Malondololo ku Bipangujo Byenu

◼ Lelo i byendele’mo Batumoni ba Yehova bondapwe ne kulamwa ku lupitalo nansha kyundapilo kiludikwa na kipwilo kampanda?

Bipwilo palapala biludikanga mpitalo ne byundapilo bilama bantu babela misongo ya zenzeka. Pavule pene, ano mobo keatūdilwepo mwanda wa kwendeleja tumweno twa Babiloni Mukatakata. (Kus. 18:2, 4) Padi dibajinji ashimikilwe mwanda wa kukwasha kipwilo kimwene’mo lupeto. Ino dyalelo, mpitalo imo keishele enka na dijina bitupu dya kipwilo, mikwabo nayo i kimaninwe kitatyi kimo na bendeji ba kipwilo.

Shi Kamoni wa Yehova ukimba kwenda ku lupitalo nansha ku kyundapilo, ukatyiba butyibi aye mwine bwa kutala shi ukenda ku lupitalo lwendejibwa na kipwilo. Padi mutyima wa mundamunda wa umo ukokeja kwitabija kwenda’ko, ino wa mukwabo wamupeleja. (1 Tem. 1:5) Kudi ngikadilo palapala ikokeja kulengeja muntu atonge butongi kampanda, i biyampe kuta’yo mutyima.

Kimfwa, padi lupitalo ludi pabwipi mu kifuko’kya i enka lolwa lwendejibwa na kipwilo. Eyo, padi kudi lupitalo lukwabo pabwipi, ino lundapanga biyampe i lolwa lwendejibwa na kipwilo. Padi lupitalo lwendejibwa na kipwilo lo ludi na bingidilwa bya kundapa nabyo, nansha lo lonka ludi na dokitele uyukile kupasula musongo kampanda. Kadi mpitalo imoimo yendejibwa na kipwilo ikokeja kulēmeka mumweno wa Mwine Kidishitu utala pa mashi, ino kukwabo’ko mpika. Ino’i i myanda imoimo yokokeja kubandaula kumeso kwa kutyiba butyibi bwa kwenda ku lupitalo kampanda.

Shi ubatonge kwenda ku lupitalo nansha kyundapilo kiludikwa na kipwilo, nabya mona lupeto lokafuta bu mfutwa ya ku kundapa kobakundapa. Kadi mona kipwilo’kya bu i busunga bokilonga, ne amba lupeto lowafuta kukwatakenyepo kipwilo kya bubela. Ino abe ubafuta’tu pa mwanda wa kundapa kobakundapa.

Eyo, byodi Mwine Kidishitu, ufwaninwe kutadija ino ngikadilo kutyina’mba wakekuja mu butotyi bwa bipwilo bya bubela. Ne kadi kufwaninwe kwita bantu bengila nansha bāya kupempula’ko pa bitenta byabo bya bipwilo, kimfwa, “Mumpele” nansha “Masele.” (Mat. 23:9) Abe wibimone enka bwa byabusunga byokapotele nansha muntu ukwingidila mingilo, kete.

Kadi potwela ku lupitalo, wiyukanye amba wi Kamoni wa Yehova kadi bakulumpe ba kyenu kipwilo basa kwiya kukupempula. Kino kikebayukija amba podi’kopa ukwashibwanga ku mushipiditu.​—1 Tes. 5:14.

Ba kisaka, bakulumpe, ne banabetu mu kipwilo badi na kiselwa kya kukwasha ku mushipiditu batutu ne bakaka banunu badi mu byundapilo bya banunu, nakampata shi biludikwa na kipwilo kamukaya. Kupyasakena mu uno mwanda kukankamika nakampata banunu, kadi bakepuka kwikuja mu bilongwa bya kipwilo, mafetyi, ne bisela bikwabo bilongwa’ko.

Umo ne umo ukabandaula ngikadilo yadi’mo, koku ulamine ino myanda mu ñeni, ebiya kamone kutyiba butyibi bwa kuyuka shi ukondapwa ku lupitalo’ka nansha ku kyundapilo’ka.​—Ngat. 6:5.