Kwatakanya Bulopwe bwa Leza Tamba’nka Pano!
Langa’po bidi shi kimpumpu kya kyonakanya kikimba kupukuma mu kyenu kibundi. Baludiki abaela lubila lwa kwimudyumuna’mba: “TAMBAI! KIMBAI KWA KUNYEMENA!” Le ukalonga’po namani? Na bubine ukanyemena ku kifuko kya mutyima-ntenke.
Bine, batwe bonso tudi mu dishinda dyolokele’po “kimpumpu” kya kyonakanya, kyātelele Yesu bu “kyamalwa kikatampe.” (Mateo 24:21) Ketubwanyapo kutaluka bitupu mu dishinda dīya’mo kino kyamalwa. Ino tubwanya kulonga’po kintu mwanda wa kwikinga. Le i kintu’ka?
Yesu kidishitu mu Busapudi bwandi bwa ku Lūlu, wāsoñenye amba: “Nanshi kimbai bidi nyeke Bulopwe [bwa Leza] ne boloke bwandi.” (Mateo 6:33) Le tuloñanga kino namani?
Kukimba bidi Bulopwe bwa Leza. Ko kunena’mba tufwaninwe kumona Bulopwe bwa Leza na mvubu mikatampe kutabuka kintu kyo-kyonso. (Mateo 6:25, 32, 33) Mwanda waka? Mwanda bantu kebabwanyapo kupwija makambakano a muzo wa muntu. I enka Bulopwe bwa Leza kete bubwanya kupwa’o.
Kukimba boloke bwandi. Tufwaninwe kulonga bukomo bwa kwiendeja mungya bijila ne misoñanya myoloke ya Leza. Mwanda waka? Mwanda shi tutonge batwe bene kiyampe ne kibi, biketutwala kubi. (Nkindi 16:25) Inoko, shi twiendeja mungya misoñanya ya Leza, tukamusangaja ne kumwena’mo batwe bene.—Isaya 48:17, 18.
Kimbai bidi nyeke Bulopwe bwa Leza ne boloke bwandi. Yesu wādyumwine amba bamo babwanya kulabikwa ne kulanga’mba bakokeja kwikala na mutyima-nteke shi badi na lupeto luvule. Bakwabo babwanya kuzumbija mutyima mu būmi, babulwa ne kitatyi kya kukimba Bulopwe bwa Leza.—Mateo 6:19-21, 25-32.
Inoko, Yesu wālaile amba boba bakwatakenye Bulopwe bwa Leza bakekala na byobasakilwa dyalelo ne kukeselwa madyese ampikwa mfulo mu mafuku a kumeso.—Mateo 6:33.
Nansha bana ba bwanga ba Yesu ba mu myaka katwa kabajinji byobādi bidi bakimba Bulopwe bwa Leza ne boloke bwandi, kēbemweninepo mfulo ya misanshi ne masusu onso mu būmi bwabo. Inoko bādi bakingwe. Namani?
Bādi beendeja mungya misoñanya myoloke ya Leza, kadi kino kyēbakingile ku makambakano ādi ekonda na boba bādi bapumpunya binena Leza. Lwitabijo lukomo lobādi betabije amba Bulopwe bukāya, lwēbakweshe bōminine makambakano makomo. Kadi Leza wēbapele “bukomo butabukile bwikalanga na bantu” mwa kulwila na makambakano.—2 Bene Kodinda 4:7-9.
LE UKAKIMBA BIDI BULOPWE?
Bene Kidishitu ba mu myaka katwa kabajinji bākōkele musoñanya wa Yesu wa kukimba bidi Bulopwe. Bāsapwile myanda miyampe ya Bulopwe mu bipindi byonso bya ntanda byobādi’mo. (Bene Kolose 1:23) Le kudi bantu balonga namino dyalelo?
En-en! Batumoni ba Yehova bayukile amba kitatyi kyashala’ko kya Bulopwe bwa Leza kufudija ino ngikadilo ya bintu kibatyepa. O mwanda baloñanga bukomo bwa kulonda binenwa bya Yesu bya amba: “Ino myanda miyampe ya Bulopwe ikasapulwa pa ntanda yonso ikelwe na bantu mwanda wa bukamoni ku mizo yonso, ebiya mfulo keiya.”—Mateo 24:14.
Le uketaba namani ku myanda miyampe? Tubakulombe wiule bekadi ba mu myaka katwa kabajinji ba mu Masendonya, kibundi kya mu Belea. Pēbasapwidile Polo myanda miyampe ya Bulopwe, bāitabije musapu wandi “na kipyupyu kikatampe.” Kupwa “babandaula senene Bisonekwa” mwa kujingulwila byobāivwene, ebiya balonga bintu mungya byobāfundijibwe.—Bilongwa 17:11, 12.
Nobe ubwanya kulonga uno muswelo. Shi ukimbe bidi Bulopwe bwa Leza ne boloke bwandi, ukatana kinyemeno tamba’nka pano kadi ukekala nyeke mu ndoe ne mutyima-ntenke mu mafuku a kumeso.