Bukwashi Bobe I bwa Kamweno
1 “Tubafwija’ko pa byonso byo mwitulongelanga. Na bubine mubalonga kintu kya kwanwa.” Bino binenwa bilombola mutyima wa kufwija’ko bakulumpe ne bengidi ba mingilo botudi nabo. Bulongolodi bwa Leza byo bwenda bubaya, bana-balume bapye nabo po pene benda bakimbwa mwanda wa kukwasha kubwipi kwa bipwilo 100000 kujokoloka ntanda yonso. Shi wi tutu mubatyijibwe, nabya bukwashi bobe i bwa kamweno.
2 ‘Kusaka’: Le ukasaka namani ano madyese a mingilo a mbwejo? (1 Tem. 3:1) Dibajinji i na kuleta kimfwa kilumbuluke mu mwikadilo obe onso wa umbūmi. (1 Tem. 4:12; Tet. 2:6-8; 1 Pet. 5:3) Tambila mu mwingilo ne pa mfulo, kadi ikala ukwasha bakwenu nabo kutambila’mo. (2 Tem. 4:5) Ta mutyima bya binebine ku būmi bwa banabenu betabije. (Loma 12:13) Ikala mwifundi muyampe wa Kinenwa kya Leza, kadi tamija bwino bwa “mwendele lufundijo.” (Tet. 1:9; 1 Tem. 4:13) Vuija na kininga mingilo yonso ikupa bakulumpe. (1 Tem. 3:10) Shi wi mutwe wa kisaka, yuka ‘kulela kipango kyobe biyampe byonka.’—1 Tem. 3:4, 5, 12.
3 Kwingila bu mwingidi wa mingilo nansha bu mukulumpe kulomba kwipāna bininge mu mwingilo ne kwikala na mushipiditu wa kwisuminwa bivule. (1 Tem. 5:17) O mwanda posaka uno mwingilo, ingidila bakwenu mingilo ya kwityepeja. (Mat. 20:25-28; Yoa. 13:3-5, 12-17) Languluka pa mwādi mwikadile mutyima wa Temote, kadi ikala kumwiula. (Fid. 2:20-22) Pamo’nka bwa Temote, leka mwiendelejo obe ukuyukanye. (Bil. 16:1, 2) Potamija ngikadilo ya ku mushipiditu, ne povuija mingilo mikwabo ikupebwa, ne kulonda madingi a kwilemununa otambula, “bantu bonso ba[ka]mona mōendela utamina.”—1 Tem. 4:15.
4 Bambutwile, Fundijai Bansongwalume Bekale Kukwasha: Bana bashilulanga kwifunda kukwasha tamba bakidi banuke. Wibafundije kuta mutyima ku binenwa mu kupwila, mu busapudi, ne kwikala na mwiendelejo uleta kimfwa ku Njibo ya Bulopwe ne ku masomo. Wibalombole bayuke kwingidila bakwabo, kimfwa kukwasha ku kukomba ku Njibo ya Bulopwe, kukwasha bantu banunu, ne bikwabokwabo. Wibaleke bemwene nsangaji idi mu kupāna. (Bil. 20:35) Bufundiji bwa uno muswelo bukebakwasha bakekale nabo ke bapania, bengidi ba mingilo, nansha bakulumpe mu mafuku āya’ko.