‘Itabija’kyo’
1 Kyaba kimo, Yesu wādi wisamba na bandi bana ba bwanga pangala pa busongi, penepa wātela bukunga amba i ‘kyabuntu.’ Kupwa wānena’mba: ‘Yewa ukokeja kwitabija’kyo, etabije’kyo.’ (Mat. 19:10-12) Myaka kupita’po, mutumibwa Polo nandi wāsoneka myanda ya byabuyabuya bidi mu bukunga, wākankamika ne bakwabo balonde kifwa kyandi kya kushala bampikwa kusonga. (1 Kod. 7:7, 38) Dyalelo bavule ‘betabijanga’ bukunga ne kwangula bangula’mo byabuyabuya bitamba’mo. Le i byabuyabuya’ka bimo?
2 Kwingila ‘Pampikwa Kupuakanibwa’: Polo wāyukile amba bukungulume bo bwāmupele mukenga wa kwingidila Yehova ‘pampikwa kupuakanibwa.’ Ne dyalelo nadyo mo monka, tutu nkungulume ye ukokeja kwielela’ko kukafunda ku Masomo a Bufundiji bwa Mwingilo, kadi mwanetu nkunga upēlelwanga kutwela mu mwingilo wa bupania, kufunda ludimi lungi, kuvilukila kokwa kusakibwa bengidi bavule, kwingila ku Betele, nansha kwikala na kyaba kya kupebwa madyese makwabo a pa bula a mingilo. Ukokeja kwikala na kitatyi kivule ne mikenga ya kwipāna na kusumininwa mu kifundwa kya kasuku ne kulanguluka’po ne kwisamba na Yehova na kulombela milombelo ya na mutyima umo. Muntu wakubulwa kusonga nansha kusongwa wikalanga na kitatyi kivule kya kwipāna mu kukwasha bakwabo. Bino byonso bidi na ‘kamweno kwadi aye mwine.’—1 Kod. 7:32-35; Bil. 20:35.
3 Ino mingilo ingidilwa Leza pampikwa kupuakanibwa namino iletanga madyese a ntanda ne miseke. Kaka umo nkungakaji walembele pangala pa myaka 27 yaalēle mu Kenya amba: “Kwadi balunda bavule mpata ne mingilo kapwila! Twadi tulonga bintu pamo, twipempula [ne] kwipempula. . . . Nadi ñingidija bwanapabo buvule ne kupēlelwa kwami kwa mu bukungakaji mwanda wa kuputumina mu mwingilo, bine kino i kimpe nsangaji mikatampe.” Ubweja’ko amba: “Mu bula bwa myaka yonso kipwano kyompwene na Yehova i kininge mpata.”
4 Kwitabija’kyo: Yesu wānene amba buluji bwine bufwaninwe kutamijija kyabuntu kya bukunga i “pa mwanda wa bulopwe bwa mūlu.” (Mat. 19:12) Bukunga i kyabuntu pamo’nka bwa kyabuntu kyo-kyonso, o mwanda bufwaninwe kwingidijibwa senene mwa kulupwila’bo nsangaji ne byabuyabuya. Banabetu bavule bampikwa kusonga nansha kusongwa bajingululanga mvubu ya kwitabija kino kyabuntu mwanda bakwatakanyanga mikenga ya mu bukunga ne kwiubija mudi Yehova wa kwibapa tunangu ne bukomo.