Mwingilo Wetu I Mwingilo wa Lusa
1 Yesu wāmwene bibumbo byādi bivwana musapu wandi, wājingulula’mba “basusukile ne kususuka, ne kusansana badingakana pamo na mikōko yampikwa mukumbi.” (Mat. 9:36) Penepo wēbafundija mashinda a Yehova na kanye ne buswe, wēbasenga ne kuvuija bisakibwa byabo bya ku mushipiditu na lusa. Netu shi tulangulukile pa mashinda a Yesu, nabya tukalonga ne kutenekwa mutyima pamo bwa aye, ne ino ngikadilo ya lusa lwandi nayo ikamweka mu mwingilo wetu.
2 Langa’po bidi mwālongele Yesu pādi pamufwena bantu bakimba bukwashi na mikeketo. (Luka 5:12, 13; 8:43-48) Wādi kadi ulangila boba bādi mu ngikadilo ya bufudile. (Mako 7:31-35) Ne wādi witūla pa kyaba kya bakwabo ne kwibata mutyima. Kādipo’tu utala enka mumwekela muntu panja. (Luka 7:36-40) Bine, Yesu wāiwile biyampe mutyima wa lusa wa Leza wetu.
3 “Webafwila Lusa”: Yesu kādipo wingila mwingilo wandi mwanda’po’tu i kiselwa kimupelwe. Wādi ‘ufwila bantu lusa.’ (Mako 6:34) Ne dyalelo nadyo mo monka, ketusapulangapo musapu bitupu, ino tutompanga ne kupandija būmi. Tufwaninwe kwivwanija mwanda waka bantu betabija nansha kupela mu muswelo kampanda. Mwanda waka badi na malangalanga ne kutuyuka? Lelo i basūlwe ne kusabwa meso na bakumbi ba bipwilo bya bubela? Bine, shi tuta bakwetu mutyima bya binebine kebakabulwepo kuteja myanda miyampe.—2 Kod. 6:4, 6.
4 Lusa luteñanga mityima. Ivwana kino kimfwa: Lolo umo wādi na bushiyena bwa kufwilwa mwana mwana-mukaji wa myeji isatu. Ino Batumoni babidi pa kwiya ku njibo yandi, webatweja na mulangwe wa kupela milangwe yabo itala pa kine kilekele’ko Leza masusu. Inoko, lolo’wa wānenene mwenda mafuku amba: “Bauntejeje na lusa lukatampe, ne pa kunshiya, neivwana biyampe mpata, o mwanda naitabije bāye kupempula dikwabo.” Lelo nobe uloñanga bukomo bwa kukwatyilwa lusa muntu yense owitana nandi mu mwingilo?
5 Wivwane tutamije mutyima wa lusa, nabya tukasenga bakwetu bya binebine. Ne kino kikatumbija Yehova, “Shandya byalusa.”—2 Kod. 1:3.