(1) Kipangujo (2) Kisonekwa, ne (3) Shapita

Muswelo upēla wa kupāna dibuku Lelo I Bika Bine Bifundija Bible? i uno: (1) kwipangula kipangujo kya kuloba tudi mu kanwa, (2) kutanga kisonekwa kifwaninwe, ne (3) kwimanina pa shapita wa mu dibuku wisambila pa mwanda’wa na kutanga bipangujo bya ntwelelo munshi mwa mutwe wao wa mwanda. Shi mwisambi nobe wasangela’byo, ukokeja kumulombola mwa kwifundila Bible na kwingidija misango imbajinji ya shapita’wa. Uno musapwilo ukokeja kwingidijibwa pa kushilula kifundwa mu kwitana kubajinji nansha mu kujokela’mo kupya.

◼ “Lelo ulanga bantu babwanya kuyuka Umpangi mwinē bukomo bonso, na mokilombwedilwe pano mu Bible?” Tanga Bilongwa 17:26, 27, ne kumuleka alondolole. Kupwa mulombole shapita 1.

◼ “Na bino bikoleja bitutana dyalelo, ulanga tubwanya kusokola busengi ne lukulupilo pamo bwa bino bilombwelwe pano?” Tanga Loma 15:4, ne kumuleka alondolole. Kupwa imanina pa shapita 2.

◼ “Shi wadi amba udi na bukomo, le wadi ubwanya kushinta bino bitelelwe pano?” Tanga Kusokwelwa 21:4, ne kumuleka alondolole. Kupwa imanina pa shapita 3.

◼ “Le ulanga betu bana bakekala’po mu ngikadilo na ino ilombwelwe mu luno lwimbo lwa pa kala?” Tanga Mitōto 37:10, 11, kadi muleke alondolole. Kupwa imanina pa shapita 3.

◼ “Molangila, lelo kudi difuku’tu dikafikidila bino binenwa bino?” Tanga Isaya 33:24, kadi muleke alondolole. Kupwa imanina pa shapita 3.

◼ “Le kodi mwiipangule shi bafwe bayukile byobya bilonga bōmi?” Muleke alondolole. Kupwa Tanga Musapudi 9:5, ne kwimanina pa shapita 6.

◼ “Ulanga’tu bibwanika dyuba dimo amba tukemona na baswe betu bafwile, na mwanenene Yesu mu ano mavese?” Tanga Yoano 5:28, 29, kadi muleke alondolole. Kupwa imanina pa shapita 7.

◼ “Molangila kiswa-mutyima kya Leza kikalongeka namani pano panshi pamo na mokilongekela momwa mūlu, na munenena’kyo luno lulombelo lutumbe?” Tanga Mateo 6:9, 10, kadi muleke alondolole. Kupwa imanina pa shapita 8.

◼ “Le ulanga amba bine tudi mu kitatyi kitelelwe na buno bupolofeto?” Tanga 2 Temote 3:1-4, kadi muleke alondolole. Kupwa imanina pa shapita 9. 

◼ “Bantu bavule beipangulanga mwanda waka makambakano a bantu enda abipila’ko. Le nobe kodi mubandaule buno bushintuludi?” Tanga Kusokwelwa 12:9, kadi muleke alondolole. Kupwa imanina pa shapita 10.

◼ “Lelo kusakilepo kuyuka malondololo a kino kipangujo kino?” Tanga Yoba 21:7, kadi muleke alondolole. Kupwa imanina pa shapita 11.

◼ “Ulanga kulonda madingi a mu Bible kukokeja kukwasha’tu bantu bekale na būmi bwa nsangaji mu kisaka?” Tanga Efisesa 5:33, kadi muleke alondolole. Kupwa imanina pa shapita 14.

Ukokeja kutūla kifundwa kya Bible ku lapolo shi mubefunde misunsa ibidi kunyuma kwa kulombola ino mpangiko ya mwa kwifundila ne shi umona amba kifundwa’kya kikendelela.