Endeja Bifundwa bya Bible Byendelela Kumeso
Kipindi 3: Kwingidija Bisonekwa Senene
1. Mwanda waka i biyampe kwimanina pa Bisonekwa kitatyi kyotwendeja bifundwa bya Bible?
1 Kitungo kyetu potwendeja bifundwa bya Bible i ‘kulonga bana ba bwanga’ na kukwasha bantu bemvwanije ne kwitabija bufundiji bwa Kinenwa kya Leza, bebulonde ne kwibulonda mu būmi bwabo. (Mat. 28:19, 20; 1 Tes. 2:13) Nanshi kifundwa kifwaninwe kwimanina pa Bisonekwa. Dibajinji kwasha befundi bayuke mwa kusokwela bisonekwa mu Mabible abo. Ino tukokeja kwingidija Bisonekwa namani mwa kukwashisha bano bantu bendelele kumeso ku mushipiditu?
2. Ukayuka namani amba bisonekwa kampanda bifwaninwe kutangwa ne kwisambilwa’po?
2 Sañuna Bisonekwa bya Kutanga: Powiteakanya, jingulula kisonekwa kyonso kitelelwe bitupu mu kifundwa mokikwatañenine na mwanda ubandaulwa, ne tala i byepi byomukatanga ne kwisambila’po na mwifundi. Divule dine, i biyampe kutanga byobya bilombola amba nkulupilo yetu imanine pa Bisonekwa. Mavese alombola’tu myanda moyādi ikadile akokeja kulekwa kutangwa. Ta mutyima ku bisakibwa ne ngikadilo idi’mo mwifundi ne mwifundi.
3. I kamweno’ka kadi mu kwipangula bipangujo, ne tukebipangula namani?
3 Ipangula Bipangujo: Pa kyaba kya kushintulwila mwifundi bisonekwa, i biyampe kumuleka akushintulwile’byo. Ukamuloba tudi mu kanwa na kumwipangula bipangujo na bwino. Shi bushintuludi bwa vese budi patōka, ukokeja’tu kumwipangula akulombole kisonekwa’kya mokikwatañenine na binenwe mu musango. Dimodimo ukokeja kwipangwila’ko bipangujo bivule bya kutwala mwifundi ku mulangwe mwendele’mo. Shi kusakilwa kubweja’ko kantu, ukokeja kwikabweja’ko shi mwifundi wapu kulondolola.
4. I bushintuludi buvule namani bulombwa kunena pa kisonekwa kyotutanga?
4 Nena’mo Myanda Ipēla: Divule, muntu uyukile kwela miketo na bununa welanga muketo umo’tu kala waase pa kikoto. Mo monka ne mufundiji wa bwino, nandi kasakilwapo binenwa bivulevule pa kutenga pa mwanda. Unenanga myanda ipēla, idi patōka, ne ya bine. Kyaba kimo, bikakulomba kukimba mu mabuku a bwine Kidishitu mwa kwivwanina kisonekwa kampanda mwa kwikishintulwila biyampe. (2 Tem. 2:15) Ino kokolwa kushintulula kamo ne kamo kadi mu vese ne vese udi mu kifundwa. Tweja’mo enka myanda isakibwa pa kwivwanija mwanda omwisambila’po.
5, 6. I muswelo’ka otukakwasha befundi balonde Kinenwa kya Leza mu būmi bwabo, ino tukepuka bika?
5 Lombola Kamweno Kabyo Umbūmi: Shi i kyendele’mo, kwasha mwifundi amone kamweno ka kisonekwa kya mu Bible mu būmi bwandi. Kimfwa, shi mubandaula Bahebelu 10:24, 25 na mwifundi kashilwile kwiya ku kupwila, ukokeja kutela kupwila kumo ne kumwita āye atanwe’ko. Ino kokolwa kumuningila. Leka Kinenwa kya Leza kimukunke ku mutyima alonge kilongwa kya kusangaja Yehova.—Bah. 4:12.
6 Potuvuija mwingilo wetu wa kulonga bana ba bwanga, tukwashei bantu bekale na “kikōkeji kya lwitabijo” na kwingidija Bisonekwa senene.—Loma 16:26.