Tusengei ba Mityima Mityumuke
1 Kashā kekwaikele’po kitatyi kikwabo mu mānga ya muntu kisakilwa bantu busengi na kino’ki. Tulondanga kimfwa kya Mulopwe wetu Kidishitu Yesu na kwingila mwingilo wa “kūndapa ba mityima mityumuke.”—Is. 61:1.
2 Bya Kulonga: Pa kusenga bantu, mwingilo wetu ufwaninwe kwikala divule na musapwilo mujalale, wa myanda ikankamika. Shi tutyepeje’ko mīsambo itala pa bilongwa bibi ne mfundijo ya bubela, nankyo tukavudija mu mīsambo yetu bubinebine bwa mu Bisonekwa ne lukulupilo luyampe lwa milao ya Leza isenga bantu. Kekunenapo amba ketukisambilapo nansha dimo pa Amakedona. Mwingilo otupelwe i wa “kwela lubila lwa mwaka wa buntu bulumbuluke bwa Yehova, ne difuku dya kulubwila kinongo kya Leza wetu,” ne “kudyumuna mubi ku dishinda dyandi dibi.” Inoko, kudyumuna bantu ku Amakedona ne kulombola moikonakenya bantu kebifwaninwepo kuvulankanya mutwe wa mwanda wisambila pa myanda miyampe ya Bulopwe.—Is. 61:2; Ezek. 3:18; Mat. 24:14.
3 Ku Njibo ne Njibo: I bipēla kutana bantu batyumwinwe mityima na misongo, kufwilwa muswe, mboloji, nansha na bufudile. Byotulonda kimfwa kya Kidishitu, ‘tukwatyilwanga bantu lusa’ ne kwimvwanina bulanda boba botutana mu mwingilo. (Luka 7:13; Loma 12:15) Nansha byotukokeja kuleta kisonekwa kimo nansha bibidi bisambila pa makambakano abo, ino tufwaninwe ‘kupeja pa kwivwana’ mwanda wa muntu alombole bidi ku mutyima. (Yak. 1:19) Shi tubapu kwivwana, papo ke bipēla kumusenga.
4 Shi mu kwisamba tubamone amba pano po pafwaninwe, tukokeja kunena’mba, “Nsakanga kukulombola’ko bidi binenwa bimo bikankamika byonamwene mu Bible.” I biyampe kutadija kutyina’mba twakanza kupatanya mulangwe o-onso mwitupe ukanena muntu. Ino tufwaninwe bidi kukankamika ne kusenga muntu’wa na Bisonekwa mwanda wa kumukomeja ku mutyima. Pa kino, tukokeja kutala mu dibuku Comment raisonner à partir des Écritures pa paje 119-122, pa kamutwe ka mwanda kanena’mba “Encouragement.” Nansha kupa mwisambi nobe trakte unena’mba Bukwashi ku Boba ba Mityima Ipēpa ne kwisambila pa myanda ikankamika idi’mo.
5 Kimba Mikenga ya Kusenga Bantu: Lelo uyukile’ko mulondakani, mwingidi nobe, mukwenu wa ku masomo, nansha mubutule obe usakilwa busengi? Ubulwe’po kulonga buninge bwa kwibapempula kwinjibo kwabo mwanda wa kwibasenga na Bisonekwa? Shi uyukile bibakoleja nabya ukamona mwa kwiteakenya. Bamo babwenye kusenga bakwabo na kwibatumina mikanda nansha na kwibeta ku telefone. Buswe bwa binebine bwa kuswa bakwetu buketutonona twibakwatyilwe bulanda ne kwibasenga na Bisonekwa.—Luka 10:25-37.
6 I bine, twi bapebwe mwingilo wa kusenga boba badila, kukankamika boba badi na bulanda ku mityima, ne kwibapa lukulupilo lwa būmi bulumbuluke bwa kumeso. Buno bo busengi busakilwa bantu ba pano pa ntanda ponso. Kwisambila pa bintu biyampe bivule bilaile Leza kukasenga bantu ba mityima miyampe ne kwibapa lukulupilo. Nanshi tuvulukei nyeke amba tufwaninwe kūndapa ba mityima mityumuke.