Kutanwa Kitatyi ne Kitatyi ku Kupwila—Kintu kya Kutangidija Kumeso
1 Bisaka bya bwine Kidishitu bitangidijanga kumeso kutanwa ku kupwila kwa pa kipwilo kwa kitatyi ne kitatyi. Inoko bisakibwa bya umbūmi kebyo kuleta bikambija. Lelo mingilo ya ku njibo, kaji, nansha madevwala a ku masomo bibashilula kudya kitatyi kitūdilwe butōtyi bwa Yehova? Kutala bintu pamo na mutadila Yehova kuketukwasha tutangidije bintu bifwaninwe kutangidija kumeso.—1 Sam. 24:6; 26:11.
2 Mwana-mulume umo mwine Isalela wākomenwe kumona bintu na mwibimwena Yehova pa kukongakanya nyala mu dya Sabado. Padi wālangile’mba i kisaka kyoñingidila nansha’mba i ka kintu katyetye’tu. Inoko, kupityila ku butyibi bwāmutyibilwe, Yehova wālombwele amba kwingila mingilo ya bwine ntanda mu bitatyi bitungilwe butōtyi i mwanda musumininwe.—Umb. 15:32-36.
3 Kulwa na Bikambija: Ku bavule kushiya kaji mwanda wa kukapwila i bulwi. Bamobamo bapwijanga kino kikambija na kwisamba na mwinē mingilo, na kwishinta bitatyi na mukwabo wa mingilo, na kukimba kaji kakwabo kendele’mo, nansha na kupēleja mwikadilo wabo wa umbūmi. Na bubine, kwipāna kwa uno muswelo pa mwanda wa mutōtelo wa bine kusangajanga Leza.—Bah. 13:16.
4 Madevwala a ku masomo nao abwanya kuleta bikambija. “Ami shami nelongelanga madevwala ami a ku masomo kubajinji kwa kupwila, bishala’bya nabyo shi najoka ku njibo,” ye mwanenene nkasampe umo. Shi madevwala onso a ku masomo keavuilwepo mwanda wa kupwila kwa kyolwa, bambutwile bamo bashintulwilanga badimu amba kutanwa ku kupwila kwa bwine Kidishitu i kintu kya kutangidija kumeso mu kyabo kisaka.
5 Kwingidila pamo ne mpangiko miyampe i mfungulo ya kupwija mingilo ya ku njibo ne kwiteakanya mwa kukataninwa ku kupwila pa kitatyi kitungwe pamo na kisaka. (Nk. 20:18) Nansha ke bana bene babwanya kufundijibwa kuvwala ne kwiteakanya kala mwa kwendela ku kupwila pa kitatyi kitungwe. Bambutwile bakakoma mu babo bana mvubu ya kupwila kupityila ku kimfwa kyabo.—Nk. 20:7.
6 Mitabakano ya ino milongelo ya bintu byoyenda ivula, i kya kamweno kutanwa ku kupwila kwa pa kipwilo kitatyi ne kitatyi. Nanshi twendelelei kumona bintu pamo na mwibimwena Yehova ne kutūla kutanwa ku kupwila kitatyi ne kitatyi bu kintu kya kutangidija kumeso.—Bah. 10:24, 25.