Mwingilo Wetu—Kilomboji kya Kuswa Leza
1. Le kuswa Leza kwātonwene Yesu alonge bika?
1 Buswe bo bwātonwene Yesu avuije mwingilo wandi. Byonso byālongele Yesu mu mwingilo bilombola na bubine amba wādi uswele Yehova. Yesu wānene amba: “Nanshi’mba, bapanopantanda bayūke byo nsenswe Tata kadi monka mwandaīle aye mwine nami nongele monka.” (Yoa. 14:31) Batwe balonda mu mayo a Yesu, netu tudi na dyese dya kulombola mu mwingilo wetu amba tuswele Leza bininge.—Mat. 22:37; Ef. 5:1, 2.
2. Lelo kuswa Yehova kutala namani mwingilo wetu?
2 “Dijina Dyobe Dijile Kijila”: Kitatyi kyotuboya mukenga onso wa kwisambila na bupyasakane padi Yehova ne pa Bulopwe bwandi, tulombolanga’mba tuswele Leza ne kuyukanya buujila bwa dijina dyandi. (Mit. 83:18; Ezek. 36:23; Mat. 6:9) Pamo’nka bwa mwingilo wa Yesu, mwingilo wetu nao i kilomboji kya amba tudi na mutyima wa kuyukanya buujila bwa dijina dya Yehova ne tusaka kiswa-mutyima kyandi kilongeke.—Mat. 26:39.
3. Lelo kuswa Yehova kuketukwasha namani tukomene bikoleja?
3 Buswe Bwitukwashanga Tukomene Bikoleja: Kuswa Yehova kutyumunanga bijika byonso. (1 Kod. 13:4, 7) Yesu wātenwe na ngikadila mivule mu būmi yādi ikokeja kumujikakanya kwingila mwingilo wandi. Inoko, kitatyi kyāatene bikoleja, kuswa kwaādi uswele Yehova bininge ne mutyima wa kulonga kiswa-mutyima kya Yehova byāmukweshe akomene ino ngikadila. (Mako 3:21; 1 Pet. 2:18-23) Batwe netu tutanwanga na bikoleja bivule, ino kuswa Leza kwitukwashanga twibikomene. Shi tulonda kitompekejo kitushidile Kidishitu, kino kiketupa kikulupiji ne kekiketujikakanyapo kuvuija mwingilo wetu. Kupelwa na kisaka, kubelabela, bununu, nansha bujundu bwa bantu bibwanya kwitufikila, ino kebifwaninwepo kutalaja buswe botuswele Yehova ne kwitukankaja kuvuija mwingilo wetu.
4. Lelo kuswa Yehova kwitupanga madyese’ka?
4 Buswe budi na bukomo, ne twi ba dyese byotudi na bukomo bwa kulombola buswe mu mwingilo otwingidila Leza na muya wetu onso. (1 Kod. 13:13) Byotwenda tufwena ku kitatyi kisa kuyukanibwa buujila bwa dijina dya Yehova dimo kupwididile, tulomba amba “lusa [lwetu] lwende luvula ne kuvula.”—Fid. 1:9; Mat. 22:36-38.