Ikala na Mushipiditu wa Bupania
1. Le ukokeja kushintulula namani mushipiditu wa bupania?
1 Basapudi bonso ba Bulopwe babwanya kwikala na mushipiditu wa bupania, bengile bupania nansha kebengile’bopo. Abo bonso balondanga musoñanya wa kusapula ne kulonga bana babwanga. (Mat. 28:19, 20; Bil. 18:5) Batele bantu mutyima ne kwipāna mwanda wa kuvuija mwingilo wabo. (Mat. 9:36; Bil. 20:24) Bengidi ba Yehova bekankilanga’ko kukwasha bakwabo na mutyima tō amba nabo bayuke bubinebine. (1 Kod. 9:19-23) Shi ke pano, tubandaulei kimfwa kya Fidipa, musapudi wa myanda miyampe, muntu wālombwele uno mushipiditu.
2. Bakulumpe ne bengidi ba mingilo babwanya kwiula bupyasakane bwa Fidipa mu mwingilo muswelo’ka?
2 Kusapula ne Kufundija: Fidipa wādi na biselwa bilēma mu kipwilo kya mu myaka katwa kabajinji. (Bil. 6:1-6) Wādi dibajinji musapudi mupyasakane wa myanda miyampe. (Bil. 8:40) Ne dyalelo nadyo mo monka, bakulumpe ne bengidi ba mingilo nansha byobapelwe biselwa, nabo babwanya kwikala na mushipiditu wa bupania na kutangidila mu mwingilo na kyanga. Bine, kino kikabijanga bininge mushipiditu wa kipwilo!—Loma 12:11.
3. Kitatyi kyotutanwa na matompo, i muswelo’ka otubwanya kulombola mushipiditu wa bupania?
3 Kunyuma kwa lufu lwa Shitevani, kupangwapangwa kwa malwa kwāletele makambakano mu būmi bwa bana babwanga. Inoko Fidipa aye wāendelele na kusapula, kadi wāingidijibwa ne mu kushitula mwingilo mu bene Samadia. (Bil. 8:1, 4-6, 12, 14-17) Netu tubwanya kwiula kimfwa kyandi na kwendelela kuyukanya myanda miyampe kitatyi kyotutanwa na matompo ne kusapula kwampikwa mboloji ku bonso botutana.—Yoa. 4:9.
4. I kimfwa’ka kya kufundija kitushidile Fidipa?
4 Manwa a Fidipa a kufundija Kinenwa kya Leza i mamweke mu lusango lwa kwalamuka kwa ntungu mwine Efiopya. (Bil. 8:26-38) Kutamija bwino bwa mwa kwingidijija Bible ne ‘kulangulukila mu Bisonekwa’ i dishinda dikwabo dya batwe kulombola mushipiditu wa bupania. (Bil. 17:2, 3) Pamo bwa Fidipa, tukimbanga kusapula myanda miyampe konso kotubwanya kutana bantu ne mu mikenga yonso ya pa bula.
5. I kika kibwanya kukwasha bambutwile bene Kidishitu bekale kukuna mushipiditu wa bupania mu babo bana?
5 Kisaka ne Kipwilo: Ne kutatana kwine mpika, ngikadilo ya Fidipa ne kimfwa kyandi byāikele na lupusa luyampe pa bana bandi bana-bakaji. (Bil. 21:9) Mo monka ne bambutwile bene Kidishitu balamate ku tumweno twa Bulopwe nabo bakankamikanga babo bana balamate’ko. Mbutwile mwine Kidishitu usapwila bakwabo na bupyasakane, nansha shi i mukōke na mingilo mivule ya mu yenga, yao ushiyanga kiyukeno kya nyeke mu mutyima wa mwana.—Nk. 22:6.
6. Le i muswelo’ka otubwanya kufwija’ko bapania ba mu kyetu kipwilo?
6 Fidipa wātambwile na kizaji ba Polo ne Luka, bene Kidishitu bapyasakane bādi baputumina mu mwingilo wa Yehova. (Bil. 21:8, 10) I muswelo’ka otubwanya kukwasha ne kulombola kufwija’ko kwetu ku boba badi na bupyasakane dyalelo? Padi tukokeja kwipāna kukengila na bapania lubanga nansha kyolwa difuku keditambilangapo bavule mu mwingilo. (Fid. 2:4) Kadi tubwanya kwibeta ku etu mobo baye twikankamike nabo. Nansha shi tudi mu ngikadilo’ka, le twabulwa’po batwe bonso kulonga bukomo bwa kwikala na mushipiditu wa bupania?