Kusapula Kwitukwasha Tūminine
1 Kinenwa kya Leza kitusoñanya amba “tunyeme ne bukankamane ponka luno lubilo lo tutungilwe.” (Bah. 12:1) Pamo bwa munyemi wa lubilo usaka kushinda ufwaninwe kūminina, netu tufwaninwe kūminina pa kukamona mpalo ya būmi bwa nyeke. (Bah. 10:36) Lelo mwingilo wa bwine Kidishitu ukokeja kwitukwasha namani tūminine na kikōkeji kufika ne ku mfulo?—Mat. 24:13.
2 Bakomejibwe ku Mushipiditu: Potusapula milao ya kutendelwa idi mu Bible īsambila pa ntanda impya myoloke, twikalanga tulama batwe bene lukulupilo lwetu lūmi. (1 Tes. 5:8) Potutambila kitatyi ne kitatyi mu mwingilo wa budimi, twikalanga na mukenga wa kuyukija bubinebine botwifundile mu Bible. Twikalanga na mukenga wa kulwila lwitabijo lwetu, kino kyo kintu kitukomeja ku mushipiditu.
3 Shi tusaka kufundija bakwetu senene, tufwaninwe bidi batwe bene kwivwanija bubinebine bwa mu Bible. Tufwaninwe kulonga bukimbi ne kulanguluka pa byotwifunda. Bukomo botulonga bwitupanga buyuki bwa mushike, bukomeja lwitabijo, ne kwituningija ku mushipiditu. (Nk. 2:3-5) O mwanda ponso potukimba kukwasha bakwetu, twikomejanga ne batwe bene.—1 Tem. 4:15, 16.
4 Kutambila mu busapudi na bupyasakane kudi na kamweno pa kuvwala “panopele yonso ya Leza,” itukwasha tukomene Satana ne bademona bandi. (Ef. 6:10-13, 15) Kuputumina mu mingilo ikola ko kwitukwasha tujadike ñeni pa bintu byubaka ne kwepuka kubolejibwa na ntanda ya Satana. (Kol. 3:2) Potufundija bakwetu mashinda a Yehova, twendelelanga na kwivuluja batwe bene amba tunenwe kulama mwiendelejo ujila.—1 Pet. 2:12.
5 Bakomejibwe na Leza: Kya mfulo, kutambila mu mwingilo wa kusapula kwitufundijanga kukulupila mudi Yehova. (2 Kod. 4:1, 7) Bine ano i madyese’po kashā! Kutamija kino kikulupiji kuketulumbila tuvuije mwingilo wetu ne tulwe na ngikadilo yo-yonso yotukokeja kutana mu būmi. (Fid. 4:11-13) Bine, kwifunda kukulupila Yehova lo lufungulo lwa kūminina. (Mit. 55:22) Nanshi mu miswelo mivule mine, kusapula kwitukwasha tūminine.