Tukwatei na Makasa Abidi Lupeto lwa Kiteokratike
1 Pādi pakwata Mulopwe Yoshia mpangiko ya kulongolola tempelo, wātendele boba bāpelwe mingilo amba: “Kekudipo kubalwa kukabalwa lupeto lobadi nalo boba benē kuboko molutūlwanga; mwanda i mu bubinebine mobengilanga.” (2 Bal. 22:3-7, NW) Kutendela kwātendelwe boba bantu pangala pa bintu bikola kwādi kumweke patōka mu muswelo obādi bengidija lupeto lwādi lwibapebwa. Dyalelo dyotwipēne mu mingilo ikola ya myanda miyampe ya Leza, tufwaninwe netu kwikala na bubinebine mu kwingidija lupeto lotupebwa.
2 Mu Mwingilo wa Budimi: Mutyima wa kufwija’ko pangala pa myanda ya mvubu idi mu mabuku etu ne kuyuka kotuyukile amba kwialupula kulombanga lupeto luvule bilengejanga twiakwate na bulēme bukatampe mpata. Ketufwaninwepo kupāna mabuku etu bupānepāne ku boba bakubulwa kusangela binebine musapu wa mu Bible. Shi muntu wasangela bityetye myanda miyampe, tubwanya kumupa trakte kupita’ko kumupa mabuku.
3 Twabanyei mabuku mu muswelo ulombola amba twiakwete na bulēme bwao. Twepukei kushiya’o mu bifuko bya bantu bonso, kutyina amba akajimina bitupu. Tubalei bidi otudi nao ku njibo kumeso kwa kuselela’ko makwabo, kutyina amba twakasupakanya’o. Shi utambulanga mapepala mapite buvule ku nimelo ne nimelo, tompa kutyepeja’ko kibalwa kyolombanga.
4 Mabuku a Kwingidija Abe Mwine: Tufwaninwe kulomba enka mabuku otudi nao mvubu binebine. Nakampata ketufwaninwepo kulomba bulombelombe Mabible atelwa bu de luxe, Bibles avec références ne mabuku makwabo makatakata, kifwa Concordance, Index, Étude perspicace ne dibuku Prédicateurs, onso ano alombanga lupeto luvule pa kwialupula.
5 Lelo udi na kibidiji kya kulemba dyobe dijina ne yobe adelese mu obe mabuku? Kino kityepejanga bya kulombalomba makwabo a kupingakenya pa oa apānwanga na kīlwa. Shi ubajimija dibuku dya ñimbo, Bible, nansha dibuku dya kifundwa, kepabulwe padi ukatana’dyo mu bintu bijiminanga bitūlwanga ku Njibo ya Bulopwe nansha ku kifuko kya kubungakana.—Luka 15:8, 9.
6 Tulongei buninge bwa kwingidija mabuku etu na kilelo. Uno ye muswelo wa kulombola bubinebine bwetu mu kwingidija lupeto lwa Bulopwe lobetupa kudi Yehova.—Luka 16:10.