Witungile Kitungo kya Kwendeja Kifundwa kya Bible
1 “Imikai meso enu, mumone ku madimi byo apwa kala kutōkeja, ke ku kwangula.” (Yoa. 4:35) Bino binenwa byānenwe na Yesu Kidishitu bidi bine na mvubu mu ngikadilo idi’mo bengidi Bene Kidishitu dyalelo.
2 Bantu ba mityima miyampe basaka kufundijibwa mashinda a Yehova bakimweka. Kino i kimweke mu buvule bwa bana ba bwanga babatyijibwa mwaka ne mwaka. Shi bine usakanga kwendeja kifundwa kya Bible, i bika byofwaninwe kulonga?
3 Witungile Kitungo: Dibajinji, witungile kitungo kya kushilula ne kwendeja kifundwa kya Bible kitatyi ne kitatyi. Lama kitungo kyobe mu ñeni poenda mu mwingilo wa budimi. Mu mwingilo wetu wa Bwine Kidishitu otupelwe byomubadilwa kufundija ne kusapula, batwe bonso tufwaninwe kwikala na mutyima wa kwingila bininge mwingilo wa kwendeja bifundwa bya Bible.—Mat. 24:14; 28:19, 20.
4 Myanda Mikwabo ya Kulama mu Ñeni: Basapudi ba Bulopwe bafwaninwe kulombela na mutyima umo. Kyaba kimo tutananga bantu baikele kulombela mwanda wa bakwashibwe ku mushipiditu. Bine, i dyese dikata kwingidijibwa na Yehova pa kutana ne kufundija bantu ba uno muswelo!—Hak. 2:7; Bil. 10:1, 2.
5 Kaka umo walombele amba ekale na kifundwa kya Bible, ebiya walombola bantu trakte Aimériez-vous en savoir plus sur la Bible ? ku kaji. Lolo umo watekuna’po trakte umo, wamutanga, kadinge ne kapindi ka kulomba kifundwa, kaka nandi wesamba nandi ne kushilula washilula kifundwa kya Bible.
6 Basapudi bakwenu badi na bwino bwa kushilula ne kwendeja bifundwa bya Bible bakokeja kukukwasha nobe ufikile pa kitungo kya kwendeja kifundwa kya Bible. Lombela nobe wikale’ko na kifundwa, kadi kwatakanya bukwashi bonso bobakukwasha mwa kufikila pa kitungo kyobe. Kepabulwe padi nobe kukejepo kwikala na nsangaji ya kwendeja kifundwa kya Bible.