyanga umo kwako ko mudi, ne kuleta lufundijo ludi na luno mpika, kemukamutweja munjibo mwenu, nansha kumwimuna kwine mpika.” Kiteba kya Mulami kya Falanse kya mafuku 15 Kweji 12, 1981, paje 23, kishintulula uno vese amba: “Kwimuna muntu lwimu lonkalonka amba ‘Wakoma’po’ kubwanya kwikala bu ditabula dibajinji dya kushilula nandi mīsambo, pakwabo ne kupwaninina. Lelo bine tusakile kutabula dino ditabula dibajinji na muntu mupangwe?”
5. Shi muntu wapangwa, wajimija bika ne bika?
5 Bine, enka na munenena nimelo imo yonka ya Kiteba kya Mulami pa paje wa 31 amba: “Mwanda mwine i uno amba shi mwine Kidishitu wepāna mu kulonga bubi kadi wafule ku kupangwa, nabya wajimija bivule: kwitabijibwa ku meso a Leza; kwikala umo wa mu kipwilo kya nsangaji kya bene Kidishitu; kisense kilumbuluke na banabetu, ne kipwano kikatampe kyaādi upwene na babutule bandi bene Kidishitu.”
6. Le mwine Kidishitu unenwe kutyiba kipwano kyonso na mubutule mupangwe udi mu kyabo kipango? Shintulula.
6 Shi Mushikete Nandi mu Kipango Kimo: Le kino kishintulula amba bene Kidishitu bashikete mu kipango kimo na mupangwe bafwaninwe kwepuka kwisamba nandi, kudya nandi, ne kulonga nandi bya kulonga mu mingilo ya difuku ne difuku? Kiteba kya Mulami kya difuku 1 Kweji 4, 1991, pa paje 22 kinena kunshi kwa dyani amba: “Shi mu kisaka kya bene Kidishitu mudi muntu mupangwe, uno muntu ukendelela nyeke na kulonga bintu ne mingilo ya mu kisaka ya mafuku onso.” Nanshi, ba mu kisaka bo ba kutyiba mbila ya kuyuka muswelo obafwaninwe kumutweja pa kudya nansha mu mingilo mikwabo ya difuku ne difuku. Inoko kebafwaninwepo kupa banabetu bobapwene nabo mulangwe wa amba bakidi nandi biyampe mu bintu byonso enka mobadi bekadile nandi kumeso kwa aye kupangwa.
7. Kipwano kyetu kya ku mushipiditu ku njibo kishintanga namani shi wa mu kisaka umo wapangwa?
7 Inoko, Kiteba kya Mulami kya Falanse kya mafuku 15 Kweji 12, 1981, paje 26 ne 27, kisambila pa muntu mupangwe nansha mwipange mu kipwilo amba: “Kipwano kya ku mushipiditu kyotwadi nandi i kityibike kyonso. Kidi uno muswelo ne ku meso a babutule bandi kwine, enka ne ku meso a ba kisaka kimo kya tata ne lolo bene. . . . Kino kishintulula amba kipwano kya ku mushipiditu kyaādi nakyo mu kipango nakyo kibashinta. Kifwa, shi mulume wapangwa, mukajandi ne bana kebaketelekapo senene shi i aye wendeja kifundwa kya Bible kya kisaka nansha shi wimanina butangi bwa Bible ne kunena milombelo. Shi ukimba kulombela, kifwa pa kudya, udi shandi na mbila ya kulombela mu yandi njibo. Ino ba mu kisaka bakokeja kulombela milombelo yabo mundamunda kudi Leza. (Nk. 28:9; Mit. 119:145, 146) Ino bikekala namani shi mupangwe udi mu njibo nandi ukimba kutanwa patangwa Bible nansha pendejibwa kifundwa kya Bible mu kisaka? Bakwabo babwanya kumuleka āye evwane shi abamone amba kasapo kufundija nansha kwibalombola milangwe yandi mu myanda ya Leza.”
8. I kiselwa’ka kidi na bambutwile bene Kidishitu ku wabo mwana mutyetye mupangwe aye’ko ukidi mu yabo njibo?
8 Shi mwana mutyetye wa mu njibo wapangwa, bambutwile bandi bene Kidishitu bakidi na kiselwa kya kumulela. Kiteba kya Mulami kya Falanse kya mafuku 15 Kweji 11, 1988, paje 20, kinena amba: “Enka mobendelela na kumupa byakudya, bivwalwa, ne njibo, bafwaninwe ne kwendelela na kumufundija ne kumudingila kukwatañana na Kinenwa kya Leza. (Nk. 6:20-22; 29:17) Bambutwile ba buswe babwanya padi kukwata’ko mpangiko ya kwifunda nandi kifundwa kya Bible nansha byadi mupangwe. Padi ukamwena’mo byabuyabuya bya kololwa kuyampe shi befunda nandi pa kasuku. Pakwabo babwanya kutyiba mbila ya kumuleka endelele kutanwa ku mpangiko ya kifundwa kya kisaka.”—Tala ne Kiteba kya Mulami kya difuku 1 Kweji 10, 2001, paje 27-28.
