Twikalei na Būmi Bukwatañene na Kwipāna Kwetu
1 Wikale wabatyijibwe panopano nansha makumi a myaka kunyuma, kubudilwepo kuvuluka uno mwanda mukatampe mpata wa mu būmi bobe. Kubatyijibwa kwetu ke mfulopo ya byonso, ayo mine yo ngalwilo ya būmi bwa kwingila mingilo ya kwipāna ya kulādila nyeke ne nyeke. (1 Yoa. 2:17) Lelo kwikala na būmi bukwatañene na kwipāna kwetu kulomba kulonga bika ne bika?
2 Kulonda Kifwa kya Kidishitu: Yesu ‘wāalwile mingilo yandi’ kinondanonda’tu na kubatyijibwa kwandi, kaenda usapula “myanda-miyampe ya bulopwe bwa Leza.” (Luka 3:23, MB; 4:43) Ne batwe netu mo monka, kitatyi kyotwaikele kulombola kwipāna kwetu kudi Yehova na lubatyijo, kyo kyotwaikele bengidi batombolwe ba myanda miyampe. Eyo, tuyukile shetu amba kusokola tubintu twa kwikwasha nato umbūmi kulombanga kitatyi ne bukomo, ino mwingilo mukatampe, mwine otupelwe, i mwingilo wa bwine Kidishitu. (Mat. 6:33) Boba bepēne kudi Leza kebafwilangapo kusokola bya bupeta ne ntumbo, ino bakimbanga ‘kutumbija mwingilo wabo,’ monka mwādi mutumbijija’o mutumibwa Polo. (Loma 11:13) Lelo nobe ukwete makasa abidi madyese obe a kwingidila Yehova, ulonga bukomo bobe bonso?
3 Tufwaninwe ‘kukomena Dyabola’ monka mwāmukomenene Yesu. (Yak. 4:7) Satana wātompele Yesu kinondanonda na kubatyijibwa Kwandi, ne dyalelo nadyo mo monka, upwilanga mpumpu pa bengidi bepāne ba Yehova. (Luka 4:1-13) Byotujokolokelwe na ntanda ya Satana, tufwaninwe kwikala bedingile, ne kwepuka kintu kyo-kyonso kikokeja kona ñeni yetu nansha kuboleja mutyima wetu. (Nk. 4:23; Mat. 5:29, 30) Bene Kidishitu i badyumunwe amba kemukolwa “kudya pa mesa a Mfumwetu, kadi ne kudya pa mesa a bademona.” (1 Kod. 10:21) Kino kitulomba kwilama ku kwipwija mukose kubi, ku kisense kibi, ne ku byaka bya ku Entelenete. Kadi kitulomba ne kwijiba myanda ya batupondo. Kudyumuka bino bintu ne bongojani bukwabo bwa Satana kuketwikadija na būmi bukwatañene na kwipāna kwetu.
4 Kwingidija Bintu Bitupele Leza: Yehova witukwashanga kupityila ku Kinenwa kyandi ne ku kipwilo kya bwine Kidishitu amba tumone muswelo wa kwikala na būmi bukwatañene na kwipāna kwetu. Tweja butangi bwa Bible ne milombelo ya kulomba kudi Yehova mu būmi bobe bwa difuku ne difuku. (Yos. 1:8; 1 Tes. 5:17) Sangela kupwila kwa pa kipwilo. (Mit. 122:1) Enda kisense na bantu bakaminwe Yehova, balama bitongwe byandi.—Mit. 119:63.
5 Na bukwashi bwa Leza, kukabulwepo kwikala na būmi bukwatañene na kwipāna kowipēne kudi Yehova, bine ukekala na nsangaji ya kumwingidila nyeke ne nyeke.—Mit. 22:26, 27; Fid. 4:13.