Twendelelei Kupa “Bipa Bivule Bīne”
1 Yesu wāingidije binenwa bya kyelekejo, wētela bu buñanza bwa binebine, Shandi nandi bu Mudimi, ebiya balondi bandi bashingwe māni bu misambo ipa bipa bya mañanza. Yesu wānene ukoma mvubu ya kwikala balamatyidile pototo ku buno buñanza paādi ushintulula mu kyelekejo mwingilo wa uno Mudimi. (Yoa. 15:1-4) Ñeni idi’mo i ino amba, yewa yense udi mu kipwano kya kasuku na Yehova ufwaninwe kwikala bwa musambo wa “buñanza bwa binebine,” ke Yesu Kidishitu kadi. Tufwaninwe kwendelela kupa bipa bivule, “kipa kya mushipiditu” ne kipa kya Bulopwe.—Ngat. 5:22, 23, NW; Mat. 24:14; 28:19, 20.
2 Kipa kya Mushipiditu: Tukokeja kuyukila kwendelela kotwendelela ku mushipiditu ku muswelo otulombola kipa kya mushipiditu mu būmi bwetu. Lelo wikankilanga’ko kutamija kipa kya mushipiditu wa Leza na kwifunda ne kulangulukila pa Kinenwa kya Leza kitatyi kyonso? (Fid. 1:9-11) Kokekaka kulomba mushipiditu sandu, mwanda o ukokeja kulupula modi ngikadila itumbija Yehova ne kukukwasha wendelele kutama ku mushipiditu.—Luk. 11:13; Yoa. 13:35.
3 Kutamija kipa kya mushipiditu kuketukwasha kadi twikale bengidi bapyasakane. Kimfwa, buswe ne lwitabijo bitutononanga tujadike mpangiko yetu ya mingilo mwa kutambidila mu mwingilo kitatyi ne kitatyi. Ngikadila pamo bwa ndoe, kitūkijetyima, kanye, kutalala, ne kwīfula itukwasha tulonge mobyendele ku boba betulwa. Nsangaji itukwasha tuloelelwe mwingilo nansha shi bantu bapela kwitabija’o.
4 Kipa kya Bulopwe: Tusakanga kadi kupa kipa kya Bulopwe. Mu kino kipa mo mubadilwa ne kwela “kitapwa kya kutōtelapo Leza nyeke na nyeke, kushintulula ko kunena’mba, i bipa bya milomo ya kwitabija ku dijina [dya Yehova].” (Bah. 13:15) Twelanga’kyo na kusapula myanda miyampe na bukankamane ne na bupyasakane. Lelo wikankilanga’ko kupa bininge kipa kya Bulopwe na kunengeja mwingilo obe?
5 Yesu wālombwele amba balondi bandi ba kikōkeji bakapa bipa bya buvule bwishileshile. (Mat. 13:23) Penepo nanshi, ketufwaninwepo kwidingakanya na bakwetu, ino tupei Leza pangya bukomo bwetu. (Ngat. 6:4) Kubandaula ngikadilo yetu pampikwa budimbidimbi kupityila ku Kinenwa kya Leza kuketukwasha twendelele kutendela Yehova na kupa “bipa bivule bīne.”—Yoa. 15:8.