Kutambañana kwa Tubalwe Kukutala ne Abe
1, 2. Le bengidi ba Leza batalwa namani na kufikidila kwa kimonwa kya bupolofeto kisonekelwe mu Kusokwelwa 9:13-19?
1 “Mwikeulu wa busamba nandi waila kimpungidi.” Penepa “basola ba pa tubalwe” “tununu tutwa tubidi misungu kanunu” bakungula. Bine, ke bibumbopo bya basola byotumonanga’bi. “Mitwe ya tubalwe’ya yadi’nka bwa mitwe ya bantambo.” Mudilo, mwishi, ne mwishi wa sufule byadi bitamba mu byakanwa byabo, kadi “mikila yato yadi ne mitwe bwa banyoka.” Kino kibumbo kya ba pa tubalwe kya kyelekejo kyendanga kishiya masala mu nkoka yakyo. (Kus. 9:13-19, MB) Lelo uyukile mukutadila kufikidila kwa kino kimonwa kitulumuja kya bupolofeto?
2 Bashele’ko bashingwe māni ne bapwani nabo, mikōko mikwabo, bayukanyanga umbumo butyibi bwa Leza. Pa kino basokolanga patōka ngikadilo mifwe ya bipwilo bya Kine Kidishitu. Tubandaulei’tu bidi bintu bibidi bya mu kino kimonwa kya bupolofeto bilombola kikadile mwingilo wa bengidi ba Leza mufike’po.
3. I bufundiji’ka botambwile mwa kwisambila musapu wa Leza mu muswelo mufike’po?
3 Bafundijibwe ne Kukumbanya Mwa Kupānina Musapu wa Leza: Bengidi ba Leza i bafundijibwe mwa kwisambila musapu wa Leza na lupusa ku Masomo a Mwingilo wa Kiteokratike ne ku kupwila kukwabo kwa pa kipwilo. Beulanga Yesu ne bandi bana ba bwanga pobenda bakimba boba bafwaninwe, na kusapula konso konso kobatana bantu. (Mat. 10:11; Mako 1:16; Luka 4:15; Bil. 20:18-20) Bine uno muswelo wa kusapula wa mu Bible i mufwaninwe binebine!
4. I bingidilwa’ka bidi na basapudi bavule bibakwasha bavuije mwingilo wabo?
4 Midiyala ya Mabible, bitabo, maboloshile, ne mapepala yabanibwanga na bengidi bene Kidishitu bengila mwingilo wa kusapula wibapele Leza. Ano mabuku i malupulwe kubwipi kwa mu ndimi 400, esambila pa myanda mishileshile ne mu muswelo usangaja bantu ba misaka pala pala. Lelo wingidijanga biyampe bino bingidilwa?
5, 6. I bika bilombola amba bantu ba Yehova bakwatakanibwanga na Leza?
5 Buludiki ne Bukwashi bwa Mūlu: Kimonwa kya bupolofeto kilombola kadi amba mwingilo welekejibwe na ba pa tubalwe ba kyelekejo ukwatakanibwanga na Leza. (Kus. 9:13-15) Mwingilo wa ntanda yonso wa busapudi wingilwanga na mushipiditu wa Leza ke na tunangu nansha na bukomopo bwa muntu. (Zek. 4:6) Yehova wingidijanga bamwikeulu mwanda wa kuludika uno mwingilo. (Kus. 14:6) Shi ke pano, Yehova, kupityila ku bukomo bwa Batumoni bandi, uletanga bukwashi bwa momwa mūlu mwanda wa kukokela kwadi batūkanye.—Yoa. 6:45, 65.
6 Bantu ba Yehova i bafundijibwe, bakumbanibwe mwa kupānina musapu wa Leza, kadi bengilanga na bukomo kebukokejapo kwimikwa mu bwendeji bwa bamwikeulu. Nanshi twendelelei na kuvuya’mo kyetu kipindi kya kufikidija kino kimonwa kya bupolofeto kisangaja.