Tamija Bwino na Kulanguluka na Bakwenu
1. I nsekununi’ka ya mu Bible yotusaka kubandaula, ne mwanda waka?
1 Dishikulu dya mutumibwa Polo ku shinakoka ya mu Antyioka wa Pisidya, disonekelwe mu Bilongwa 13:16-41, dileta kimfwa kilumbuluke shi tukimba kulanguluka na bakwetu. Polo wātele mutyima ku kitamina ne milangwe ya bemvwaniki bandi kadi wākwatañanya’byo na musapwilo wandi wa myanda miyampe. Potubandaula ino nsekununi, tutalei netu motukokeja kulongela muswelo umo onka mu mwingilo wetu.
2. I ñeni’ka yotuboila ku muswelo wāshilwile Polo dishikulu dyandi?
2 Kimba Kyalwilo Kiyukane: Musapu wa Polo wādi wimanine pa mwingilo mukatampe wa Yesu mu kufikidila kwa mpango ya Leza, ino Polo kāshilwilepo dishikulu dyandi na kutengelela pa mwanda. Inoko wēsambīle bidi pa kintu kyādi kiyukilwe na Bayuda bavule bādi bamwivwana—mānga ya Bayuda. (Bil. 13:16-22) Netu mo monka, tukatenga mityima ya bakwetu shi tushilula na kintu kyotuyukile batwe bonso. Kino kilomba kwibaloba tudi mu kanwa na bipangujo bya bwino ne kuteja na katentekeji malondololo mwa kuyukila i bika byobatele’ko mutyima binebine.
3. I kika kyādi kikoleja bemvwaniki ba Polo kwitabija amba Yesu ye Meshiasa wālailwe?
3 Polo pa kwisambila pa mānga ya Bayuda, wāvulwije bemvwaniki bandi mulao wa Leza wa kuleta Umpandiji wa ku musuku wa Davida. Inoko, Bayuda bavule bādi batengele kalala wa mavita wa kwiya kutyumuna lupungu lwa bulopwe bwa bene Loma ne kuzunzula muzo wa Bayuda peulu pa mizo mikwabo. Bine, kebādipo balangila Yesu wāpelelwe na bendeji ba mutōtelo wa Bayuda mu Yelusalema, wātwalwa mu makasa a balupusa bene Loma, ne kwipaibwa’ye. Le Polo wādi wa kunekenya namani bano bantu amba Yesu uno ye Meshiasa wālailwe?
4. Le Polo wālangulukile namani na bwino na Bayuda bādi bamwivwana?
4 Kwatañanya Musapwilo Obe: Polo pa kuyuka uno mulangilo wa bemvwaniki bandi, wāingidije Bisonekwa mwa kulangulukila nabo pa bintu byobetabije kala. Kimfwa, wāshilwile na kutela amba Yesu i wa ku musuku wa Davida ne amba Yoano Umbatyiji, obādi bakulupile amba i mupolofeto wa Leza, wāmuyukenye. (Bil. 13:23-25) Polo wālombwele amba bendeji ba bipwilo pa kupela Yesu ne kumwipaija, bāfikidije “mawi a bapolofeto.” (Bil. 13:26-28) Ne kadi wāshintulwile amba abo bene bēmwenine Yesu musanguke mu lufu, kadi wākokela milangwe yabo pa bisonekwa byobebidile kwivwana bibingija kusanguka kwa Yesu.—Bil. 13:29-37.
5. (a) Polo wākwatañenye namani musapwilo wandi na Bangidiki bādi bamwivwana paādi wibasapwila? (b) I muswelo’ka otukokeja kwiula kimfwa kya Polo potusapwila bantu ba mu wetu mwaba?
5 Ku mutamba mukwabo, Polo pa kwisamba na Bangidiki bādi bamwivwana pa Aleopakusa, mu Atene, wāingidije musapwilo mwishile. (Bil. 17:22-31) Ino wāsapwile musapu wimanine pa mwanda umo onka, kadi mu byaba byonso bibidi wāangula bipa biyampe. (Bil. 13:42, 43; 17:34) Ne dyalelo nadyo, tukasapula biyampe mu mwingilo wetu shi tushilula bidi na mwanda otuyukile batwe bonso ne bemvwaniki betu ne shi tukwatañanya’o na kitamina ne milangwe yabo.