Iulai Mutyima wa Kidishitu
1. I mutyima wa muswelo’ka wālombwele Yesu?
1 Nansha shi ketwamwene kasha Mwanā Leza, ino na bubine twi bafikile pa kumuswa kupityila ku bilembwa bīsambila pa būmi bwa Yesu ne pa mwingilo wandi. (1 Pet. 1:8) Wāshile kitenta kyandi kya ntumbo momwa mūlu waiya pano panshi, mwanda wa kukōkela ku kiswa-mutyima kya Shandi. Paādi bu muntu, wāingidile bakwabo pampikwa nsengwa, wāpana būmi bwandi pa mwanda wa bantu. (Mat. 20:28) Kinenwa kya Leza kitusoñanya’mba: “Mwikale ne uno mutyima uno mwenu munda wadi ne Kidishitu Yesu.” Lelo i muswelo’ka otubwanya kwiula mushipiditu wandi wa kwipāna?—Fid. 2:5-8.
2. I kikoleja’ka kitananga bene Kidishitu bavule, ne i bika bikebakwasha kwikikomena?
2 Kitatyi Kyotwivwana Bukōke: Yesu wādi mubwaninine, ino nandi wādi ukoka. Difuku dimo, nansha “byadi ke mukoke na lwendo,” wāsapwidile mwana-mukaji umo mwine Samadia. (Yoa. 4:6, MB) Dyalelo bene Kidishitu bavule batanwanga na kino kikoleja. Na mpungiji ya mingilo ya mu yenga mutuntulu, bibwanya kwikala bikomo kwikala na buninge bwa kwenda mu mwingilo wa busapudi. Inoko, shi twenda’mo kitatyi ne kitatyi, tukamona’mba mwingilo wa bwine Kidishitu witutūkijanga mutyima ku mushipiditu.—Yoa. 4:32-34.
3. Le tubwanya namani kwiula mutyima wa Yesu wa kusepelela kusapula?
3 Difuku dikwabo, Yesu ne bandi bana ba bwanga bētolwedile kwa bunka bwabo mu ntanda amba baketūkije bityetye. Inoko, kibumbo kikatampe kya bantu bakamukala kumeso ne kubungakena kobadi. Pa kyaba kya kwibakwatyilwa nsungu, ino Yesu “webafwila lusa” ne wāshilula ponka’pa “kebafundija bingi bingi.” (Mako 6:30-34) Kushilula ne kwendeja bifundwa bya Bible nako kulomba kwikala na mutyima wa uno muswelo. Kulomba kwikala na kininga kisumininwe ne buswe bwa binebine ku bantu. Shi ne pano kudipo na kifundwa kya Bible kya kwendeja, kokileka’byo kutompa kushilula nansha kimo.
4. Le kwingila bu pania mukwashi kwitukwasha twiule mutyima wa Kidishitu muswelo’ka?
4 Tūla Tumweno twa ku Mushipiditu pa Kifuko Kibajinji: Kwingila bu pania mukwashi kubwanya kwitukwasha tubambile meso pa mingilo ya ku mushipiditu. Kaka umo nsongwakaji wasonekele’mba: “Inandya mulunda nami umo wetukankamikile amba twingidile nandi pamo bu pania mukwashi kweji umo. Nasangele bya binebine potwelungile nandi pamo. Naloedilwe kwiyuka na batutu ne bakaka, ne bukidibukidi bonka baikala pamo’nka bwa ba mu kyetu kisaka. Kadi nasangedile kwikala na mikenga mivule ya kwisamba na bantu pa bitala Yehova ne kwibafundija bubinebine bwa kutendelwa bwa Bulopwe. Byonso bino i bimfikije ku kwimona pabwipi na Yehova ne na bulongolodi bwandi.”—Mit. 34:8.
5. I kika kinenenwa amba tufwaninwe kwendelela na kulonga buninge bwa kwiula mutyima wa Yesu?
5 Batwe bonso tudi na divita dya ngitu yetu yampikwa kubwaninina ilwa na mutyima wetu wa kusangaja Yehova. (Loma 7:21-23) Tufwaninwe kukomena mushipiditu wa ino ntanda wa kwisakila bya batwe bene. (Mat. 16:22, 23) Yehova ubwanya kwitukwasha twiukomene na bukwashi bwa mushipiditu sandu wandi. (Ngat. 5:16, 17) Pano potukungila bunyongolodi bwetu tutwele mu ntanda impya ya boloke ya Leza, twiulei mutyima wa Yesu wa kutūla tumweno twa Bulopwe ne tumweno twa bakwetu kumeso kwa twetu.—Mat. 6:33; Loma 15:1-3.