“Mwikale Kubaijibwa”

1. Le i kiselwa’ka kyotudi nakyo batwe bonso?

¹ Mu kipwano kyetu kya bu bana na bana bwa bwine Kidishitu, batwe bonso tudi na kiselwa kya kubweja kyanga kya buswe mu kipwilo. (1 Pet. 1:22; 2:17) Kino kyanga kikasambakana shi ‘twikale kubaijibwa’ mu byalusa byetu bya munda ku batwe bene na bene. (2 Kod. 6:12, 13) Mwanda waka kuyuka senene batutu ne bakaka i kintu kya mvubu?

2. I kika kinenenwa amba kutamija kipwano na banabetu betabije kudi na mvubu?

² Kubaija Kipwano: Kitatyi kyotwenda twiyuka biyampe na banabetu betabije, tukafikila pa kutendela lwitabijo lwabo, kūminina kwabo, ne ngikadilo yabo mikwabo miyampe kutabukidila. Kutupatupa kwabo papo kukenda kutyepa ku meso etu, ne bijimba bya bulunda nabyo bikenda bibaya. Potwiyuka senene batwe bene na bene, tukafikila pa ludingo luyampe lwa kwitamija ne kwikankamika batwe bene na bene. (1 Tes. 5:11) Tukekala ‘ba kwikomeja pa mutyima’ batwe bene na bene mwa kunekenyenya na bukomo mpusa imbi ya ntanda ya Satana. (Kol. 4:11) Bine, byotudi mu ano mafuku a mfulo mayule bikambija, tufwaninwe kufwija’ko pangala pa balunda bayampe botudi nabo umbukata mwa bantu ba Yehova!​—Nk. 18:24.

3. I muswelo’ka otubwanya kwikala ba kukomeja mutyima wa bakwetu?

³ Balunda ba pa mutyima babwanya kwikala nsulo ya pa bula ya buninge ne busengi potutanwa mu matompo makomo. (Nk. 17:17) Kaka umo mwine Kidishitu wadi wikonda na malango a kwityepelwa uvuluka’mba: “Kwadi balunda badi banena bintu binkankamika nkomene milangwe yampikwa kwendela’mo yonadi nayo.” Balunda ba uno muswelo i dyese ditupa Yehova.​—Nk. 27:9.

4. Le i muswelo’ka otukafikila pa kuyuka banabetu senene mu kipwilo?

⁴ Ikala Kubanga Bakwenu: Lelo tubwanya namani kubaijibwa mu byalusa bya munda ku banabetu betabije? Kutentekela ku lwimu lowiimuna na banabenu bene Kidishitu ku kupwila, longa bukomo bwa kwisamba nabo. Ikala kusangela umo ne umo, ino kwampikwa kwikuja mu myanda ibatala abo bene. (Fid. 2:4; 1 Pet. 4:15) Muswelo mukwabo wa kubaijibwa i kwita bakwenu ku bidibwa. (Luka 14:12-14) Ne kadi ukokeja kukwata mpangiko ya kwingila pamo nabo mu mwingilo wa budimi. (Luka 10:1) Kitatyi kyonso kyotuboya mulangwe wa kuyuka banabetu senene, tuningishanga bumo mu kipwilo.​—Kol. 3:14.

5. Le i muswelo’ka umo wa kubaija bulunda bwetu ku bakwetu?

⁵ Lelo twikalanga na mutyima wa kutonga bapwani netu ba pa mutyima enka umbukata mwa boba botudi nabo lukongo lumo’ni, nansha enka mu boba basangela bintu bimo na byotusenswe? Myanda ya uno muswelo keifwaninwepo kukadikija bulunda botutamija mu kipwilo. Ba Davida ne Yonafane, pamo ne ba Luta ne Naomi bāningije bijimba bikomo bya bulunda nansha byobādi na myaka ne bitamina bishileshile. (Luta 4:15; 1 Sam. 18:1) Lelo wabulwa’po nobe kubaija bulunda bobe na bakwenu? Kulonga namino kukaleta madyese mavule okulangila’po.

6. Le i kamweno’ka kamo kamo kadi mu kubaijibwa mu bya lusa byetu bya munda ku banabetu?

⁶ Ponso potwenda tubaijibwa mu byalusa byetu bya munda ku umo ne mukwabo, twikankamikanga batwe bene na bene ne kuvudija ndoe mu kipwilo. Pakwabo napo, Yehova mwine witweselanga pa mwanda wa buswe botuswele banabetu. (Mit. 41:1, 2; Bah. 6:10) Le wabulwa’po nobe kwitūdila’ko kitungo kya kwiyuka senene na bavule?