Sapulai Musapu wa Bulopwe
1 “Mfwanyinwe kusapula Myanda Miyampe ya Bulopwe bwa Leza ne ku bibundi bikwabo monka, mwanda e kyo kyantumine Leza.” (Luka 4:43, MB) Pānene Yesu bino binenwa, i kulombola kwaālombwele amba mutwe wa mwanda wa mwingilo wandi i Bulopwe bwa Leza. Ne musapu otusapula dyalelo nao monka na monka, wimanine pa Bulopwe, monka mokyālailwe mu Mateo 24:14 (MB) amba: “Myanda Miyampe ino’i ya Bulopwe ikasapulwa panopantanda ponso, amba ikale bu kiyukeno ku mizo yonso, penepa mfulo keifika shayo.” Lelo i bubinebine’ka bwa Bulopwe bwa Leza bufwaninwe kwivwana bantu? I buno.
2 Bulopwe bwa Leza pano i bubikale mūlu kadi panopano ponka busa kupingakena pa buludiki bonso bwa bantu. Dyabola ke mupwe kala kupangwa mūlu, kadi ino ngikadilo imbi ya bintu ke mitwele mu mafuku ayo a mfulo. (Kus. 12:10, 12) Ngikadilo minunu ya Satana ikonakanibwa fututu, ino Bulopwe bwa Leza abo kebukatenkenapo. Bukekalanga’ko nyeke.—Dan. 2:44; Bah. 12:28.
3 Bulopwe bwa Leza bukapa bantu bonso ba kikōkeji bintu byonso byobabila. Bukafukatyija bantu mityima pa kupwa masusu alengwa na mavita, na bupolapola, na kasusu, ne na bulanda. (Mit. 46:8, 9; 72:12-14) Bungibungi bwa bidibwa bukekala’ko ku bonso. (Mit. 72:16; Is. 25:6) Misongo ne bulema kebikavulukwapo dikwabo. (Is. 33:24; 35:5, 6) Abo bantu benda bafikila pa bubwaninine, ntanda nayo koku yenda yalamunwa ke paladisa, bine, bantu bakeshikatyila umbumo senene shē.—Is. 11:6-9.
4 Mwikadilo wetu otudi nao pano o ulombola shi tusakanga kwikala babikalwa ba Bulopwe bwa Leza. Musapu wa Bulopwe ufwaninwe kushinta būmi bwetu bonso, ne bitungo byetu ne bintu byotutangidije kumeso bine. Kifwa, tuyukile shetu amba tudi na kiselwa kya kusasaketa kyetu kipango, inoko ketukokejapo kuleka kukalakala na bintu bya ku ngitu kutādile tumweno twa Bulopwe. (Mat. 13:22; 1 Tem. 5:8) Tufwaninwe kulonda musoñanya wa Yesu unena’mba: “Badikilai bidi kusaka bulopwe bwa Leza, ne boloke bwandi kumo, ebiya nankyo ne byabyo byonso bikemutentekelwapo.”—Mat. 6:33.
5 Uno mwanda i wa kupēlakana nao mwanda wa bantu bevwane ne kulongela mwendele musapu wa Bulopwe pakidi mema mu manwi pano. Pa kusaka balonge namino, twibakwashei nanshi na ‘kwibanekenya, mwendele myanda ya bulopwe bwa Leza.’—Bil. 19:8.