Sengai Boba Badila
1. Mwanda waka boba badila bafwaninwe kusengibwa?
1 Kufwilwa muntu osenswe i mwanda wa bulanda, nakampata ku boba kebadipo na lukulupilo lwa Bulopwe. (1 Tes. 4:13) Bantu bavule beipangulanga’mba: ‘Mwanda waka bantu bafwa? Le kobadi i kwepi? Lelo tukemona na baswe betu dikwabo?’ Kunshi’ku kudi madingi otukokeja kwingidija mwa kusengela bantu bafwilwe mubutule nansha mulunda botutana mu busapudi.—Is. 61:2.
2. Shi mwinē njibo wetulombola amba i mufwilwe, lelo i biyampe tumupe bukamoni bulabula?
2 Ku Kibelo ne Kibelo: Mwinē njibo ukokeja kwitulombola amba i bafwilwe mu kyabo kisaka. Le i lufu lulēle pa ntanda? Lelo i kidilo? Mu uno muswelo, padi i biyampe kuleka kumupa bukamoni bulabula. (Mus. 3:1, 7) Tubwanya kulombola kinyenye na kumufwija’ko, ebiya twamushila trakte, dipepala, nansha boloshile ukwatañene na myanda yamufikila, ku mfulo twamushadika. Penepo tukokeja kukamujokela difuku dikwabo ne kumusenga na myanda mikwabo ya mu Bible.
3. Shi kudi muswelo, i bisonekwa’ka byotukatangila muntu mufwilwe?
3 Kitatyi kikwabo tukamona amba i biyampe kwisamba bivule mu kwitana kwetu kubajinji. Nansha kino byokekidipo kitatyi kya kumupelela milangwe yonso mibi, mukokeja kukatanga nandi milao ya mu Bible ya lusangukilo. (Yoa. 5:28, 29) Nansha kumulombola binena Bible pa mwikadile bafwe. (Mus. 9:5, 10) Mānga ya mu Bible itala pa lusangukilo nayo iletanga busengi. (Yoa. 11:39-44) Muswelo mukwabo i wa kubandaula binenwa bya Yoba muntu wa kikōkeji bilombola mwaādi ukulupidile Yehova. (Yoba 14:14, 15) Kumeso kwa kutaluka, tukokeja kumushila boloshile I Kika Kitufikilanga Potufwanga? ne Kitatyi Kifwa Muntu Osenswe, nansha boloshile ne trakte mukwabo. Tukokeja kumushila dibuku Bifundija Bible ne kukokela milangwe pa myanda idi mu shapita 6, ne kwilaya kitatyi kya kwiya kwisambila’po difuku dikwabo.
4. Lelo i bitatyi’ka bikwabo byotukokeja kusenga bantu?
4 Bitatyi Bikwabo: Shi lufu lubaletwa ku Njibo ya Bulopwe, le kukekala ne bantu bampikwa kwitabija? Nankyo mwibapei mabuku abwanya kwibasenga. Boba bengilanga mu mobo apoteja bya kujika nabyo bafwe basangelanga bitabo bya kusenga nabyo boba bafwilwe. Kyaba kikwabo, misapu ya mfwani isapulwanga mu majulunale, uno nao i mukenga wa kutumina bisaka bifwidilwe mukanda mwīpi wa kwibasenga. Difuku dimo, mulumya mufu ne wandi mwana mwana-mukaji pa kupwa kutambula mukanda wadi’mo ne matrakte, baendele ku njibo ya musapudi kukamwipangula’mba: “Lelo i abe watuma uno mukanda? Biyampe, nsakanga kuyuka bivule pa myanda idi mu Bible!” Muntu’wa ne mwanandi baitabija kwifunda Bible kadi bashilula kupwila.
5. Mwanda waka tufwaninwe kuboya mikenga mifwaninwe ya kusenga boba bafwilwe?
5 Musapudi 7:2 unena’mba: “Kitabukile kunengela kwenda ku njibo ya madilo, na kwenda ku njibo ya masobo.” Divule yewa udila ukokeja kuteleka Kinenwa kya Leza kupita’ko yewa udi mu masobo. Batwe bonso tufwaninwe kuboya mikenga mifwaninwe ya kusenga boba bafwidilwe muswe wabo.