Iula Buyampe bwa Yehova
1 Shi tubapu kubandila kupona kwa dyuba kwa buya bwa dyangi nansha kudya bidibwa bya mwenye, mwene tukunkwanga ku mutyima kufwija’ko Yehova, Nsulo ya buyampe bonso? Buyampe bwandi bwitutononanga tumwiule. (Mit. 119:66, 68; Ef. 5:1) Le i muswelo’ka netu otukalombola buno buyampe?
2 Ku Bampikwa Kwitabija: Muswelo umo wa kwiula buyampe bwa Yehova i kuta mutyima byabinebine boba boketudipo nabo lwitabijo lumo. (Ngal. 6:10) Kulombola buyampe mu bilongwa kushintanga muswelo bantu obetumona batwe Batumoni ba Yehova ne musapu otuselele.
3 Tulete kifwa, tutu umo nkasampe painia, paadi ukungila ku lupitalo, wakashikata kubwipi na mwana-mukaji umo mununu wadi umweka bu ubela kupityidila bonso badi’po. Kyaba kyandi kya kumona dokitele pa kufika, walekela mwana-mukaji’wa ende pa kyandi kyaba. Mwenda mafuku, betana nandi monka, papo ke mu nsoko, lolo’ye wasangala bininge pa kumumona. Nansha byakadipo usakanga kwivwana myanda miyampe pabajinji, ino pano wanena’mba nayukididila’tu amba Batumoni ba Yehova baswele bakwabo binebine. Washilula kwifunda Bible kitatyi kyonso.
4 Ku banabetu: Twiulanga kadi monka buyampe bwa Yehova potukwashanga banabetu mu lwitabijo. Mu kitatyi kya bimpengele, twikalanga babajinji kukwasha banabetu. Tulombolanga kadi uno mushipiditu potusela boba kebadipo mwa kufikila ku kupwila, potupempula babilemafu, ne potutandabula kisanso kyetu ku boba boketwiibidile nabo mu kipwilo.—2 Kod. 6:11-13; Bah. 13:16.
5 Muswelo mukwabo Yehova walombola buyampe bwandi i pa kwikala na “mutyima wa lubilo wa kulekela (myanda).” (Mit. 86:5) Netu pa kusaka tumwiule, tukokeja kulombola’mba tuswele buyampe na kwikala na mutyima wa kulekela bakwetu. (Ef. 4:32) Kino kikekadija kisense kyotudi nakyo na banabetu betabije ‘kinengele ne kilumbuluke.’—Mit. 133:1-3.
6 Tulombei buyampe bwa ntanda ne miseke bwa Yehova bwitupe mutyima wa kwisamba mitendelo yandi ne kwikala beñenya na nsangaji. Kadi bwitutonone tulonge buninge bwa kwiula buyampe bwandi mu byonso byotulonga.—Mit. 145:7; Yel. 31:12.