Mvubu Mikatampe ya Tunangu twa Leza
1 Bantu bamobamo balañanga amba Batumoni ba Yehova bafwaninwe kwipāna nabo mu mingilo ya kutyepeja’ko bikambija bisusula muzo wa muntu dyalelo. Na bubine, bantu balanga namino i bakomenwe kumona mvubu mikatampe ya mwingilo wa kufundija Bible. Kidi’nka na mwāsonekele mutumibwa Polo amba: “Busapudi bwa [mutyi wa masusu] bo bulembakane kudi boba bakoneka, ino kudi bātwe bene, bakupandijibwa, i bukomo bwa Leza.” (1 Kod. 1:18) Bine, tuyukile amba mwingilo wa bwine Kidishitu o mwingilo wa kamweno kakatampe kupita wingilwa pano pa ntanda dyalelo.
2 Būmi Buyampe Tamba’nka Pano: Bukomo bulonga bantu mwanda wa kupwija makambakano a muzo wa muntu i bweleyombo bitupu. Bijila bitūlwa’ko kebipwilepo bupolapola bwenda buvudila’ko. Bipwano bya ndoe kebifundwilepo mavita nansha ke basola ba kuleta ndoe bene. Mpangiko ya kulumbulula mushikatyilo wa bantu keitalwilepo bulanda. (Mit. 146:3, 4; Yel. 8:9) Ino musapu wa Bulopwe ao i mwalamune būmi bwa bavule na kwibakwasha bavwale bumuntu bupya bwitabijibwe na Leza. (Loma 12:2; Kol. 3:9, 10) Ne kino i kibape būmi buyampe tamba’nka pano.—1 Tem. 4:8.
3 Būmi bwa Nsangaji Budi Kumeso: Kutentekela pa bukwashi bwitupa tunangu twa Leza bwa kulwa na makambakano etutana dyalelo umbūmi, tutambulanga kadi buludiki butala pa mafuku a kumeso. (Mit. 119:105) Tunangu twitukiñanga ne ku bukobakane bwa kufwila kulongolola ino ngikadilo ya bintu. (Mus. 1:15; Loma 8:20) Bine, tufwijanga’ko mwanda ketujimijepo būmi bwetu mu kulondalonda bitungo bitwala’nka ku kufwa nkondo bitupu! Ino batwe tuloñanga bukomo bwa kutengela lukulupilo lwa binebine lwa Yehova lwa “madiulu mapya, ne ntanda īngi mipya” mukekala boloke. Pakāya difuku dya Yehova, kikamweka patōkelela amba boba bakulupile mu tunangu twa Leza i batonge butongi boloke.—2 Pet. 3:10-13; Mit. 37:34.
4 Nansha tunangu twa Leza byotumweka bu tukomo kulonda ku boba bekujije mu ‘tunangu twa ino ngikadilo ya bintu,’ na bubine dyo dyonka dishinda dya kamweno umbūmi difwaninwe kulondwa. (1 Kod. 1:21; 2:6-8) O mwanda twendelelei na kusapula ntanda yonso musapu utamba kudi Leza “kasuku wa tunangu tonso.”—Loma 16:27, MB.