Endeja Bifundwa bya Bible Byendelela Kumeso
Kipindi 12: Kwasha Befundi Bashilule ne Kwendeja Bifundwa
1 Befundi ba Bible shi abashilula kutambila mu mwingilo wa budimi, bekalanga padi na moyo wa kushilula ne kwendeja bifundwa bya Bible. Le tukebakwasha namani batamije mumweno muyampe mu kino kipindi kikatampe kya mwingilo wetu?—Mat. 24:14; 28:19, 20.
2 Shi mwifundi wa Bible wabwanya bisakibwa bya kwikala musapudi wakubulwa kubatyijibwa, padi wadi kemupwe kala kwilembeja ku Masomo a Mwingilo wa Kiteokratike. Bufundiji bwatambwile pa kuteakanya ne kupityija bipindi bya bana ba masomo bukamukwasha atamije bwino bwa kufundija busakilwa “sendwe wampikwa kyafwijibwa bumvu, muyuke kwingidija kinenwa kya bubinebine monka mokyolokele.”—2 Tem. 2:15, NW.
3 Fundija na Kimfwa: Yesu wāfundije bandi bana ba bwanga na kwibapa bufundiji ne na kwibashila kimfwa kiyampe. Wānene amba: “Wakuyūkidijapo ukēkalanga pamo ne shandi dya bwanga.” (Luka 6:40) Nobe i kya kamweno wiule Yesu na kupāna kimfwa kilumbuluke mu mwingilo obe. Mwifundi obe ukakumona potangidila mu mwingilo, ukevwanija amba kitungo kyobe mu kujokela’mo kupya i kushilula bifundwa bya Bible.
4 Shintulula amba potusaka kwifunda na muntu, ke ponsopo pobilomba kushintulula kamo ne kamo katala pa mwifundilwanga. Divule ukokeja kulombola’tu mwifundilwanga na kwingidija musango umo nansha ibidi mu kitabo kya kwifunda. Madingi akwasha atanwa pa paje 8 wa uno Mwingilo Wetu wa Bulopwe ne pa paje 6 wa Mwingilo Wetu wa Bulopwe wa Kweji 1, 2002.
5 Shi bibwanika, nena mwifundi akakutwale abe nansha musapudi mukwabo wa bwino ku bifundwa bya Bible. Ukokeja nandi kupebwa musango nansha kisonekwa kya kwisambila’po. Pa kino, na kutala, mwifundi ukayuka bivule bitala pa mwa kwendejeja bifundwa bya Bible byendelela kumeso. (Nk. 27:17; 2 Tem. 2:2) Mufwije’ko kadi wisambe nandi pa bintu byabwanya kwilemununa.
6 Kufundija basapudi bapya bekale bafundiji ba Kinenwa kya Leza ko kukebakwasha bekale kulongololwa mu “mīngilo yonso milumbuluke” ya kushilula ne kwendeja bifundwa byabo. (2 Tem. 3:17) Bine, i nsangaji pa kwingila nabo kakasa kakasa mu kutandabula luno lwito lwa buswe lwa’mba: “Uswele, nandi ayate’o, buntu bitupu, mema a būmi.”!—Kus. 22:17.