Malondololo ku Bipangujo Byenu

◼ Lelo i myanda’ka mine ikesamba ba mulume ne mukaji pamo na bakulumpe shi basaka kulongela dishikulu dyabo dya butundaile mu Njibo ya Bulopwe?

Butundaile bulongwa mungya misoñanya ya Bible kebo kuletela Yehova bulēme. Kino kimwekanga nakampata palongwa mashikulu a butundaile mu Njibo ya Bulopwe, mwanda bantu bamonanga mpangiko’ya bu mo mwendele bulongolodi bwetu. Pa kusaka’mba “bintu byonsololo bilongibwe monka mo byendele biyampe ne mo bīkadile,” i biyampe kwipangula bakulumpe pa mwanda wa Njibo ya Bulopwe ilombwa mwanda wa dishikulu dya butundaile.​—1 Kod. 14:40.

Ba mulume ne mukaji basaka kwingidija Njibo ya Bulopwe mwanda wa dishikulu dya butundaile bafwaninwe kulemba mukanda ku komite wa mingilo wa pa kipwilo kipwidilanga mu njibo’ya. Mukanda ufwaninwe kutumwa kumeso kwa kitatyi kadi ufwaninwe kulombola difuku ne kitatyi kyobasaka kwingidija’yo. Bafwaninwe kuyuka’mba bakulumpe kebakashintapo mpangiko yabo ya kupwila mwanda wa dishikulu dya butundaile. Kadi, musoñañani ne mutundaile bafwaninwe kwikala na mwiendelejo muyampe, na būmi bukwatañene na misoñanya ya mu Bible ne mbila myoloke ya Yehova.

Ba mulume ne mukaji bafwaninwe kwisambila pa mpangiko ya butundaile pamo na komite wa mingilo kumeso kwa kutyiba butyibi bwa mfulo mwanda wa kunena’mba butundaile bupe Leza wetu bulēme. Nansha bakulumpe byokebakaningilapo ba mulume ne mukaji kulonda byobasaka, ino shi kudi kikoleja, nankyo bakajadika bintu senene. Kukombwa enka minjiki misañunwe mu Mélodies du Royaume nansha idi mu kitabo kyetu kya ñimbo. Mufwaninwe kulomba lupusa kumeso kwa kudyangula Njibo ya Bulopwe ne kupangika bishikatwa. Shi kukakwatwa mafoto nansha mafilime, keakakwatwapo mu muswelo utyepeja bulēme bwa butundaile. Bakulumpe babwanya kwibapa lupusa lwa kwiteakenya ku Njibo ya Bulopwe shi kekukakambakanyapo mpangiko mikwabo ya kipwilo. Tukanda twa lwito ketufwaninwepo kulamikwa kulamikwanga misapu. Inoko, bakulumpe bakokeja kusapwila kipwilo ku kupwila kwa mingilo mpangiko ya dishikulu dya butundaile dikalongwa mu Njibo ya Bulopwe.

Nansha byo kekinenenwepo amba ku butundaile kufwaninwe kwiya enka babatyijibwe, kebiyampepo kwita’ko bantu bayukene’mba badi na mwiendelejo keukwatañenepo na misoñanya idi mu Bible nansha badi na mwiendelejo ukokeja kwalakanwa na boba baile’ko. Dishikulu dya butundaile dikanenwa na mukulumpe, shi udi’ko. Bakulumpe i bayuke kufundija Kinenwa kya Leza, o mwanda bo babwanya kushintulula senene misoñanya ya mu Bisonekwa itala busongi.​—1 Tem. 3:2.

Mukulumpe ukanena dishikulu byatalwa na mwanda wa butundaile, i biyampe nanshi alombolwe muswelo obateakenye butundaile. Ukesamba na ba mulume ne mukaji mwanda wa kuyuka shi kwinangila kwabo kwadi kuyampe; i biyampe bamulombole kwampikwa kafinda ne na bubinebine. Shi musoñañani nansha musongwa wadi kala musonge nansha musongwe, nankyo ufwaninwe kulombola shi udi na bwana pabo bwa kusonga nansha bwa kusongwa mungya Bisonekwa ne mungya bijila. (Mat. 19:9) Kino kikalomba kulombola mukulumpe mukanda wa dilubu.

Shi ba mulume ne mukaji besamba pampikwa kafinda ne kwingila pamo na bakulumpe, nabya butundaile bwabo bukekala kitatyi kya nsangaji ku bonso.​—Nk. 15:22; Bah. 13:17.