Tubwanya Kupa Yehova Kintu Kampanda
1 Lelo ujingulwile amba bantu babwanya kupa Leza bintu kampanda? Kimfwa, Abele wālambwile Yehova banyema balumbuluke ba mu luombe lwandi, ne ba Noa ne Yoba nabo bapēne bitapwa. (Ngal. 4:4; 8:20; Yoba 1:5) Eyo, ino milambu keyāpetejepo Umpangi, mwanda aye ye mwinē bintu byonso. Ino milambu yādi ilombola’mba bano bantu ba kikōkeji bādi basenswe Leza. Dyalelo nadyo, tubwanya kupa Yehova kitatyi, bukomo, ne bituntwa byetu bu ‘kitapwa kya kumutōtela’po.’—Bah. 13:15.
2 Kitatyi: Bine, i biyampe ‘kukūla kitatyi’ ku bintu bya mvubu mityetye mwanda wa kwingila mwingilo ne pa mfulo! (Ef. 5:15, 16) Padi tubwanya kutūla’ko mpangiko mwa kwingidila mwingilo wa bu pania kweji umo nansha makweji mavule pa mwaka. Pakwabo, tukokeja kulundila’ko kitatyi kyotupityijanga mu busapudi. Kwingila minite 30 ku yenga ne yenga kubwanya kulundila’ko nsaa ibidi ku kweji.
3 Bukomo: Pa kusaka tumone bukomo bwa kusapula, bitulomba kwepuka kwipwija mukose ne makayo etukokeja bininge ku mfulo twakomenwa kupa Yehova bintu bilumbuluke. Kadi bitulomba kuleka kwikala na malangatyima abwanya ‘kwitufityija mutyima’ twabulwa bukomo bwa kwingidila Leza. (Nk. 12:25, BB) Nansha shi tudi na bubinga bwa kudilakena, i kipite buya ‘kwela kiselwa padi Yehova’!—Mit. 55:22; Fid. 4:6, 7.
4 Bituntwa: Tubwanya kadi kupa Yehova bituntwa byetu mwa kwingidila mwingilo. Polo wākankamikile banababo Bene Kidishitu ‘batūle kwabo pafula’ mwa kwikadila ne kyakupa boba bafudile. (1 Kod. 16:1, 2) Mo monka netu, tukokeja kutūla pafula lupeto lwa kukwasha ku bisakibwa bya kipwilo ne ku mwingilo wingilwa ntanda yonso. Yehova usangelanga byabuntu bitamba ku mutyima nansha shi i bityetye.—Luka 21:1-4.
5 Yehova i mwitupe bivule. (Yak. 1:17) Tumufwijanga’ko netu na kumupa kitatyi, bukomo, ne bituntwa byetu potumwingidila. Kino kisangajanga Yehova, ‘mwanda aye i Leza uswele wa kupāna ne mutyima, tō.’—2 Kod. 9:7.