Endeja Bifundwa bya Bible Byendelela Kumeso
Kipindi 9: Kuteakanya Befundi ku Kusapula bya Kiponka na Ponka
1 Ba Andele ne Fidipa pobāyukile amba Yesu ye Meshiasa wālailwe, kebēkakilepo kusapwila bakwabo uno musapu wa nsangaji. (Yoa. 1:40-45) Ne dyalelo nadyo mo monka, befundi ba Bible pobashilula kulombola lwitabijo lwabo mu byobafunda, bekalanga’nka na mutyima wa kunena’byo. (2 Kod. 4:13) Le tukebakankamika namani bekale basapula bya kiponka na ponka ne kwibateakanya basapule mobifwaninwe?
2 Ukokeja padi kwipangula mwifundi shi ke mwisambe na bakwabo byobya byaefunda mu Bible. Pakwabo udi na balunda nansha babutule bakokeja kwita bāye batanwe mu kifundwa. Mwipangule shi bakwabo ba ku kaji, ba ku masomo, nansha bayukane basangelanga musapu. Mu uno muswelo nandi ukashilula kusapula bukamoni. Mukwashe ekale na kusansanya ne na bulēme ne kanye ponka kitatyi kyaesamba na bakwabo myanda itala Yehova Leza ne mpango yandi.—Kol. 4:6; 2 Tem. 2:24, 25.
3 Kusapula Nkulupilo Yabo: I kya kamweno kwiija befundi ba Bible kwingidija Kinenwa kya Leza kitatyi kyobasapula nkulupilo yabo. Pa myanda kampanda misañunwe yomwifunda, ukokeja kwipangula mwifundi amba: “I muswelo’ka okokeja kwingidija Bible pa kushintulwila ba mu kisaka kyobe buno bubinebine?” nansha amba “I kisonekwa’ka kya mu Bible kyokatela mwanda wa kubingija kino kudi mulunda nobe?” Tadija muswelo walondolola, kupwa mulombole mwa kujadikila bufundiji pa Bisonekwa. (2 Tem. 2:15) Shi ulonge uno muswelo, ukateakanya mwifundi ku kusapula bya kiponka na ponka ne, shi wakabwanya bisakibwa, ku kutambila mu mwingilo wa busapudi bulongololwe pa kipwilo.
4 I kipite buya kuteakanya befundi ba Bible ku kulondwalondwa. (Mat. 10:36; Luka 8:13; 2 Tem. 3:12) Kitatyi kipangula bantu bipangujo nansha kwisambila pa myanda itala Batumoni ba Yehova, kino kikokeja kushitwila befundi dishinda dya kusapula bukamoni. Boloshile Les Témoins de Jéhovah : Qui sont-ils ? Quelles sont leurs croyances ? ukokeja kwibalumbila bekale beteakanye mwa “kutentulwila bantu bonso.” (1 Pet. 3:15) Uno boloshile udi na misapu ya bine ikakwasha bapya bekale nabo kukwasha balunda nabo ne ba mu bisaka byabo bemvwanije nkulupilo ne mingilo yetu imanine pa Bible.