9. Mwine Kidishitu ufwaninwe kwitana mu ludingo’ka na mubutule mupangwe ushikata panja pa kyabo kipango?
9 Babutule Kebadipo mu Kyetu Kipango: Kiteba kya Mulami kya Falanse kya mafuku 15 Kweji 4, 1988, paje 28, kinena’mba: “Padi kwishila shi upangilwe nansha wipangile mu kipwilo’wa i mubutule oketudipo nandi mu kisaka kimo kya tata ne lolo nansha mu njibo imo. Bibwanika kuleka kwitana nansha dimo na uno mubutule. Nansha shi kudi myanda ya kisaka ilomba kwitana nandi, kifwaninwe kwitana nandi na dimo,” kukwatañana na musoñanya wa Leza unena amba “kemukinangai na muntu” ye-yense ulongele bubi kwisāsa mpika. (1 Kod. 5:11) Bene Kidishitu badikōkeji bafwaninwe kulonga buninge bwa kwepuka kisense kyakubulwa kwendelela’mo na mubutule wa uno muswelo, ne kutyepeja mpata kipwano kyabo mu myanda ya bya busunga.—Tala Kiteba kya Mulami kya Falanse kya mafuku 15 Kweji 12, 1981, paje 28-29.
10, 11. I bika bifwaninwe kubandaula mwine Kidishitu kumeso kwa kupa mubutule upangilwe kishima kya kuvilukila mu yandi njibo?
10 Kiteba kya Mulami kikokela milangwe yetu ku mwanda mukwabo ukokeja kutamba, amba: “Bikekala namani shi mubutule, kifwa mwana nansha mbutwile mupangwe ushikatanga panja pa njibo yenu ukimba kujokela ku njibo? Kisaka kifwaninwe kutyiba mbila ya kya kulonga’po na kulonda myanda moikadile. Kifwa, mbutwile mupangwe ubwanya kubela misongo nansha kukomenwa kwisasaketa aye mwine mwa kusokwela kalupeto nansha tuntu tukwabo twa ku ngitu. Bana bene Kidishitu badi na kiselwa mungya Bisonekwa ne mungya mwikadilo wa bantu na bantu kya kumubakwasha. (1 Tem. 5:8) . . . Byonso byobakalonga padi bikemanina pa bintu bivule, kifwa pa bisakibwa binebine bya mbutwile’wa, pa mumweno ne mutyika ukwete nao mutwe wa kisaka būmi buyampe bwa ku mushipiditu bwa kipango kyandi.”—Kiteba kya Mulami kya Falanse kya 15 Kweji 12, 1981, paje 27.
11 Kino kishinte kimo kyonka kibweja’ko pa mwanda utala mwana mutyetye amba: “Kitatyi kimo bambutwile bene Kidishitu betabijanga mwana mutyetye upangilwe ajokele ku njibo yabo mu bula bwa kitatyi kampanda shi mwana’wa wabela ku ngitu nansha mu malango. Ino mu mwanda ne mwanda, bambutwile bafwaninwe kubandaula ngikadilo idi’mo mwana’wa. Le mwana mupangwe’wa wadi wisasaketa bunka bwandi, ino pano wakomenwa kwisasaketa? Lelo ukimbanga’tu kujoka mwanda wa kwikala na būmi bupēla? Le mwiendelejo wandi ne mwikadilo wandi udi namani? Le ukaleta ‘kiyujo’ mu njibo?—Ngat. 5:9.”
12. Le i byabuyabuya’ka bimo bilupuka ku mpangiko ya kupanga bantu mu kipwilo?
12 Byabuyabuya Bitamba ku Kwikala Badikōkeji Kudi Yehova: Kwingidila pamo na mpangiko ya mu Bisonekwa ya kupanga ne kutyiba kisense na banonga-bibi bakubulwa kwisāsa kudi na kamweno. Kulamanga butōki bwa kipwilo ne kwitushiyañanya bu bantu balamete ku misoñanya milumbuluke ya mu Bible itala pa mwikadilo. (1 Pet. 1:14-16) Kwitukiñanga ku mpusa myoneke. (Ngat. 5:7-9) Kadi kupanga nonga-bibi mukenga wa kumwena ne pa mfulo mu madingi apelwe, abwanya kumukwasha ape “bipa bitalala, nyā, ke bipa bya boloke kadi.”—Bah. 12:11.
13. I kwisendulula’ka kwēsendulwile kisaka kimo, ne kwalupula bipa’ka?
13 Tutu umo ne mwanabo mwana-mukaji pobāivwene dishikulu dimo ku kubungakana kwa kipindi, bāmwene amba bafwaninwe kusendulula mwikadilo wabo na inabo, wādi ushikata kungi kadi mupangwe kepadi myaka isamba mituntulu. Kupwa’tu kwa kubungakana, uno mwana-mulume waita inandi, wamulombola amba tukuswele, inoko ketukesambepo kadi nobe, poso’nka shi kudi mwanda mukatampe wa mu kisaka ulomba kwitanina pamo. Kepaijijepo inandi washilula kutanwa ku kupwila, ebiya ku mfulo wajokejibwa. Ne mulumyandi wakubulwa kwitabija nandi washilula kwifunda Bible, mwenda mafuku nandi wabatyijibwa.
14. Mwanda waka tufwaninwe kukwatakanya na dikōkeji mpangiko ya kupanga ba nonga-bibi?
14 Kukwatakanya na dikōkeji mpangiko ya kupanga bantu pa kipwilo ilombwelwe mu Bisonekwa kulombolanga buswe botuswele Yehova ne kumupa malondololo a kulondolola yewa umupunika. (Nk. 27:11) Shi ke pano, tubwanya kukulupila amba Yehova uketwesela madyese. Mwanda Mulopwe Davida wāsonekele pangala pa Yehova amba: ‘Kadi bitungwe byandi nabyo, nkyasasukile’byopo. Kudi wadikōkeji nabya ukelombola nobe kodi wadikōkeji.’—2 Sam. 22:23, 26.