Kwasha Bakwenu ‘Bakōkele ne ku Mityima Kwine’
1. Yehova ulomba bika ku batōtyi bandi?
1 Kikōkeji kyo kintu kisakibwa pa kutōta Yehova mwasakila. (Kup. 12:28; 1 Pet. 1:14-16) Panopano ponka, butyibi bwa Leza busa kuponena “boba bampikwa kuyūka Leza, ne ku boba bampikwa kukōkela myanda-miyampe.” (2 Tes. 1:8) I muswelo’ka otukakwasha bakwetu ‘bakōkele ne ku mityima kwine’ bufundiji bwa mu Kinenwa kya Leza?—Loma 6:17.
2. Mwanda waka i kya kamweno tukwashe bakwetu batamije lwitabijo lukomo?
2 Na Kwibakwasha Batamije Lwitabijo ne Buswe: Mu Bisonekwa, kukōkela kwendelanga pamo na lwitabijo. Mutumibwa Polo wēsambile pa “mwanda-wamulao wa Leza, wa myaka yonso” wimanine pa “kikōkeji kya lwitabijo.” (Loma 16:26) Bahebelu shapita 11 utela bimfwa bivule bya lwitabijo, bingi bine bitala pa balondele kiswa-mutyima kinene Yehova. (Bah. 11:7, 8, 17) Ku mutamba mukwabo, kubulwa kikōkeji kukwatañene na kubulwa lwitabijo. (Yoa. 3:36; Bah. 3:18, 19) Tufwaninwe kwikala na bwino bwa kwingidija Kinenwa kya Leza mwanda wa kukwasha bakwetu batamije lwitabijo luleteja kikōkeji.—2 Tem. 2:15; Yak. 2:14, 17.
3. (a) Kikōkeji kikwatañene namani na buswe? (b) I muswelo’ka otukokeja kukwasha befundi ba Bible batamije buswe bwa kuswa Yehova?
3 Kikōkeji kadi kikwatañene na buswe bwa kuswa Leza. (Kup. 5:10; 11:1, 22; 30:16) Tutanga mu 1 Yoano 5:3, amba “luno namino lo lusa lwa Leza, lwa’mba tulame bijila byandi, kadi bijila byandi kebikolengapo, mhm.” Tukakwasha befundi ba Bible batamije buno buswe bwa kuswa Yehova namani? Tala mikenga imweka kitatyi kyo mwifunda mwa kutamijija mutyima wa kufwija’ko Yehova pangala pa ngikadilo yandi. Lombola patōka malango obe atala padi Leza. Kwasha mwifundi nandi alanguluke mwakokejeja kutamija kipwano kya bunka bwandi na Yehova. Ne kadi, buswe bwa kuswa Yehova bukatonona bakwetu—ne batwe bene kumo—tumukōkele ne ku mityima kwine.—Mat. 22:37.
4. (a) Mwanda waka kimfwa kyetu i kya kamweno? (b) I bika byotufwaninwe kulonga shi tusaka kutamija ‘mutyima wa kikōkeji’?
4 Na Kimfwa Kyetu: Muswelo mukatampe wa kukankamika bakwetu bakōkele myanda miyampe i kimfwa kyetu. Inoko, tufwaninwe kulonga bukomo kitatyi kyonso shi tusaka kutamija “mutyima wa kwivwanija,” ke wa kikōkeji kadi. (1 Bal. 3:9; Nk. 4:23) Penepa tukalonga bika? Tukadisha mutyima kupityila ku kifundwa kya Bible kya kitatyi ne kitatyi ne na kutanwa ku kupwila. (Mit. 1:1, 2; Bah. 10:24, 25) Ikala kupwana na boba badi na mutyima umo mu mutōtelo wa bine. (Nk. 13:20) Tambila nyeke mu mwingilo wa budimi, na mutyima wa kusaka kukwasha bantu ba mu mwaba wenu. Lomba Yehova akukwashe ne kukuludika utamije mutyima muyampe. (Mit. 86:11) Nyema bintu bikokeja kōna mutyima obe, kimfwa makayo emanine pa busekese ne butapani. Londalonda bintu bikufwenya kudi Leza ne biningisha kipwano kyopwene nandi.—Yak. 4:7, 8.
5. Ba kikōkeji beselwanga namani?
5 Yehova wāpele bantu bandi ba pa kala kikulupiji amba madyese akebapeta shi bateje diwi dyandi. (Kup. 28:1, 2) Ne dyalelo dine, Yehova weselanga mpata “bonso bamukōkele” bu mulopwe. (Bil. 5:32) Shi tufundija ne kuleta kimfwa kiyampe, nabya tukakwasha bakwetu bakōkele ne ku mityima kwine.