Malondololo ku Bipangujo Byenu

◼ I muswelo’ka otufwaninwe kuvuija mingilo yotupelwe pa kipwilo?

Mwingidilo wingila kipwilo kya bantu ba Yehova mu ndudi i bukomo botulonga batwe bonso. (1 Kod. 14:33, 40) Langa’tu bintu bilombwa pa kusaka kupwila kumo’tu bidi kulongeke. Kutentekela pa mpangiko ayo mine, kudi mingilo mivule pala pala ifwaninwe kwingilwa na batutu ne bakaka kumeso ne kupwa kwa kupwila. Mingilo imo keimonwangapo na bantu ino ayo’ko ya mvubu. Lelo umo ne umo ukakwasha namani ku ino mingilo?

Ikala kwituma abe mwine. Boba badi na mushipiditu wa kwituma bakamona mingilo mivule ya kwingila. (Mit. 110:3) Ta mutyima ku babela ne banunu. Kwasha ku kukomba Njibo ya Bulopwe. Tukokeja kulonga bintu bivule bya kamweno pambulwa kwilaija enka betunene kulonga’byo. Kyotusakilwa’tu i mutyima wa kukwasha.

Ingila na butūkanye. Bantu batūkanye bo bengidilanga bakwabo na nsangaji. (Luka 9:48) Butūkanye buketukankaja kukimba kulonga bivule bitupite kipimo. Kadi butūkanye bo buketulama tuleke kutabuka mikalo ya lupusa lotupelwe.​—Nk. 11:2.

Ikala wa binebine. Mosesa wākankamikilwe kutonga “bana-balume ba binebine” nansha bakulupilwa ba kusela biselwa mu Isalela wa kala. (Div. 18:21) Ne dyalelo ino ngikadilo yo ilombwa. Ingila mingilo yopebwa na mutyima umo. (Luka 16:10) Shi kubwanyapo kwingila mwingilo kampanda, kwata mpangiko ya kukimba muntu ubwanya kwingila’o pa kyobe kyaba shi kudi’popo.

Wipāne bya binebine. Bene Kidishitu i balombwe kwingila na muya wabo onso nansha ke mu twaji twa ntanda twine. (Kol. 3:22-24) Nanshi mingilo ya kwendeja kumeso mutōtelo wa bine yo mine. Nansha shi mwingilo umweka bu wa kwityepeja, wa kwiikija, ukaletela kipwilo byabuyabuya shi wingilwe senene.

Mwingilo o-onso otupebwa i mukenga wa kulombola amba tuswele Yehova ne banabetu. (Mat. 22:37-39) Twingilei nanshi mwingilo o-onso obetupa kwingila.